Կառավարությունը մեկուկես ամսվա ընթացքում պետք է 3600 եվրո վճարի «Դոմազյանն ընդդեմ Հայաստանի» գործով

Վաղը կայանալիք կառավարության նիստի օրակարգ է ներառված պահուստային ֆոնդից երեք հազար 600 եվրո արդարադատության նախարարությանը հատկացնելու որոշման նախագիծը՝ քաղաքացի Թամարա Դոմազյանին վճարելու նապատակով: Այս մասին դեռեւս փետրվարի 25-ին որոշում էր կայացրել Մարդու իրավունքների եվրոպական դատարանը՝ «Դոմազյանն ընդդեմ Հայաստանի» գործի շրջանակներում:

Ինչպես տեղեկանում ենք կառավարության նիստի օրակարգից՝ ՄԻԵԴ-ի վճռի պահանջները կատարելու նպատակով 2016թ. պետական բյուջեով նախատեսված կառավարության պահուստային ֆոնդի հաշվին արդարադատության նախարարությանը կհատկացվի երեք հազար վեց հարյուր եվրոյին համարժեք դրամ՝ վճռով սահմանված արդարացի հատուցման համար: Նշենք, որ կառավարության պահուստային ֆոնդից արդարադատության նախարարությանը գումար հատկացնելու համար սահմանվել է «Կառավարման մարմինների գործունեության հետեւանքով առաջացած վնասվածքների կամ վնասների վերականգնում» հոդվածը:

Ըստ ՄԻԵԴ-ի փետրվարի 25-ի վճռի՝ սահմանված հատուցման գումարի վճարման վերջնաժամկետը 2016թ. օգոստոսի 25-ն է: Եվ ինչպես այս որոշմանն առընչվող նախագծի մեջ է գրված՝ արդարադատության նախարարությանը գումար հատկացնելու կառավարության որոշումն ընդունելու անհրաժեշտությունը պայմանավորված է Մարդու իրավունքների եվրոպական դատարանի վճիռներն անվերապահորեն կատարելու` Հայաստանի կողմից Եվրոպայի խորհրդի առջեւ ստանձնած պարտավորության կատարման հրամայականով:

«Դոմազյանն ընդդեմ Հայաստանի» գործը Եվրոպական դատարանում է դեռեւս 2007թ-ից: Թամարա Դոմազյանը պնդել էր, որ ինքը զրկվել է դատարանի մատչելիության իրավունքից այն քաղաքացիական վարույթի շրջանակներում, որում ինքը ներգրավված էր, քանի որ փաստաբանի կեղմից իր անունից ներկայացված հակընդդեմ հայցը անհիմն կերպով մերժում էր ստացել:

Ինչպես տեղեկանում ենք գործի նյութերից՝ վերջինս Երեւանում առանց թույլտվության ավտոտնակ էր կառուցել: 2005թ. հուլիսի 22-ին Երեւանի քաղաքապետի որոշմամբ շինության նկատամամբ ճանաչվել էր Թամարա Դոմազյանի սեփականության իրավունքը: Նույն թվականի օգոստոսի 26-ին Երեւանի քաղաքապետի եւ Թամարա Դոմազյանի միջեւ կնքվել էր վարձակալության պայմանագիր:

Բայց պարզվել է, որ Երեւանի քաղաքապետը 2006թ-ի հունիսի 19-ին մեկ այլ որոշում է կայացրել, որով անվավեր է ճանաչել նախորդ որոշումը եւ Թամարա Դոմազյանի դեմ հայց է ներկայացրել դատարան՝ նրան սեփականության վկայականից եւ վարձակալության իրավունքից զրկելու նպատակով: Դատարանը բավարարել էր քաղաքապետի հայցը եւ Թամարա Դոմազյանն էլ այդ ժամանակ լիազորել էր իր փաստաբանին՝ ներկայացնելու քաղաքապետի 2006 թ. հունիսի որոշումն անվավեր համարելու հակընդդեմ հայց:

2006թ. նոյեմբերի 1-ին առաջին ատյանի դատարանի որոշմամբ չի ընդունվել Թամարա Դոմազյանի լիազոր ներկայացուցչի ներկայացրած հակընդդեմ հայցը: Սրան հաջորդել է քաղաքապետի ներկայացրած հայցի բավարարման դեմ փաստաբանի մեկ այլ գանգատ՝ արդեն Վերաքննիչ դատարան, որը սակայն մնացել է առանց քննության՝ պատճառաբանվելով, որ ընդհանուր իրավասության առաջին ատյանի դատարանի բողոքարկումը չի կատարվել պատշաճ ժամկետներում։

Քրիստինա Տեր-Մաթեւոսյան