«Ժիրինովսկու ցնդաբանական հոխորտանքը չպետք է արժեւորվի որեւէ մեկի կողմից». Ամո Շարոյան

«Միդիա-Շանգալ» եզդիների ազգային միավորում ՀԿ խորհրդի նախագահ Ամո Շարոյանը ՌԴ լիբերալ-դեմոկրատական կուսակցության առաջնորդ Վլադիմիր Ժիրինովսկու՝ ռուսական հեռուսատալիքներից մեկին տրված իր հայտնի հարցազրույցում Հայաստանը վիրավորող արտահայտությանն ի պատասխան հետեւյալ հայտարարությամբ է հանդես եկել:

Հայտարարությունը մեջբերում ենք ամբողջությամբ.

«Ես հավատում եմ մարդկանց եւ մեր ժողովուրդներին: Մենք ձեւավորվում ենք մեր մտքերից: Մենք դառնում ենք այն, ինչ մտածում ենք: Լսելով Վլադիմիր Ժիրինովսկու հայտարարությունը, որ «թքեց» մեր եւ մեր երկրի վրա, մտածում էի, որ նա լուրջ մարդ չէ եւ նրա նմաններին չարժե պատասխանել, մանավանդ առջեւում ՌԴ Պետդումայի ընտրություններն են՝ ընկած վարկանիշի բարձրացման, ընտրողներին գրավելու հարցեր կան, սակայն ոչ մի կերպ այդ «ցավը» չէի կարողանում մոռանալ, մանավանդ, որ այսօր աշխարհում տիրող բարդ իրավիճակում տարբեր մարտահրավերներ կան: Երբ մեր կյանքի ամեն օրը լի է տարբեր արյունահեղություններով, պատերազմներով եւ նույնիսկ ցեղասպանություններով: Մանավանդ, որ այդ «անլուրջ» մարդը Ռուսաստանի նման պետության լիբերալ-դեմոկրատական կուսակցության առաջնորդն է, որը ժամանակին բազմիցս սպառնացել է Թուրքիային՝ հայկական եւ քրդական զորամիավորումներով եւ պետությունների ստեղծմամբ: Բայց երեւում է, որ Ժիրինովսկին հայտնվել է քաղաքական կյանքի լուսանցքի վերջում՝ եկել է նրան դեն նետելու ժամանակը, որի համար նա ինչ-որ բան պետք է անի…

Մենք քաջ գիտենք Ժիրինովսկու ով լինելը, ուղղակի ցավալի է, որ այն կարող է ուշադրության արժանանալ: Չէ՞ որ նա կուսակցության լիդեր է , Պետդումայի պատգամավոր: Հայաստանը թեկուզ քարե երկիր է, այն հայ ժողովրդի բնօրրանն է: Հայերն այնտեղ ո´չ եկվոր են, ո´չ էլ անցվոր: Հայ հինավուրց ժողովուրդը եղել է, կա եւ կլինի: Հայ ժողովուրդը կլինի հավերժ ապրելու եւ արարելու համար: Մնում է, որ Ժիրինովսկու ցնդաբանական հոխորտանքը չդառնա արժեք եւ չարժեւորվի որեւէ մեկի կողմից: Հավատացած եմ, որ Ռուսաստանի եւ Հայաստանի քաղաքական եւ դիվանագիտական հարաբերությունները կորոշեն այդ պետությունների ժողովուրդները եւ ոչ թե Ժիրինովսկու նման ցնդաբանները:

Հայ-ռուս ժողովուրդների բարեկամության վրա երբեք չի անդրադառնա Ժիրինովսկու նման «ժուլիկների» խոսքը: Բայց վիրավորանքը լուրջ եմ ընդունում եւ հանուն հայ եւ ռուս ժողովուրդների դարավոր բարեկամության եւ եղբայրության մենք բոլորս պետք է արձագանք ենք եւ իր տեղը դնենք Ժիրինովսկու նմաններին, քանզի այդ է պահանջում մեր երկրների բարեկամական եւ ռազմավարական հարաբերությունների առողջ տրամաբանությունը: «Հարգելի'» Ժիրինովսկի, անգամ իմաստունը կարող է հիմարանալ, եթե չկատարելագործվի»: