Հայրենիքի ապագան երիտասարդությունն է. Սերժ Սարգսյան

Ալեքսանդր Սպենդիարյանի անվան օպերայի և բալետի ազգային ակադեմիական թատրոնում տեղի ունեցավ «Հայկյան» մրցանակաբաշխությունը, որի շրջանակներում մրցանակներ շնորհվեցին 9 անվանակարգերում: Մրցանակաբաշխության ընթացքում հանձնվել են նաև հատուկ մրցանակներ: Հատուկ մրցանակները հանձնել է ՀՀ նախագահ Սերժ Սարգսյանը:

Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանն իր խոսքում ընդգծեց, որ «Հայկյան» մրցանակաբաշխության ստեղծումն ուներ մեկ նպատակ` ստեղծել մրցակցային դաշտ  երիտասարդական ծրագրերի համար, նոր գաղափարների, նոր դեմքերի առանձնացնելու համար: «Եվ այսօր մենք դարձել ենք 15 տարեկան: Ես շնորհավորում եմ բոլոր մրցանակակիրներին, ովքեր արժանացել են մրցանակների 15 տարիների ընթացքում: Դրանք հասարակական կազմակերպություններ, ուսանողական կառույցներ են, որոնք  իրենց աշխատանքով փորձել են առանձնանալ, փորձ ել են կարևորել այն ծրագրերը, որոնք իրենք իրականացնում են: Գաղտնիք չէ, որ Հայաստանի երիտասարդական հիմնադրամի ստեղծումը մեր երկրի նախագահի այն քաղաքականության արդյունքն է, որն ուղղված է մեր երիտասարդությանը: Ես մեր երիտասարդության և ուսանողության անունից շնորհակալություն եմ հայտնում Ձեզ, պարոն Նախագահ: Չգիտես ինչու, վերջերս մենք դժվարանում ենք շնորհակալություն ասել, երախտագետ լինել, գնահատել լավը` մտահոգվելով, որ իրականության մեջ, գուցե, այլ կերպ մեկնաբանվի այդ շնորհակալությունը: Եվ այդ կոմպլեքսները տարիներ շարունակ հասցրել են նրան, որ մենք մեծ դժվարությամբ ենք բարձրաձայնում մեր ձեռքբերումների մասին: Մենք դրական ու լավ մտածողության տարածման կարիք ունենք, մանավանդ, այն գործերը, որոնց համար պետք է շնորհակալ լինենք շատ են»,-«Արմենպրես»-ի փոխանցմամբ՝ նշեց Ավագյանը` հավելելով, որ Հայաստանում երիտասարդության համար այսօր շատ բան է արվում` «Լույս» հիմնադրամի շնորհիվ հարյուրավոր հայ երիտասարդներ կրթություն են ստանում աշխարհի առաջատար բուհերում, բազմաթիվ երիտասարդ ընտանիքներ օգտվում են «Մատչելի բնակարան երիտասարդ ընտանիքներին» ծրագրից:

Մրցանակաբաշխության ընթացքում ելույթ ունեցավ նաև ՀՀ Նախագահ Սերժ Սարգսյանը: Նա իր խոսքում ընդգծեց, որ միշտ հաճույքով է մասնակցում «Հայկյան» մրցանակաբաշխությանը, որովհետև գտնվել մի միջավայրում, որտեղ գովաբանվում և գնահատվում է կարևոր նախաձեռնությունը: «Իրոք, ես որևէ առնչություն չունեմ մրցանակների շնորհման հետ: Չգիտես ինչու` բոլոր մրցանակակիրները շնորհակալություն են հայտնում ինձ: Շնորհակալություն հայտնեք ձեր հասակակիցներին: Սա այս մրցանակաբաշխության առավելություններից մեկն է, որովհետև նախաձեռնությունը երիտասարդինն է, գնահատողն էլ երիտասարդն է: Այսինքն, ավագները իրենց կամքը չեն պարտադրում, չեն ասում` այս մեկը վատ է, այս մեկը` լավ: Երիտասարդներն են ասում` այս մեկը լավն է, այս մյուսն այնքան էլ լավը չէ: Ծեծված խոսքեր են, սակայն միշտ անհրաժեշտություն կա դա կրկնելու, որ երկրի, հայրենիքի ապագան երիտասարդությունն է»,- նշեց Սերժ Սարգսյանը:

Մրցանակաբաշխության ընթացքում մրցանակներ են շնորհվել հետևյալ անվանակարգերում. Լավագույն երիտասադական ՀԿ Երևան քաղաքում, լավագույն երիտասարդական ՀԿ մարզում, Ինքնատիպ երիտասարդական նախագիծ, ուսանողական խորհրդի լավագույն նախագահ, լավագույն միջբուհական ծրագիր լավագույն երիտասարդական հաղորդում, լրատվական նախագիծ, լավագույն միջազգային կառույց, լավագույն երիտասարդական գիտական նվաճում, լավագույն ուսանողական ինքնակառավարման մարմին: