Ար­տա­ռոց վի­ճակ ԱԺ-ում.թափթ­վա­ծու­թյո՞ւն, թե՞ անպատասխանատվություն

Ազգային ժողովը երեկ շարունակեց կառավարության նախաձեռնությամբ գումարված արտահերթ նիստի աշխատանքները: Օրակարգում էր «Ազգային ժողովի կանոնակարգ» ՀՀ սահմանադրական օրենքում փոփոխություններ կատարելու մասին» և «Սահմանադրական դատարանի մասին» ՀՀ սահմանադրական օրենքում փոփոխություններ և լրացումներ կատարելու մասին» օրենսդրական փաթեթը երկրորդ ընթերցմամբ ընդունելու մասին հարցը: Խորհրդարանը նախօրեին քվեարկության արդյունքում 117 կողմ ձայնով առաջին ընթերցմամբ ընդունել էր քննարկված օրենսդրական փաթեթը:

Փաստորեն՝ երեկ ԱԺ-ն, ըստ էության, տեխնիկական գործառույթ պետք է իրականացներ ու երկրորդ ընթերցումը կազմակերպելու համար պատգամավորներից պահանջվելու էր շատ կարճ ժամանակ։ Սակայն նիստի մեկնարկին գրանցվել էր ընդամենը 44 պատգամավոր: 

ԱԺ արտահերթ նիստին չէին ներկայացել խորհրդարանական մեծամասնություն համարվող «Իմ քայլը» խմբակցության պատգամավորները, որոնց պատվիրակությունը, ինչպես հետո պարզվեց, մեկնել է Արցախ։

Ավելի ուշ՝ 14.30-ին, քվորում ապահովվեց, և նիստը վերջապես սկսվեց:

Այդուամենայնիվ, իրավիճակն իրապես արտառոց է Հայաստանի խորհրդարանական պատմության մեջ։ Նախորդ իշխանության ժամանակ եղել են բազմաթիվ դեպքեր, երբ ԱԺ նիստը տապալվել է՝ քվորումի բացակայության հետևանքով։ Սակայն նախկինում ֆորս-մաժորային իրավիճակները եղել են տվյալ գումարման խորհրդարանի գործունեության վերջին փուլում՝ հիմնականում պայմանավորված ընտրարշավներով, կամ էլ՝ խորհրդարանական մեծամասնությունը հարկադրված դիմել է դեմարշի, երբ ԱԺ արտահերթ նիստ անցկացնելու նախաձեռնությամբ հանդես է եկել ընդդիմությունը։ Սա, թերևս, առաջին դեպքն է, երբ խորհրդարանական մեծամասնությունը տապալում է կառավարության նախաձեռնած նիստը։

Իհարկե, խորհրդարանի ղեկավարությունը արտառոց այս փաստը բացատրում է այն հանգամանքով, որ մեծաթիվ պատվիրակություն էր գործուղվել Արցախ՝ քաղաքական այդ ակցիան պայմանավորելով Նիկոլ Փաշինյան-Իլհամ Ալիև երեկվա հանդիպումով։ Տվյալ պարագայում, կարծում եմ, որ դարձյալ պոպուլիզմի հոտ է գալիս, երբ շահարկվում է Արցախը։ Բանն այն է, որ Ստեփանակերտ է մեկնել ընդամենը 35 պատգամավորից բաղկացած պատվիրակություն, ու եթե մեծամասնությունը համակարգված աշխատանքի պոտենցիալ ունենար, հեշտությամբ կարող էր կազմակերպել խորհրդարանի այսօրվա նիստը։ Մի խոսքով, եթե հավատնաք իշխանությանը ու համարենք, որ երեկվա նիստի տապալման պատճառները տեխնիկական են, ապա գործ ունենք թափթփվածության կամ Փաշինյանի թիմի անկարողության հետ։ Ստացվում է՝ իշխանության ռեսուրսներն այնքան սահմանափակ են, որ նա չի կարողանում սպասարկել բազմաշերտ օրակարգ ու իր բոլոր ռեսուրսները կենտրոնացնում է ընդամենը մեկ խնդիր լուծելու համար։

Գուցե նաև առկա է անտարբերություն ու անպատասխանատվություն, քանզի այնպիսի տպավորություն էր, որ շատերն ուղղակի «ծլկել» էին Արցախ մեկնողների ստվերի տակ. կամ՝ «մեկա քվորում չի լինելու», կամ «համարենք՝ ես էլ էի գնացել» մեկնաբանությամբ: Այլապես ինչպես բացատրել, որ ԱԺ-ի ու «Իմ քայլը» խմբակցության ղեկավարության ջանքերով երեք ժամում շուրջ 50 պատգամավոր եկավ ու գրանցվեց: Արցախ մեկնածները, կրկնենք, 35-ն են, եթե նույնիսկ նրանք բոլորն էլ ճանապարհից հետ դառնային, էլի 50 չէին լինի...

Համենայն դեպս, խորհրդարանական գործունեության մեկնարկին նման ֆորսմաժորային իրավիճակը չի խոսում գործող ԱԺ-ի քաղաքական բարձր որակների մասին։

ՍՈՒՐԵՆ ՍՈՒՐԵՆՅԱՆՑ