Գևորգ Ալթունյանը հեռացավ Հ1–ից, նրան կփոխարինի Հարություն Հարությունյանը

Արդեն հայտնի է, որ Հարություն Հարությունյանին առաջարկվել է ղեկավարել Հանրային հեռուստաընկերության լրատվական և վերլուծական հաղորդումների տնօրենի պաշտոնը: 

Հարությունյանն այդ մասին իրազեկել է ֆեյսբուք սոցիալական ցանցի իր էջում կատարելով հետևյալ գրառումը. «Հանրային հեռուստաընկերության ղեկավարության կողմից ստացել եմ առաջարկ` ստանձնել Հանրային հեռուստաընկերության քաղաքական  և  լրատվական  հաղորդումների  բաժնի կառավարումը: Չեմ մերժել առաջարկը»:

Նշենք նաև, որ 2012 թ.–ից  Հանրային  հեռուստաընկերության  լրատվական և վերլուծական հաղորդումների տնօրենը «Տեսանկյուն» հեղինակային հաղորդաշարի վարող Գևորգ Ալթունյանն էր:

Past.am-ի հավաստի տեղեկություններով` Գ. Ալթունյանը,  ով  օրերս  կազատվի  իր զբաղեցրած պաշտոնից, առաջիկայում կնշանակվի Պաշտպանության նախարարության հասարակայնության հետ կապերի և լրատվության վարչության պետի պաշտոնում: ՀՀ ՊՆ մամլո խոսնակ Արծրուն Հովհաննիսյանը Past.am-ին տեղեկացրեց, որ այդ մասինինքը որևէ տեղեկություն չունի: Նա նաև չգիտեր, թե ՊՆ հասարակայնության հետ կապերի և լրատվության պետի պաշտոնը ստանձնելու համար օրենքով սահմանվածկարգով զինվորական կոչում  հարկավո՞ր է ունենալ, թե` ոչ: 

Ինչ վերաբերում էր իրեն այլ պաշտոնի նշանակելուն, ասաց. «Ես զինվորական եմ, որտեղ որ ինձ նշանակեն, այնտեղ էլ կշարունակեմ  իրականացնել իմ ծառայությունը»:

Past.am-ը կապ հաստատեց նաև Գ. Ալթունյանի հետ`  ճշտելու  լուրի  իսկությունը:  Նա տեղեկացրեց,    որ Հ1–ից հեռանալու  մասին որոշումն արդեն  կայացրել է:  Ինքը չորսառաջարկ ունի ստացած: Արդեն որոշել է, թե ուր կգնա, բայց այդ մասին կխոսի երկու օրից: