Վերջին 20 տարվա ընթացքում Արցախի համար ավելի վտանգավոր օրեր չեն եղել, քան հիմա

Նարեկ Գալստյանը Ֆեյսբուքյան իր էջում գրում է.

Պարզից էլ պարզ է, որ Լավրովի Հայաստան այցելությունն ուղղակի կապ ունի արցախյան հիմնախնդրի հետ: Թերևս վերջին 20 տարվա ընթացքում Արցախի համար ավելի վտանգավոր օրեր չեն եղել, քան հիմա: Անգամ ադրբեջանական հրոսակների հարձակման օրերին Արցախի գլխին այդքան սև ամպեր չէին կուտակվել, քան, ըստ երևույթին, կուտակվում են այս օրերին: Ու հիմա ավելի քան կարևոր է միասնական, առանց ավելորդ հուզմունքի և էմոցիաների Հայաստանից վռնդել ցանկացածի, ով կփորձի մեզ հողային զիջում պարտադրել՝ լինի այդ էմիսարը Մոսկվայից, թե Վաշինգտոնից կամ Բրյուսելից: Հիմա այլևս անիմաստ «մետ»-երի և «իզմ»-երի ժամանակը չէ: Եթե պարտարդող կողմը պետք է լինի Մոսկվան, ապա այսօր հույս ունեմ, որ Լավրովին հստակ կհասկացնեն, թե ինչ վտանգներով է հղի ցանկացած հակահայ որոշման հետևանքով Հայաստանի կողմից Արցախի ճանաչումը հենց Ռուսաստանի համար:
Այո՛, մենք պատրաստ պետք է լինենք ճանաչել Արցախի անկախությունը, այո՛, դրանից հետո նույն օրը Արցախում պետք է անցնի հանրաքվե, և վերջապես Արցախը պետք է միանա Հայաստանին: Այդ պարագայում Մոսկվան, ուզի կամ չուզի, պետք է հաշվի առնի, որ Արցախի դեմ ցանկացած ռազմական ագրեսիա ագրեսիա է Հայաստանի, իսկ ՀԱՊԿ պարտավորությամբ՝ Ռուսաստանի նկատմամբ: Այն նույն տրամաբանությամբ, եթե հիմա ռազմական ագրեսիա լինի Ղրիմի նկատմամբ, ապա Երևանն էլ ունի իր պարտականությունները: 
Մի խոսքով, ծանր օրեր են սպասվում, որին դիմագրավել է պետք վճռական, առանց մի վայրկյան կասկածելու, որ մենք զիջելու ոչինչ չունենք...