Խորհրդարանը քննարկում է Վերահսկիչ պալատի 2015թ. տարեկան հաշվետվությունը

ОБЩЕСТВО 17 Май, 2016 16:58

Ազգային ժողովը քննարկում է ՀՀ Վերահսկիչ պալատի 2015թ. տարեկան հաշվետվությունը: Հիմնական զեկուցող, ՀՀ Վերահսկիչ պալատի նախագահ Իշխան Զաքարյանը, պատգամավորներին ներկայացնելով հաշվետվությունը, ընդգծեց, որ 2015թ. հաշվետվությունը կազմելիս՝ իրենք չեն փորձել 23 ընթացիկ հաշվետվությունների ամբողջ նյութերը ներառել, այլ փորձել են ներկայացնել կարևոր խ նդիրները: «Շուրջ 23 արձանագրություններով մենք ունենք 7 ոլորտում կատարած ուսումնասիրություններ, որոնք կփորձեմ համառոտ ներկայացնել: Խոսքը սոցիալական, գյուղատնտեսական, առողջապահության, էներգետիկայի, ջրային տնտեսության, դատաիրավական, վարկային դրամաշնորհային միջոցների ոլորտների մասին է»,- «Արմենպրես»-ի հաղորդմամբ՝ նշեց Զաքարյանը:

Նա նշեց, որ սոցիալական ոլորտում ՀՀ Վերահսկիչ պալատը մի քանի տարի է՝ ուսումնասիրություններ է կատարում: «Այսինքն, մենք ոլորտը համարել ենք ռիսկային: Այս տարի ևս այս ոլորտում շարունակում ենք ստուգումները: Այդ ստուգումների արդյունքում Արագածոտնի և Կոտայքի մարզերում հայտնաբերել ենք 571 խախտումներ, որոնք գումարային տեսքով կազմում են մոտավորապես 105 միիոն 599 հազար դրամ: Ստուգողների հետ քննարկումների արդյունքում մեր տվյալները հաստատվել են: Կառավարությունը մինչ այս քննարկումն արդեն իսկ արձագանքել է այս բացահայտումներին, զբաղեցրած պաշտ ոններից հեռացվել են գրասենյակների ղեկավարներ, հարուցված են քրեական գործեր, իսկ գումարներն ամբողջությամբ վերականգնված են կամ կա ժամանակացույց դրանք վերականգնելու ուղղությամբ»,- մանրամասնեց Զաքարյանը:

Գյուղատնտեսության ոլորտում Վերահսկիչ պալատը մշտական հսկողության տակ է պահել երկու ծրագիր: «Խոսքը «Շուկայական հնարավորություններ ֆերմերներին և ներդրումներ» և «Աջակցություն պտղի, ընկուզենի արտադրությանը. հայկական միրգ» ծրագրերի մասին է: Մեր ուսումնասիրությունները ցույց են տվել, որ այս վերջին ծրագիրն իրականացնող ընկերությունը դադարեցրել է գործունեությունը, և ընթանում են աշխատանքներ ծրագրի իրականացման համար հատկացված 2.5 միլիոն դոլարին համարժեք գումարն այլ բաղադրիչներով ու ոլորտի այլ խնդիրների համար ներգրավելու ուղությամբ: «Շուկայական հնարավորություններ ֆերմերներին և ներդրումներ» ծրագրի հեղինակների հետ քննարկման արդյունքները ցույց են տվել, որ 10 ընկերություններից մեկը, որոնք ստացել են վարկային միջոցներ, դադարեցրել է գործունեությունը և նրան հատկացված 200 միլիոն դրամը վերադարձվել է պետական բյուջե: Մնացած 4 ընկերություններն էլ համարվել են անհույս ընկերություններ: Նրանց տրամադրված գումարները փորձ է արվում հետ վերադարձնել դատական կարգով»,- ասաց Իշխան Զաքարյանը:

Անդրադառնալով առողջապահության ոլորտում կատարված ուսումնասիրություններին՝ հաշվետու տարում Վերահսկիչ պալատն ընտրանքային կարգով ստուգել է ՀՀ ներմուծվող դեղերի գների և ներմուծման օրինականությանն ու արդյունավետությանը վերաբերվող հարցեր: Նախորդ տարիներին ՀՀ-ում դեղերի շրջանառության ոլորտում Վերահսկիչ պալատի կողմից իրականացված վերահսկողության արդյունքում ներկայացվել էին մի շարք առաջարկություններ, որոնց մեծ մասն ընդունվել է ՀՀ կառավարության կողմից: Արդյունքում, որակյալ«ՙԻնսուլին» և «Գլիկլազիդ» դեղերով բնակչության կաիքների բավարարման նպատակով հատկացվող բյուջետային ծախսերն էապես նվազեցվել են, քանի որ նշված դեղերը գնվում են անմիջապես արտադրողից` ավելի էժան գնով:

Այնուամենայնիվ, դեռևս լուծված չէ «Գլիմեպիրիդ» և «Մեթֆորմին» շաքարային դիաբետի դեղերի անմիջապես արտադրողից ուղղակի եղանակով գնման հարցը: Այդ կապակցությամբ ՀՀ առողջապահության նախարարությունը պարզաբանել է, որ ներկա պահին բանակցություններ են ընթանում «Գլիմեպիրիդ/մետֆորմին» և «Մետֆորմին հիդրոքլորիդ» դեղերը եվրոպական արտադրողից ուղղակի եղանակով ձեռք բերելու նպատակով:

Զաքարյանը ներկայացրեց նաև մյուս ոլորտներում Վերահսկիչ պալատի իրականացրած ուսումնասիրությունների արդյունքները: Այս պահին Իշխան Զաքարյանը պատասխանում է պատգամավորների հարցերին: