Ուսումնական տարվա մեկնարկի կապակցությամբ ոստիկանությունը մեկ ամիս կաշխատի արտակարգ ռեժիմով

Ուսումնական տարվա մեկնարկի կապակցությամբ նախապատրաստական աշխատանքների շրջանակներում ՀՀ ճանապարհային ոստիկանությունն օգոստոսի 1-ից  հանդիպումներ է կազմակերպել բազմաթիվ դպրոցների տնօրենների հետ: Սեպտեմբերի 1-ից սկսած՝ մեկ ամսվա ընթացքում ոստիկանությունն աշխատելու է արտակարգ ռեժիմով դպրոց հաճախող երեխաների անվտանգ երթևեկությունն  ապահովելու համար: Օգոստոսի 30-ին լրագրողների հետ հանդիպմանն այս մասին ասաց ՀՀ ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը: «Այցելել ենք բոլոր այն դպրոցները, որոնք ճանապարհամերձ են, գտնվում են փողոցների վրա: Դպրոցների տնօրենների և մանկավարժական կոլեկտիվների առաջարկները քննարկելով և հաշվի առնելով՝ դպրոցների մոտակայքում նոր գծանշումներ են արվել: Բազմաթիվ դպրոցների մոտակայքում, եթե անհրաժեշտություն է եղել, թարմացվել են և ճանապարհային նշանները և նոր նշաններ են տեղադրվել»,- ասաց նա:

Նորիկ Սարգսյանը հավելեց, որ սեպտեմբերի 1-ից հանրապետության բոլոր այն դպրոցների մոտ, որոնք գտնվում են փողոցների վրա, պարեկություն են անելու ոստիկանության կարգախմբեր: «Այդ կարգախմբերում ընդգրկված են լինելու և ճանապարհային ոստիկաններ, և համայնքային ոստիկանության ծառայողներ և պարեկապահակետային ծառայության ոստիկաններ: Նրանք կցված են լինելու կոնկրետ դպրոցների և ողջ ամսվա ընթացքում չեն փոխարինվելու, որպեսզի յուրաքանչյուր ծառայող լավ տիրապետի տվյալ տեղանքին և կարողանա նորմալ կազմակերպել իր աշխատանքը: Ոստիկանության կողմից ամեն Õ �նչ արվելու է երեխաների տուն-դպրոց-տուն ճանապարհն անվտանգ դարձնելու համար»,- նշեց Սարգսյանը:

Միևնույն ժամանակ, Նորիկ Սարգսյանը նկատեց, որ ամեն ինչ միայն ոստիկաններից չի կախված: «Այստեղ անելիք ունեն նաև երեխաները, նրանց ծնողները, լրատվամիջոցները: Պետք է լուրջ քարոզչական աշխատանք տարվի երեխաների և ընդհանրապես հասարակության շրջանում, որպեսզի կարողանանք միասին, համատեղ ջանքերով միամսյակն ամփոփել բոլորի համար ցանկալի արդյունքով: Իսկ ցանկալի արդյունքը կլինի այն, որ մենք մեկ ամիս հետո ասենք, որ ոչ մի երեխա տուն-դպրոց-տուն ճանապարհին վրաերթի չի ենթարկվել կամ որևէ պատահարի մասնակից չի դարձել: Դրա համար ես երեխաներին կոչ եմ ան ում ճանապարհը կտրել անցնել միայն սահմանված վայրերով, հետևել լուսացույցի ազդանշանին, չխաղալ ճանապարհների վրա, հեծանիվ չվարել ճանապարհներին»,- ընդգծեց ճանապարհային ոստիկանության ճանապարհապարեկային ծառայության բաժնի պետը:

Նորիկ Սարգսյանը կոչով դիմեց նաև մանկավարժներին և վարորդներին. «Քանի որ երեխաներն ամառային արձակուրդների ժամանակ արդեն իսկ վարժվել են ազատ ռեժիմով գործելուն՝ ճանապարհը կտրել անցել են այն վայրերով, որտեղով ցանկացել են, խաղացել են այնտեղ, ուր ուզել են, մանկավարժներին կոչ եմ անում առաջին իսկ օրվանից նրանց հետ աշխատանք տանել և երեխաների մեջ սերմանել ճանապարհային երթևեկության կանոնները պահպանելու կուլտուրան: Ես նաև մեր վարորդներին կոչ եմ անում հատկապես այս օրերին լինել զգոն՝ հատկապես դպրոցամերձ փողոցներով անցնելիս: Նաև կոչ եմ ան ում այն վարորդներին, ովքեր իրենց երեխաներին անձնական տրանսպորտային միջոցներով են դպրոց բերում, երեխային իջեցնելուց հետո պարտադիր ազատել երթևեկելի բանուկ մասը, հակառակ դեպքում գործ կունենան ճանապարհային ոստիկանների հետ: Դպրոցամերձ ճանապարհներին տեղադրված՝ 40 կմ/ժամ թույլատրելի արագություն սահմանող նշաններն այսօրվանից սկսելու են գործել, և արագաչափ սարքերն աշխատելու են այդ 40 կմ/ժամ առավելագույն արագության ռեժիմով: Ամառային արձակուրդների ժամանակ այդ ճանապարհներին թույլատրելի է եղել 60 կմ/ժամ առավելագույն արագություն, իսկ այսօրվանից արդեն՝ 40 կմ/ժամ»: