Հայկ Մարությանը երեք տարվա դադարից հետո վերադառնում է հեռուստաէկրաններ

ЛАЙФ 14 Сентябрь, 2016 11:57

Շուրջ երեք տարվա հեռուստատեսային դադարից հետո դերասան Հայկ Մարությանը՝ Կարգին Հայկոն, կրկին վերադառնում է հեռուստաէկրաններ: «Արմենիա TV»-ի նոր եթերաշրջանում Հայկը կներկայանա, ինչպես ինքն է ասում՝ դասական սիթքոմի շրջանակում.

«Եթե անկեղծ՝ նոր նախագծի մասին խոսել կդժվարանամ, քանի որ ամեն բան դեռ շատ խմորման փուլում է: Միայն մի բանն է հստակ՝ կլինի դասական սիթքոմ, որը ամբողջովին կհամապատասխանի սիթքոմի պահանջներին, եւ կլինեմ ես, իսկ թե ինչ այլ դերասաններ կմասնակցեն, հայտնի չէ»,- Life.panorama.am-ի հետ զրույցում նշեց Հայկն ու պատմեց նոր նախագծի ստեղծման մասին.

«Իրականում արդեն երեք տարի է, ինչ «Արմենիա TV»-ի հետ բանակցությունների մեջ ենք, պարզապես ոչ մի տարի չէինք գալիս ընդհանուր հայտարարի: Եվ ահա այս տարի, կարծես թե, համաձայնության եզրեր ենք գտել ու շուտով հեռուստադիտողը մեր համագործակցության ականատեսը կլինի: Նախագծի սցենարական գաղափարը մերն է, իսկ արդեն տեխնիկական իմաստով կկայանա մեր գլխավոր գործընկեր «Արմենիա TV»-ի օգնությամբ.,- hավելեց նա:

Հարցին, թե Հայկը կարոտե՞լ էր հեռուստատեսային աշխատանքին, պատասխանեց.

«Աշխատանքային ու հեռուստատեսային վազքի իմաստով, անկեղծ, չէի կարոտել, բայց այ հեռուստադիտողի հետ անընդհատ շփմանը, նրաց արձագանքներին ու ոգեւորությանը, ինչ խոսք, շատ էի կարոտել ու հենց դա էր հեռուստաէկրաններ վերադառնալուս գլխավոր պատճառը: Իրականում, հեռուստատեսային աշխատանքը հոգնեցուցիչ է, ֆիլմի նման չէ, որ երկու տարի աշխատես ու 1.5 ժամանոց շատ որակյալ արտադրանք տաս, այստեղ կարճ ժամանակում հնարավորինս որակյալ գործ պետք է անես, ինչը ահռելի մեծ էներգիա ու ժամանակ է խլում, բայց մենք հավատարիմ ենք մնալու մեր բարձր որակին»:

Ինչպես շատերը գիտեն՝ այս ընթացքում Հայկ Մարությանը պարբերաբար հանդես էր գալիս սոցիալական նախագծերով, փորձում իր օգնությունը ցուցաբերել հասարակության կարիքավոր շերտին: Մեր նկատառմանը, թե հեռուստատեսային ակտիվ աշխատանքային գործընթացում դերասանը կկարողանա՞ նույն ակտիվությամբ գործել նաեւ սոցիալական նախագծերում, Հայկը նկատեց.

«Հիմա էլ շարունակում ենք Արցախում ճանապարհ կառուցել ու հետագայում էլ յուրաքանչյուր հասարակական կարեւոր նշանակության աշխատանքներում միշտ մասնակից եմ լինելու: Իհարկե, համատեղելը դժվար է, սակայն իմ առողջության հաշվին ես պատրաստ եմ այդ ամենն անել հանուն իմ ժողովդրի: Այնպես որ, ոչ մի հեռուստատեսային նախագիծ կամ ֆիլմ դրան չի խոչընդոտի»:

Ի դեպ՝ Հայկ Մարությանը նկատեց նաեւ, որ ապրիլյան քառօրյա պատերազմից առաջ իր թիմն արդեն իսկ սկսել էր «Սուպեր մամա 2» ֆիլմի նախապատրաստական աշխատանքները, որոնք այդ դեպքերից հետո անմիջապս կանգնեցվել են.

««Սուպեր մամա 2» ֆիլմի համար սցենարական ու դերասանական բոլոր աշխատանքները պարզ են, հստակեցված ու ըստ մեր պլանների՝ այն պետք է նկարահանվեր այս տարի, սակայն ապրիլյան դեպքերից հետո ֆիլմի աշխատանքները անմիջապես կանգնեցրինք, քանի որ ավելի կարեւոր գործերով էի զբաղված: Եթե մեր երկրում խաղաղություն լինի, պլանավորում ենք 2017-ին նկարահանել «Սուպեր մամա 2>>-ը»,- ընդգծեց նա:

Հեղինակ՝ Անուշիկ Մելքոնյան