Քաղաքականությամբ զբաղվելը դա մեծ պատասխանատվություն է ողջ ազգի և պետականության, պետության նկատմամբ. Մհեր Ավետիսյան

Քաղաքականությամբ զբաղվող մարդիկ կամ իրենց քաղաքական գործիչ համարողները վերջապես պետք է հասկանան, որ իրենց ամենակարևոր, կարելի է ասել՝ միակ անելիքը սեփական պետության անվտանգության խնդիրը լուծելն է։ Իսկ դա նշանակում է, որ այդ մարդիկ պետք է ունենան ունակություն, կարողություն, քաղաքական ինտելեկտ, վերլուծելու ունակություններ, որպեսզի կարողանան գտնել սեփական պետության շահերը։

Ի՞նչ ասել է Հայաստանի պետական շահ։ Որպեսզի հետո կարողանան հասկանալ՝ Հայաստանի իրենց գտած շահերը ո՞ր պետությունների հետ են համընկնում, ո՞ր պետությունների հետ՝ ոչ, որովհետև մեր քաղաքական գործիչները պետք է հասկանան, որ եթե իրենք սխալ գտնեն Հայաստանի պետական շահերը, հետևաբար նաև սխալ են գտնելու այն պետություններին, որոնց հետ համընկնում են մեր պետության շահերը, և արդյունքում վտանգելու են մեր պետականությունն ու մեր ժողովրդին։

Մեծ հաշվով, քաղաքականությամբ զբաղվել ցանկացող մարդիկ պետք է ունենան ներքին բարոյական կոդեքսներ, պատասխանատվության ընկալում և գիտակցեն, որ իրենց սխալների արդյունքում սեփական ժողովուրդն ու պետությունը կարող են վճարել, և առհասարակ այդպես էլ լինում է․ վճարում են շատ թանկ գին։

Եվ մարդիկ, ովքեր քաղաքականությամբ են զբաղվում, պետք է այնքան բարոյականություն և պատասխանատվություն ունենան, որ հասկանան, որ քաղաքականությամբ զբաղվելը միայն խոսելով, իրար վիրավորելով, քննադատելով, պետության հաշվին ֆռֆռալով, պետական պաշտոնը վայելելով կամ քննադատական խոսքով հանդես գալով չէ։ Քաղաքականությամբ զբաղվելը դա մեծ պատասխանատվություն է ողջ ազգի և պետականության, պետության նկատմամբ։

Իսկ թե ինչով են զբաղված մեր քաղաքական գործիչների ճնշող մեծամասնությունը, մենք տեսնում ենք նրանց խոսքը, նրանց գործունեությունը, նրանց պատասխանատվության ընկալումը, և ցավոք սրտի, նրանցից շատ-շատերը, եթե չասենք՝ նրանց ճնշող մեծամասնությունը, չեն գիտակցում, որ իրենց կարևորագույն աշխատանքը, իսկ իմ կարծիքով՝ իրենց միակ աշխատանքը, մեր պետության և ժողովրդի անվտանգության խնդրի լուծումն է, մեր պետության շահերը ձևակերպելը։