Սարգիս Հովսեփյան. Հավաքականին Մխիթարյանն ավելի պետք է հենակետայինի դիրքում

Ֆուտբոլի Հայաստանի ազգային հավաքականի գլխավոր մարզիչի պաշտոնակատար Սարգիս Հովսեփյանը նախախաղային ասուլիսում խոսեց դանիացիների դեմ Եվրո-2016-ի ընտրական հանդիպման մասին, ինչպես նաեւ անդրադաձավ սեպտեմբերի 4-ին սերբերից կրած պարտությանը:

«Հնարավոր է, որ Մխիթարյանը ենթահարձակվողի դիրքում ավելի օգտակար կլիներ, բայց ես կարծում եմ, որ մեր հավաքականում նրա ճիշտ դիրքը հենակետային գոտին է: Եթե ունենայինք 3-4 Մխիթարյան, նրան կխաղացնեինք հարձակմանն ավելի մոտ, սակայն մենք ունենք միայն մեկ Հենրիխ: Մխիթարյանը շատ լավ է խաղում հենակետայինի գոտում: Մեր գրոհների մեծ մասը հենց նա է ստեղծում: Հասկանում եմ, որ լավ կլիներ, եթե նա խաղար հարձակմանն ավելի մոտ, սակայն եթե կենտրոնը հանձնես մրցակցին, շատ բարդ կլինի: Կրկնում եմ, որ չստացվեց ամբողջ թիմի խաղը: Եթե պարտվել ենք, նշանակում է՝ վատ ենք աշխատել եւ մարզվել բոլորս: Վերլուծություններ ենք արել եւ կփորձենք շտկել սխալները:

Հասկանում էինք, որ սերբերի դեմ պետք է խաղանք հակագրոհներով, քանի որ նրանք հաղթանակներ չունեին տանը: Սերբիայի թիմը խաղալու էր հարձակողական ֆուտբոլ եւ ստեղծելու էր ազատ գոտիներ: Մենք չօգտագործեցինք մի շարք գոլային պահեր: Ես ասել էի, որ պետք է ուշադիր լինենք նրանց եզրային կիսապաշտպանների հանդեպ, սակայն չստացվեց: Տղաները կատարեցին իրենց առաջադրանքները, բայց ոչ լիովին:

Չեմ կարող նշել, թե կոնկրետ որ խաղացողները չեն կատարել իմ կարգադրանքները: Գիտեմ, որ ձեզ համար անուններ են հետաքրքիր, սակայն դա ներքին խոհանոց է: Մենք ուշադրություն չենք դարձնում, թե ֆուտբոլիստը որ ակումբից է: Բոլորն էլ պետք է կատարեն մարզիչի հրահանգները: Գուցե նրանցից շատերը լավագույն մարզավիճակում չէին կամ սերբերն էին շատ լավ պատրաստված:

Հասկանում եմ, որ մեկ տարի հաղթանակ չենք տարել, եւ գլխավոր մոտիվացիան հենց դա է, որ ցանկանում ենք հաղթել, հատկապես՝ տանը: Ամեն ինչ անելու ենք հաղթանակի համար:

Յուրա Մովսիսյանը շատ լավ աշխատում էր, եւ օգնում էր նաեւ պաշտպանվելիս: Մրցակիցը եւս շատ ուժեղ էր, եւ գիտեր, թե ինչ վտանգ է իրենից ներկայացնում Յուրան: Արաս Օզբիլիսը երկար ժամանակ չէր խաղացել, սակայն տգեղ կլիներ, եթե նրան չհրավիրեիքն հավաքական: Ինչով կարող ենք պետք է օգնենք Արասին, չէ որ նա մեր համար է զոհաբերել իր առողջությունը:

Պետք է պաշտպանվեն ոչ միայն եզրային պաշտպանները, այլ՝ կիսապաշտպանները: Եզրերում պետք է պաշտպանվի 2 ֆուտբոլիստ, որոնք պետք է օգնեն իրար: Մեր եզրային պաշտպանները նորմալ են խաղացել: Չեմ կարող ասել, որ լավ հանդես եկան, քանի որ պարտվել ենք, սակայն նրանք արեցին առավելագույնը: Եզրային պաշտպանն առաջին հերթին պետք է մտածի իր աշխատանքի մասին, իսկ հետո՝ նոր գորհենրին միանալու: Ես ունեմ ֆուտբոլիստներ, այդ թվում՝ Նորայր Ասլանյանը, ովքեր կարող են խաղալ ձախ պաշտպանի դիրքում: Չեմ բացի խաղաքարտերը, բայց հավատացեք, որ մենք ունենք այդ խաղացողին:

Եթե մարզումներին տեսնում ենք, որ ակումբում խաղային պրակտիկա ունեցող ֆուտբոլիստը զիջում է ավելի քիչ խաղացողին, ապա կփոխարինենք նրան: Մենք չենք կարող հենց այնպես փոխարինում կատարել: Ստիպված ենք բավարարվել այն ֆուտբոլիստներով, որոնք կան: Հավատացնում եմ ձեզ, որ խաղում են այդ պահին ամենալավ պատրաստված ֆուտբոլիստները: Ձախ պաշտպանի դիրքից բացի, ունենք նաեւ վնասվածքով այլ ֆուտբոլիստներ, որոնք չեն կարող խաղալ, բայց չեմ նշի անուններ:

Սերբերի դեմ խաղում Մարկոսի փոխարինումը վնասվածքի պատճառով էր: Նա չէր կարողանում խաղալ, բայց հանուն հավաքականի չէր ասում դա, ինչն արեց Մխիթարյանը: Ինչ վերաբերում է Գեւորգ Ղազարյանին, ապա նա կարող է իր կյանքն էլ նվիրել հավաքականին: Նրա մոտ կա մեծ նվիրվածություն, եւ հիմարությւոն կլինի չխաղացնել այդպիսի ֆուտբոլիստի:

Եթե պարտվենք նաեւ Դանիային, ապա իմաստ չի ունենա իմ հրաժարականը, քանի որ ես ժամանակավոր եմ»,- ասաց Հայաստանի հավաքականի նախկին ավագը:

Հիշեցնենք, որ Հայաստան - Դանիա հանդիպումը կկայանա սեպտեմբերի 7-ին Երեւանի «Հանրապետական» ստադիոնում եւ կսկսվի ժամը 20:00-ին: Կոպենհագենում կայացած առաջին խաղում դանիացիները կամային հաղթանակ են տարել Հայաստանի հավաքականի նկատմամբ՝ 2:1:

Դավիթ Եղիազարյան

Ֆոտո՝ Արսեն Սարգսյան / NEWS.am Sport