Աղջիկներ, որոնք երազում են պատվով ներկայացնել Հայաստանն ու հայրենիք վերադարձնել հաղթանակը. Tert.am Life-ը զրուցել է «Մանկական Եվրատեսիլ» 2023-ի մեր պատվիրակների հետ (լուսանկարներ)

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

EXCLUSIVE 

Հինգ աղջիկ, միավորված նույն գաղափարի շուրջ, այս տարի «Մանկական Եվրատեսիլ» 2023-ին ներկայացնելու են Հայաստանը: Նանեն, Նենսին, Կամիլլան, Սյուզաննան և Աիդան Yan Girls խումբը ստեղծել են հենց «Մանկական Եվրատեսիլ»-ին մասնակցելու նպատակով:

Օրեր շարունակ աղջիկներն իրենց բարձր տրամադրությամբ, անսպառ էներգիայով և կենսախնդությամբ են լցրել Առաջին ալիքի շենքը, որտեղ անցնում են նրանց փորձերը: Tert.am Life-ը ներկա է գտնվել փորձերից մեկին և զրուցել Yan Girls խմբի աղջիկների հետ, որոնք պատմել են՝ ինչպես են տեղեկացել, որ հենց իրենք են ներկայացնելու Հայաստանը, նախընտրական փուլերի մասին, խոսել են իրենց երազանքների, հետաքրքրությունների և կյանքի այս շրջանի մասին:

Խմբի ամենակրտսեր անդամը գանգրահեր, ակտիվ և ժպտերես Աիդան է: Նա 9 տարեկան է, հասցրել է հաճախել պարի, վոկալի և այս տարիքում երազում է ունենալ պարի և վոկալի սեփական դպրոց: Երիտասարդ երգչուհին ազատ ժամանակ զբաղվում է սերֆինգով, իսկ ձմռանը սիրում է դահուկ քշել:

Yan Girls-ի մյուս անդամը 11-ամյա Կամիլլան է, որը սկսել է վոկալով զբաղվել դեռևս 4 տարեկանից: Երաժշտությունից զատ Կամիլլան սիրում է զբաղվել ձեռագործությամբ, լսել լավ երաժշտություն: Խոսելով երազանքների մասին՝ նա նշել է, որ երազում է դառնալ հայտնի երգչուհի:

10 տարեկան Սյուզին խմբի երազում է դառնալ հայտնի դիզայներ և այս վաղ տարիքում արդեն ունի էսքիզներ, որոնք ապագայում պատրաստվում է կյանքի կոչել: Երիտասարդ երգչուհին սովորում է Չայկովսկու անվան միջնակարգ մասնագիտական երաժշտական դպրոցում և հաճախում գեղասահքի:

Yan Girls-ի ամենամեծ անդամը Նանեն է, որը շուտով դառնալու է 12 տարեկան: Չնայած Նանեն վաղ տարիքից հաճախում է երգի և պարի, սակայն նրա համար ամենասիրելի զբաղմունքներից է նկարչությունը, որի շնորհիվ երիտասարդ երգչուհին ինքնարտահայտվում է: Նանեն նաև հասցրել է նկարահանվել երաժշտական ծրագրերում և գովազդային հոլովակներում:

Աղջիկները «Մանկական Եվրատեսիլ»-ի համար ներկայացնում են K-pop ոճի աշխատանք. 11-ամյա Նենսին նշում է, որ դա իր սիրելի ոճն է և որ հաճախ է լսում Black Pink և BTS խմբերին: Երիտասարդ երգչուհին պատմել է, որ սիրում է ձեռագործ զարդեր ու նաև պատրաստում է դրանք: Իդեպ, հարցազրույցի ընթացքում Նենսին կրում էր իր իսկ պատրաստած զարդերը:

Tert.am Life-ի հետ զրույցում երիտասարդ երգչուհիները պատմել են, թե ինչպես են ծանոթացել.
«Մեր մայրիկներն ընկերուհիներ են և որոշեցին մեզ ծանոթացնել, քանի որ բոլորիս միավորում են երգն ու երաժշտությունը: Մենք տեսանք, որ Առաջին ալիքը տարածել է հայտարարություն, որտեղ կարող էինք հայտ թողնել «Մանկական Եվրատեսիլ» 2023-ին մասնակցելու համար: Արդյունքում ստեղծեցինք այս խումբ ու մասնակցեցինք նախընտրական փուլին»,- պատմել է Նանեն:

Նենսին մանրամասնել է, թե ինչպես է խումբը կատարել երգի ընտրությունն ու ինչպես են անցել նախընտրական փուլի ելույթները:
«Նախընտրական փուլերի ժամանակ կատարել ենք երկու երգ, առաջինը՝ Revolting Children երգը՝ «Մաթիլդա» ֆիլմից, երկրորդը՝ Bang-Bang երգը: Սպասում էինք մեր հերթին և, կարող եմ ասել, որ բոլորս աննկարագրելի հուզված էինք, քանի որ առաջին ելույթն էր լինելու: Չէինք պատկերացնում՝ ով է լինելու ժուրիի կազմում, բայց տեսանք ծանոթ դեմքեր: Բեմ բարձրանալով՝ զգացինք ազատությունն ու դրական հույզերը՝ կարծում եմ, որ հենց դա էլ կարևոր հանգամանք էր, որ կարողացանք լավ ելույթ ունենալ»,- նշել է Նենսին:

Աղջիկներն անակնկալ կերպով են տեղեկացել, որ հենց իրենք են ներկայացնելու Հայաստանը «Մանկական Եվրատեսիլ» 2023-ին: Մեզ հետ զրույցում Կամիլլան ներկայացրել է ուշագրավ պահի մանրամասները՝ պատմելով, որ այդ օրը խմբով գնում էին հերթական նախընտրական փուլին:

«Մեզ ասացին, որ առջևում կա ևս մեկ նախընտրական փուլ, որ մեզ պետք է նորից լսեն, նկարահանեն և հետագայում կատարեն վերջնական ընտրություն: Մենք գնացել էինք մեր մայրիկների հետ և սենյակում նստած էինք, երբ հայտարարեցին, որ հենց մենք ենք ներկայացնելու Հայաստանն այս տարի»,- պատմել է Կամիլլան:

Երգի հեղինակն է Դավիթ Բադալյանը, որը նաև եվրատեսիլյան մյուս մասնակցի՝ Մալենայի «Քամի-քամի» հաղթական երգի հեղինակն է և նրա պրոդյուսերը, իսկ: Այս տարվա երգի խոսքերի հեղինակը Մալենան և Վահրամ Պետրոսյանն են: Հատկանշական է, որ Հայաստանն առաջին անգամ է ներկայացնում երգ, որը K-pop ոճում է: Պարը բեմադրել է Վիկա Մարտիրոսյանը, իսկ վառ և ոճային հագուստի հեղինակը Ֆաինա Հարությունյանն է: Խումբը ժամեր շարունակ նկարահանել է տեսահոլովակը, որի ռեժիսորն է Արթուր Մանուկյանը:

Tert.am Life-ի հետ զրույցում խմբի անդամ Սյուզաննան պատմել է, թե ինչպես են իրականացվել տեսահոլովակի նկարահանումները:
«Վաղ առավոտյան՝ժամը 9:00-ից սկսվել են նախապատրաստական աշխատանքները, իսկ բուն նկարահանումները՝ ժամը 11:00-ին: Բավականին բարդ ընթացք էր, քանի որ պետք է երգեինք, պարեինք, աշխատեինք տեսախցիկի հետ, կարողանայինք միասին ճիշտ աշխատել: Մենք գիտեինք՝ ուր ենք եկել և ինչ նպատակով և կարողացել ենք ժամեր շարունակ աշխատել, որպեսզի ստանանք համապատասխան արդյունք: Կարևոր էր, որ մի մեծ թիմ մեր կողքին էր, ուղղորդում էր մեզ, աշխատում էր մեզ հետ: Մենք այդ օրը գիշերը ժամը 03:00-ին ենք ավարտել նկարահանումները, բայց այնքան ոգևորված էինք և էներգիայով լեցուն, որ պատրաստ էինք շարունակել աշխատել»,- հավելել է Սյուզաննան:

«Մեզ համար տեսահոլովակի դիտումը ևս անակնկալ կերպով էր, քանի որ պատրաստվում էինք ֆիլմի դիտման, որից հետո պետք է բոլորով հավաքվեինք և տեսնեինք տեսահոլովակը, բայց կինոթատրոնում անակնկալ կերպով միացավ տեսահոլովակն ու տեսանք մեր աշխատանքը, մեզ, մեր կատարումն ու թե ինչպես է այն մատուցվել: Բոլորս սիրել ենք ու հավանել ենք թե՛ երգը, թե՛ տեսահոլովակը»,- նշել է Աիդան:
Աղջիկների խոսքով՝ չէին կարող պատկերացնել, որ կյանքում նման փուլ կգա, երբ ամեն օր կունենան նկարահանումներ, փորձեր և նմանօրինակ աշխատանքներ:

«Մենք գիտակցում ենք, թե ինչ պատասխանատվություն է դրված մեզ վրա: Գուցե սա մեր կարիերայի ամենապատասխանատու փուլերից է, երբ պետք է միջազգային մրցույթում ներկայացնենք Հայաստանը: Մենք քրտնաջան աշխատում ենք, գալիս փորձերի, մասնակցում նկարահանումների, որպեսզի հնարավորինս լավ ներկայանանք մրցույթին, լավ ելույթ ունենանք և արդարացնենք մեր հայրենակիցների սպասելիքները»,- եզրափակել է Նանեն:
Նշենք, որ «Մանկական Եվրատեսիլ» երգի 21-րդ մրցույթը տեղի կունենա նոյեմբերի 26-ին Ֆրանսիայի Նիցցա քաղաքում: Մրցույթի կարգախոսն է` «Հերոսներ» (Heroes), իսկ Հայաստանի «hերոսները» այս 5 աղջիկն են, որոնք Do It My Way երգով ներկայացնելու են մեր երկիրը:

 

 

Հեղինակ Թերեզա Հովհաննիսյան