Ինչպես և ինչու ժպտա Հրազդանը

Հրազդանում քաղաքապետի ընտրությունների քարոզարշավը թևակոխում է նոր փուլ, որտեղ իշխանությունները հերթական սադրանքների միջոցով փորձում են խափանել գործընթացը և իրենց թեկնածուին անցկացնելու համար ապահովել բոլոր անհրաժեշտ պայմանները ու վերացնել առկա խոչընդոտները՝ ի դեմս Սասուն Միքայելյանի և նրա թիմակիցների:

Իհարկե, Հրազդանի քաղաքապետի ընտրություններն «աշխարհի փրկման» գործընթաց չի կարելի համարել ո´չ ՔՊ կուսակցության, ո´չ էլ նույն Սասուն Միքայելյանի համար, սակայն դա ինձ հետ չի պահում անել հնարավոր ամեն բան ընդդիմադիր թեկնածուի հաղթանակի համար՝ մի կողմից որպես ՔՊ անդամ, մյուս կողմից՝ որպես ՀՀ քաղաքացի:

Մանրամասնեմ, ակնհայտ է, որ իշխանությունների նյարդերը տեղի են տվել, քանի որ նրանք, ի դեմս ՔՊ-ի, տեսնում են մրցունակ (չնայած ունենալով սակավ ռեսուրսներ, սակայն մի քանի տասնյակ հավատարիմ ու նվիրված մարդիկ), պատրաստված և հաղթանակի ձգտող ուժի, ինչն արդեն իսկ համակարգի համար անընդունելի է. նման կառույցի ուժեղացումն ու իր հավակնությունները, այն է՝ հաղթել համակարգի կանոններից դուրս և իշխանության մշտական «ինչքան ուզենք, էնքան կխփենք կամ մեր դեմը խաղ չկա» գործող ստատուս քվոյի չխախտումը: Այս երկու հանգամանքն ամբողջությամբ բավարար է, որպեսզի իշխանությունը կիրառի իր բոլոր մեթոդները հակառակորդ կողմին թույլ չտալու համար հասնել վերոգրյալ նպատակին, այստեղից առաջանում է հաջորդ խնդիրը, այն է, թե ինչպես դիրքավորվել և ինչ ռազմավարական կոմբինացիաներ մշակել դիմակայելու համար:

Բոլորին հայտնի է ՔՊ հիմնական մոտեցումներն ընտրատեղամասերում վերահսկողություն իրականացնելու հարցում, սակայն կան նաև ընտրատեղամասից դուրս աշխատանքների հստակ բաժանման և իրականացման խնդիրներ: Այդ հարցում կան լուրջ անելիքներ: Հրազդանում, լինելով միջին չափի քաղաք, որտեղ մարդիկ իրար ճանաչում են, հարկավոր է վերահսկել ցուցակներում մահացած կամ արտերկրում գտնվող մարդկանց չընդգրկվելու հարցը, իրականացնել սեփական մոնիթորինգը՝ շենք առ շենք՝ հասկանալու մասնակցության մոտավոր տոկոսը և տրամադրությունները, այսինքն՝ ստեղծել այնպիսի իրավիճակ, որտեղ որոշ չափով պարզ կլինի ընտրության ելքը: Շարքային հրազդանցին պետք է հասկանա, որ խնդիրն այստեղ Սասուն Միքայելյան-Արամ Դանիելյան ընտրության հարց չէ այստեղ կատարելու է գործող համակարգի և փոփոխություն առաջարկող, նոր մշակույթի հաստատման սկիզբը դնող ընտրություն, քանի որ Սասունը բազմիցս հայտարարել է, որ երիտասարդությունը պետք է կազմի քաղաքապետարանի մեծ մասը: Սասուն Միքայելյանը, լինելով զինվոր, զինվորական մտածողություն ունենալով, փորձում է դուրս գալ ֆիդայու կերպարից և լուրջ հայտ է ներկայացնում երիտասարդության առաջնորդը լինելու համար, գոնե Հրազդան քաղաքում:

Ինձ՝ որպես Հայաստանի քաղաքացու, ընտրության ամբողջ գործընթացին մասնակցելու մոտիվացիան հստակ է ոչ միայն որպես ՔՊ անդամ, այլ որպես զարկ տեղական կառավարման մարմնի ընտրությանը ներգրավվելու և քաղաքային/գյուղական կառավարման մարմիններում փոքր հաղթանակների ունենալու փորձ, ինչպես նաև այդ ընտրությունն արժևորելու հարցում դերակատարում ունենալն է: «Քաղաքացիական պայմանագիր» կուսակցության համար այս ընտրությունները մի քանի առումով վճռական են լինելու, նախ՝ հաղթանակի դեպքում ՔՊ-ն կապացուցի իր կողմից առաջ քաշված ընտրություն հաղթելու մեխանիզմի ճշմարտացիությունը, իսկ բացասական ելքի պարագայում կարող է վերանայել բացերն ու մշակել նոր ռազմավարություն:

Մեկ անգամ ևս կրկնեմ, որ Հրազդանի ընտրություններն աշխարհի փրկման առաքելություն չեն, սակայն շատ կարևոր է. վերջին տարիների ընթացքում սա առաջին դեպքն է, երբ գործող հանրապետական թեկնածուին հաղթելու հայտ է ներկայացնում հեղինակություն ունեցող ընդիմադիր թեկնածուն՝ բավականին ուժեղ թիմով, և պատահական չէ, որ այդ գործընթացի կառավարումը վստահվել է ԱԺ պատգամավոր, ՔՊ վարչության անդամ Նիկոլ Փաշինյանին, ով, վայելելով մեծ հեղինակություն հասարակության շրջանում, նշանակվել է Սասուն Միքայելյանի շտաբի պետ:

Իշխանության գալու բանալին, ըստ իս, ոչ միայն համապետական ընտրություններում հաղթանակի ապահովումն է, այլև փոքր գյուղական և այլ համայնքներում հաղթանակելը, քանի որ, ինչպես ցույց է տալիս փորձը, հիմնականում հենց այդ համայնքներում են իշխանության օգտին «թվեր խփվում»` չունենալով ընդիմության վերահսկողություն: Հայաստանի ողջ պատմության ընթացքում ընդդիմությունը մշտապես հեռու է մնացել տեղական ինքնակառավարման մարմիններում ներկայացված լինելուց և պատրաստվել է միայն համապետական ընտրություններին, սակայն թե´ ՔՊ դիրքորոշումը, թե´ իմ անձնական կարծիքն այն է, որ չպետք է բաց թողնել քաղաքային և գյուղական կառավարմանը ներգրավվելու հնարավորությունը:

Ինչևէ, ապրիլի 17-ին մնացել են հաշվված օրեր, ժամանակն աշխատում է հօգուտ ջանքեր գործադրողի ու իրական փոփոխության ու նոր արժեհամակարգ ստեղծողի օգտին, իսկ քննության նախապատրաստումը մնում է առաջնային օրակարգում, և թիմային աշխատանքի, դրական մթնոլորտի պայմաններում վստահաբար կժպտա Հրազդանը:

Արմեն Փամբուխչյան