Սատանան մանրուքների մեջ է. «Փաստ»

«Փաստ» օրաթերթը գրում է

Վերջին շրջանում արդիական է դարձել Միջազգային քրեական դատարանի Հռոմի ստատուտին Հայաստանի միանալու հարցը ՌԴ «Ռոսսելխոզնադզորի»՝ Հայաստանից Ռուսաստան կաթնամթերքի արտահանման արգելքին կապելը: Արդյո՞ք այդպես է, թե՞ ուղղակի այդ երկու գործընթացները սատանայական համընկնման մեջ են հայտնվել: Իհարկե, բացառել քաղաքական գործոնը, տարրական միամտություն կլինի: Սակայն այստեղ այլ ենթաշերտեր էլ կան: Բանն այն է, որ Հայաստանից կաթնամթերքի արտահանումը Ռուսաստան այնքան էլ նշանակալից չէ՝ համեմատած այլ արտահանումների հետ, օրինակ՝ սպիրտային խմիչքներ, ձուկ, ձկնամթերք, միրգ, բանջարեղեն, պահածոներ և այլն:

Իսկ ՌԴ «Ռոսսելխոզնադզորը» կամ, ավելի ճիշտ կլինի ասել, ՌԴ իշխանությունը սովորաբար ինչ-որ երկրի պատժելու համար թիրախավորում է այդ երկրի համար զգայուն ճյուղը, օրինակ՝ ժամանակին Վրաստանի դեպքում դա գինին ու «Բորժոմին» էր: Իհարկե, կրկնում ենք, «կաթնամթերքային» այս պատմությունը գուցե ընդամենը նախազգուշացում է, բայց, ինչպես ասում են, սատանան մանրուքների մեջ է: Փաստ է այն, որ այդ երկու գործընթացները համընկել են... Սակայն, չգիտես ինչու, տեղեկատվական հոսքերում մոռացվում են այդ ամենին նախորդած մի քանի այլ, այսպես ասած, կարևոր մանրուքներ: Նշենք դրանք: Նախ՝ մոտ երկու ամիս առաջ առանց լուրջ պարզաբանման սեփական դիմումի համաձայն պաշտոնը լքել է Սննդամթերքի անվտանգության տեսչական մարմնի (ՍԱՏՄ) ղեկավար Գեորգի Ավետիսյանը, որը այդ պաշտոնը՝ լավ թե վատ (հանուն արդարության՝ առավելապես լավ), զբաղեցրել էր «թավշյա հեղափոխությունից» հետո: Ամեն դեպքում, սա այն բացառիկ դեպքերից էր, որ «թավշյա հեղափոխությունից» հետո կառույցի ղեկավար էր նշանակվել համապատասխան մասնագիտությամբ, կառույցում աշխատած և գործից տեղյակ անձ:

Չար լեզուներն ասում են, որ Ավետիսյանը ուղղակի չի դիմացել կառավարության աշխատակազմի ղեկավար Արայիկ Հարությունյանի ճնշումներին, որը փորձում է ամեն տեղ իր մարդկանց խցկել՝ բնականաբար հաշվի չառնելով մասնագիտական գիտելիքները: Ի վերջո, հավանաբար Արայիկ Հարությունյանի ջանքերով, նշանակվել է ՍԱՏՄ այլ ղեկավար, և, բնականաբար, ոչ մասնագետ, ավելի կոնկրետ՝ ֆինանսական ոլորտում երկար տարիներ աշխատած տնտեսագետ: Դա ոչինչ, տեսչական մարմնի ղեկավար կարող է լինել ոչ մասնագետ, ի վերջո ղեկավարը աշխատանքների կազմակերպիչն է, իսկ կաշխատեն մասնագետ տեղակալները: Բայց... կարճ ժամանակ անց աշխատանքից ազատվել են ՍԱՏՄ պետի՝ առանց բացառության բոլոր տեղակալները: Սա էլ՝ երկրորդ հերթին: Երրորդ հերթին՝ ՍԱՏՄ պետը մինչ հիմա ոչ մի տեղակալ չունի, մի տեսակ ինչ-որ Ռեմբո է, որը միայնակ է պայքարում հայ ժողովրդի սննդային անվտանգության համար: Բնականաբար, այդ ամենին հետևել են համապատասխան արդյունքները:

Մասնավորապես, անհասկանալի իրավիճակ է ստեղծվել պարարտանյութերի՝ Հայաստան ներկրման հարցում, չխորանանք դրա մեջ, բայց, իհարկե, գարունը իր ճշտումները կմտցնի այդ հարցում, հնարավոր է՝ ճանապարհներ փակելու տեսքով. ի վերջո, գյուղացիներին պարարտանյութեր են պետք: Երկրորդ ահազանգը մեզ հայտնի դեպքն է՝ Հայաստանից Ռուսաստան կաթնամթերքի արտահանման արգելքը: Սպասենք երրորդին... ամենայն հավանականությամբ, դա կլինի Ռուսաստան հայկական ծիրանի արտահանման արգելքը, դժվար չէ ինչ-որ միջատ գտնել ծիրանի մեջ: Եվ այստեղ, ամենայն հավանականությամբ, հարցը միայն Հռոմի ստատուտը չէ: Այստեղ հարցն այն է, որ ֆինանսիստը պետք է զբաղվի ֆինանսներով, բժիշկը՝ բժշկությամբ, իսկ լրագրողը՝ լրագրությամբ, քանի որ այդ կերպ նրանք ավելի պիտանի կլինեն հայ հասարակությանը և պետականությանը, քանի որ իրենց համար անհասկանալի ոլորտում «հեղափոխություն իրականացնելը» նրանց համար նման է «մութ սենյակում սև կատու բռնելուն, մանավանդ որ այն չկա»:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում