Ինչպես են ԱՄՆ ուժերն իրականացրել իրենց պատմության ամենահամարձակ գործողություններից մեկը. The Telegraph

МЕЖДУНАРОДНОЕ 5 Апрель, 2026 23:54

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կիրակի վաղ առավոտյան ԱՄՆ նախագահ Դոնալդ Թրամփը Truth Social սոցիալական ցանցում հայտարարել է ԱՄՆ պատմության մեջ ամենահամարձակ որոնողափրկարարական գործողություններից մեկի հաջող ավարտի մասին, գրում է The Telegraph-ը:

Ինչպես ընդգծում է պարբերականը, ԱՄՆ նախագահի հրապարակումը նշանավորել է 36-ժամյա դրամայի ավարտը, «որը կմտնի ԱՄՆ ռազմական պատմության տարեգրության մեջ»:

Ըստ բրիտանական թերթի, այս գործողությունը «Իրանին զրկել է պոտենցիալ կարևոր քարոզչական հաղթանակից» այն բանից հետո, երբ ուրբաթ Իրանի երկնքում խոցվել էր ամերիկյան F-15E Strike Eagle կործանիչը:

«Օդաչուն փրկվել էր գրեթե անմիջապես, սակայն սպառազինության օպերատորը անհետ կորել էր: Դրան հաջորդել է կենաց ու մահվան պայքար ԱՄՆ-ի և Իրանի միջև՝ գնդապետին վերադարձնելու համար: Վտանգված էր ոչ միայն օդաչուի և նրան փրկելու համար ամեն ինչ ռիսկի ենթարկած տասնյակ հատուկջոկատայինների կյանքը, այլև զինվորականների հեղինակությունը»,- պատմում է The Telegraph-ը:

Ըստ պարբերականի տեղեկությունների, փրկարարական գործողության վայրից տեսագրությունը վկայում է այն մասին, որ օդաչուն թաքնվել է Իրանի հարավի չորային լեռնային շրջանում՝ կատապուլտի նստատեղի դեղին կողային լծակը սեղմելուց հետո:

«Նստատեղի կատապուլտման համակարգը, որն օգտագործում է CKU-5 պինդ հրթիռային վառելիք և 200 մետր/վայրկյան արագությամբ ճեղքում է ինքնաթիռի թաղանթը, երբևէ ստեղծված ամենաբարդերից մեկն է, սակայն զուգորդվում է ողնաշարի կոտրվածքների և այլ վնասվածքների մեծ հավանականությամբ»,- պարզաբանվում է հրապարակման մեջ:

Թշնամու տարածքում կատապուլտված օդաչուներին հրահանգվում է թաքնվել և օգնություն սպասել լավ պատրաստված որոնողափրկարարական թիմերից:

Նա ուներ միայն ատրճանակ, և ամեն ինչ կախված էր նրանից, թե արդյոք ամերիկյան հատուկջոկատայինները կկարողանային դուրս բերել նրան նախքան իրանական զորքերի մոտենալը: Նա իր հետ ուներ ռադիոփարոս և պաշտպանված կապի սարք, սակայն չէր կարող ազատորեն օգտվել ռադիոփարոսից, քանի որ իրանական ուժերը կարող էին հայտնաբերել այն, գրում է The New York Times-ը:

Իրանը պարգև էր առաջարկել յուրաքանչյուրին, ով կգտներ սպային, և ուրբաթ սոցիալական ցանցերում տեսանյութ էր հայտնվել, որտեղ երևում էր, թե ինչպես են տասնյակ տեղացիներ խուզարկում գյուղական վայրերը՝ ընդունելով մարտահրավերը: Երկու օդաչուներից առաջինին՝ օդաչուին, ուրբաթ տարհանող ուղղաթիռները գետնից գնդակոծվել են, և տեսագրության մեջ երևում էր, թե ինչպես է երկու ուղղաթիռներից մեկը, հետևից ծուխ թողնելով, Իրանից թռչում Իրաք: Այդ դեպքում երկրորդ օդաչուի տարհանումը ձախողման եզրին էր, պատմում է պարբերականը:

«Դա իսկական ասեղ էր դեզի մեջ, բայց այս դեպքում դա լեռնային ծերպում թաքնված խիզախ ամերիկյան ոգի էր, որն անտեսանելի կլիներ, եթե չլինեին Կենտրոնական հետախուզական վարչության (ԿՀՎ) հնարավորությունները»,- Axios-ին պատմել է պաշտոնյաներից մեկը: The Wall Street Journal-ը հայտնել է, որ վիրավոր գնդապետը վերջին րոպեներին դուրս է եկել թաքստոցից և «համարձակ քայլ է կատարել ընդառաջ իր փրկարարական թիմին»՝ «Ծովային կատուների» 6-րդ ջոկատից:

Ըստ The Telegraph-ի տվյալների, վիրավոր ամերիկացի սպան բարձրացել է ծովի մակերևույթից 7000 ֆուտ բարձրության վրա գտնվող լեռնաշղթայի վրա, մինչ ամերիկյան զորքերը ռումբեր էին նետում և կրակ բացում մոտեցող իրանական շարասյունների վրա:

Ըստ պարբերականի տեղեկությունների, բուն փրկարարական գործողությանը մասնակցել են հարյուրավոր հատուկջոկատայիններ, որոնք հատուկ MC-130J ինքնաթիռներով ժամանել են ինքնաշեն թռիչքուղի, մինչդեռ MQ-9 Reaper անօդաչու թռչող սարքերն ու ռեակտիվ ինքնաթիռները օդային ծածկույթ են ապահովել՝ «երեք կիլոմետր շառավղով հարվածելով զինակոչային տարիքի բոլոր տղամարդկանց, որոնք, ինչպես համարվում էր, վտանգ էին ներկայացնում»: Տարհանման վերջնական գործողությունը սկսվել է այն բանից հետո, որբ ԿՀՎ-ն ճշգրիտ որոշել է օդաչուի գտնվելու վայրը և «կեղծ գործողություն» իրականացրել՝ ստիպելով իրանցիներին հավատալ, թե նա արդեն այլ վայրում է:

Հնարքն աշխատել է, սակայն վերջնական դրաման տեղի է ունեցել այն ժամանակ, երբ երկու MC-130J ինքնաթիռները, որոնցից յուրաքանչյուրն արժեր 100 միլիոն դոլար, խրվել են ինքնաշեն թռիչքուղու վրա և ոչնչացվել ամերիկյան զորքերի կողմից, որպեսզի չընկնեն հակառակորդի ձեռքը: Վերջին ժամերին ստիպված են եղել տեղափոխել երեք նոր ինքնաթիռ՝ օդաչուին և զինվորներին դուրս բերելու համար, հայտնում է The New York Times-ը: Օդաչուն ապաքինվում է Քուվեյթի հիվանդանոցում, նշել է լրատվամիջոցը:

Հետևեք մեզ՝ այստեղ