Դատարանն «ապացույցներն անթույլատրելի ճանաչելու» միջնորդության վերաբերյալ դիրքորոշում կհայտնի հաջորդ դատական նիստին

Դատարանը Գյումրիում Ավետիսյանների ընտանիքի անդամների սպանության գործով մեղադրվող Վալերի Պերմյակովի գործով «ապացույցներն անթույլատրելի ճանաչելու» մասով միջնորդության վերաբերյալ դիրքորոշում կհայտնի հաջորդ դատական նիստին: 

Օգոստոսի 5-ին կայացած դատական նիստի ժամանակ տուժողների իրավահաջորդների շահերի պաշտպան Արթուր Սաքունցը հանդես եկավ ռուսական կողմի հարուցած գործով ի հայտ եկած ապացույցներն անթույլատրելի ճանաչելու միջնորդությամբ՝ նշելով, որ ռուսական և հայկական կողմի գործերը բոլորովին տարբեր գործեր են և պետք չէ այդ գործերն իրար խառնել: Մինչ դատարանը մեկ շաբաթ հետո կհայտնի իր դիրքորոշումը` այս միջնորդությունն ընդունել, թե չընդունելու վերաբերյալ, Ավետիսյանների իրավահաջորդների շահերի մյուս պաշտպանները և դատախազը դեմ արտահայտվեցին այս միջնորդությանÕ ¨:

«Այս միջնորդությունն ակնհայտ անհիմն է: Այն բոլոր ապացույցները, որոնք ձեռք են բերվել ռուսական կողմի գործով կատարված քննության արդյունքում, ձեռք են բերվել օրենքի պահպանմամբ և որևէ կերպ քրեական դատավարության օրենքի խախտմամբ ձեռք չեն բերվել, որպեսզի ճանաչվեն անթույլատրելի, ընդհակառակը, նախաքննության ընթացքում տուժողի իրավահաջորդները պայքարում էին, որպեսզի այն բոլոր ապացույցները, որոնք էական էին և գտնվում էին ռուսական կողմում միացվեն հայկական կողմի քրեական  գործին, որովհետև այդ ապացույցների շարքում են ամենակարևոր ապացույցներ՝ Պերմյակովի մի շարք հարցաքննությունները, դեպքի վայրից տարված բջջային հեռախոսները, հագուստ և այլն, որոնք ակնհայտորեն հիմնավորում են, որ Պերմյակովը եղել է այդ տանը: Բացի դրանից, կան նաև այլ մեղադրանքներ, բացի սպանությունից, որոնք ևս հիմնավորվում են այդ ապացույցներով, որոնք ձեռք են բերվել ռուսական կողմով, բացի դա, առաջին օրերին հայկական կողմը հնարավորություն չի ունեցել Պերմյակովի հետ կատարելու քննչական գործողություններ, իսկ ռուսական կողմը կատարել է և դրա արդյունքում նմուշներ են ձեռք բերվել Պերմյակովից, որոնք հետագայում օգտագործվել են և կան փորձաքննական եզրակացություններ, որոնք էկան ապացույցներ են այս գործի համար և գտնում եմ, որ դրանք լուրջ ապացուցողական նշանակություն ունեն այս գործում և ես՝ որպես տուժողների իրավահաջորդների ներկայացուցիչ, ամեն կերպ պայքարելու եմ, որ այդ ապացույցները թույլատրելի լինեն և դրվեն Պերմյակովի մեղադրանքի հիմքում՝ քանի որ ձեռք են բերվել օրենքի պահպանմամբ»,- նշեց Ավետիսյանների իրավահաջորդների շահերի պաշտպան Լուսինե Սահակյանը:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան ժամը 06:00-ի սահմաններում  նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն,  այնուհետեւ` յոթ օր հետո մահացել: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու եւ ավելի անձանց սպանությունը): ՀՀ քննչական կոմիտեի քննիչները Վալերի Պերմյակովին  մեղադրանք են առաջադրել ՀՀ ՔՕ 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը:

 

Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրման համար օգոստոսի 12-ին դատապարտվել է 10 տարվա ազատազրկման: