Երջանիկ ընտանիքի հիմքում ընկած է լավ հայ կին ունենալը. Սևակ Ամրոյանը՝ նոր տեսահոլովակի մասին

Life.panorama.am-ը գրում է.

Այսօր՝ մարտի 17-ին, կկայանա Սեւակ Ամրոյանի «Մի մոռանա քո ազգին» տեսահոլովակի պրեմիերան: Life.panorama.am-ին երգիչը հայտնել է, որ այս երգն ու տեսահոլովակը բովանդակությունից ելնելով՝ իր համար յուրահատուկ նշանակություն ունի եւ յուրօրինակ կոչ է արտահայտում.

«Նոր երգս ինձ համար շատ թանկ նվեր է ամերիկահայ երգահան, երգիչ Լեւոն Գաթրջյանի կողմից, որն ունեի դեռ մեկ տարի առաջ: Անկեղծ ասած՝ սկզբում չէի մտածում այս երգի հիման վրա տեսահոլովակ նկարահանել, սակայն աշխատանքի բնույթից ելնելով հաճախ շրջելով արտերկրում՝ հասկացա, որ այս երգս պետք է տարածում գտնի, քանի որ դրա նշանակությունը մեր օրերում խիստ կարեւոր է: Երգի հիմքում ընկած է հայրենասիրությունն ու սերը, այն յուրօրինակ կոչ է պարունակում իր մեջ՝ սիրել ու ընտանիք կազմել հայի, այլ ոչ թե օտարերկրացու հետ»,- նշեց երգիչն ու ավելացրեց.

«Ես մի փոքր մտավախություն ունեմ, չգիտեմ՝ այդ հորդորն ինչքանո՞վ կընդունվի, ինչքանով ոչ, ինքս էլ հասկանում եմ, որ սրտին չես հրամայի եւ սերը ազգութուն չի ճանաչում, բայց իմ այս քայլը միտված է հայապահպանությանը եւ տարիների ընթացքում օտար ազգերին չձուլվելուն: Երբ ընտանիքի մայրը հայ չէ, ինքնըստինքյան դաստիրակությունն էլ հայկական չի լինում, իսկ տարիների ընթացքում սերնդափոխության ժամանակ հայերենն այլեւս գործածությունից դուրս է մնում այդ ընտանիքներում: Նման իրավիճակներ շատ եմ տեսել, երբ շրջագայել եմ ու իսկապես ցավ եմ ապրել, որ հայկական արմատներով երեխաները հայերեն ոչ մի բառ չգիտեն»:

«Տեսահոլովակի ռեժիսորը շատ տաղանդավոր Մարիամ Գեւորգյանն է, ում հետ շատ լավ ընկերներ ենք: Նկարահանումները տեւել են երկու օր՝ Գառնիում եւ Սեւանում: Տեսահոլովակս ունի հերոսուհի, բայց որպես այդպիսին տեսահոլովակում սյուժե չկա, այստեղ շեշտը դրել ենք մինիմալիստական լուծումների վրա: Երգի հիմքում ընկած է Ախթամարի, լույս ունեցող աղջկա գաղափարը, ում էլ ձգտում է հայ տղան. Հուսամ՝ իմ հանդիսատեսը կհավանի նոր աշխատանքս, քանի որ շատ զգացմունքային տեսահոլովակ է ստացվել»,- նկատեց Սեւակ Ամրոյանը:

Մեր այն հարցին, թե երգիչը երբեւէ չի ՞վախեցել, որ կսիրահարվի ազգությամբ ոչ հայ աղջկա, Սեւակը ժպիտով պատասխանեց.

«Ես ոչինչ չեմ բացառում, երջանկություն եմ մաղթում բոլոր նրանց, ովքեր սիրել ու ամուսնացել են օտարազգի աղջիկների հետ. հուսամ երգիս կոչը ճիշտ կհասկանան մարդիկ, քանի որ այն ոչ թե վերջնագիր է, այլ մեր ցանկությունը: Ես շատ կցանկանամ ընտանիք կազմել հայուհու հետ, որպեսզի իմ երեխաներին հայ մայր դաստիարակի, բայց միեւնույն ժամանակ գիտեմ, որ «Երբեք մի ասա երբեք» հայտնի արտահայտությունը երբեմն իր գործն անում է: Այնուամենայնիվ՝ ինձ ու բոլորին խորհուրդ եմ տալիս, որ ուշադրություն դարձնենք մեր հայուհիներին, նրանք ամենագեղեցիկն են եւ ամենասիրելին կարող են դառնալ մեր կողմից: Երջանիկ ընտանիքի հիմքում ընկած է լավ կին ունենալը, բայց ես կավելացնեմ՝ լավ հայ կին ունենալը»:

Հեղինակ՝ Անուշիկ Մելքոնյան