Ֆրանսիայում անոմալ տապը սպառնում է Շամպայնի, Բորդոյի և Բուրգունդիայի խաղողի բերքին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ֆրանսիայում ամառային հյուծիչ տապը դանդաղեցնում է խաղողի աճը գինեգործական հիմնական տարածաշրջաններում, ներառյալ Շամպայնը, Բորդոն և Բուրգունդիան, ինչը սպառնում է բերքի կրճատմամբ և կարող է հանգեցնել դիտարկումների ամբողջ պատմության ընթացքում խաղողահավաքի ամենավաղ ժամկետներից մեկին, երեքշաբթի Reuters գործակալությանը հայտնել են արտադրողները։

Հունիսի վերջի ռեկորդային շոգի ալիքը, որին անցյալ շաբաթվանից հաջորդել է նոր տաք ու չոր եղանակը, դանդաղեցրել է խաղողի վազի զարգացումը աշխարհում գինեգործական երկրորդ խոշորագույն պետությունն Ֆրանսիայում և վնաս հասցրել երիտասարդ բույսերին:

«Մենք տեսնում ենք, թե ինչպես է բերքի ներուժը բառացիորեն հալվում արևի տակ»,- հայտարարել է Բուրգունդիայի գինեգործական ոլորտի BIVB կազմակերպության նախագահ Լորան Դելոնեն՝ նշելով, որ արտադրողների մտահոգության գլխավոր պատճառը ջրի պակասն է։

Օդերևութաբանների կանխատեսումներով՝ մինչև հուլիսի 14-ը Ֆրանսիայի գինեգործական հիմնական շրջաններում սպասվում են քիչ տեղումներ կամ դրանց իսպառ բացակայություն։ Դա կերկարաձգի երաշտի շրջանը, որը շատ վայրերում արդեն շարունակվում է ավելի քան երեք շաբաթ։

Շամպայնում արտադրողները սպասում են պատմության մեջ ամենավաղ բերքահավաքին։ Ենթադրվում է, որ խաղողահավաքը կսկսվի մոտավորապես օգոստոսի 15-ին՝ գրեթե մեկ ամիս շուտ, քան ընդունված էր մի քանի տասնամյակ առաջ։

Ներկայում ակնկալվում է, որ բերքատվությունը կլինի մոտ 10%-ով ցածր, քան անցյալ տարի։ Այդուհանդերձ, արտադրության ընդհանուր ծավալը գուցե այդքան կտրուկ չնվազի, քանի որ արտադրողները կկարողանան օգտագործել նախկինում կուտակված պաշարները, հայտարարել է Շամպայնի խաղող արտադրողների միության նախագահ Մաքսիմ Տուբարը։

«Բախտներս բերել է, որ ձմեռը շատ խոնավ էր, ուստի հողը սկզբնական շրջանում չափազանց չոր չէր։ Բայց հիմա տեսնում ենք, որ խաղողն այլևս չի մեծանում»,- ասել է Տուբարը։

Նա հավելել է, որ Շամպայնի արտադրողները դեռ կարող են վերանայել իրենց կանխատեսումները, եթե առաջիկա երկու շաբաթվա ընթացքում տարածաշրջանում առանց ամպրոպների ուժեղ անձրևներ տեղան։

Բորդոյում և Բուրգունդիայում, որտեղ տապն էլ ավելի ուժգին էր, արտադրողները հայտարարել են, որ դեռ վաղ է բերքի ծավալների հստակ գնահատականներ տալ, սակայն զգուշացրել են, որ նվազումը «զգալի» է լինելու։

Միաժամանակ, մասնագետների կարծիքով, գինու որակը պարտադիր չէ, որ տուժի։ Այդուհանդերձ, շոգն ու երաշտը կարող են հանգեցնել խաղողի մեջ շաքարի պարունակության բարձրացմանը, ինչը կարող է ազդել գինու համի և ալկոհոլի մակարդակի վրա։

Շատ տարածաշրջաններում բերքահավաքը ևս անսովոր վաղ կսկսվի։ Բորդոյում «կրեման» փրփրուն գինու արտադրության համար առաջին հատապտուղները սպասվում են արդեն օգոստոսի առաջին շաբաթվա ընթացքում, իսկ Բուրգունդիայում առաջին խաղողահավաքը, հավանաբար, կսկսվի օգոստոսի 20-ի մոտակայքում։

Հետևեք մեզ՝ այստեղ