Չարենցի անվան գրականության և արվեստի թանգարանում ցուցադրված Վիլյամ Սարոյանի նկարներից մի քանիսը կմնան Հայաստանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Եղիշե Չարենցի անվան գրականության և արվեստի թանգարանում տեղի է ունեցել  «Սարոյանական գույներ․ բառերից անդին» ժամանակավոր ցուցադրության փակման արարողությունն ու ամփոփիչ միջոցառումը: Ցուցադրությունը բացվել էր 2025 թվականի սեպտեմբերի 5-ից:

ԿԳՄՍՆ–ից NEWS.am—ին հայտնում են, որ «Սարոյանական գույներ․ բառերից անդին» միջազգային ցուցադրությունը կազմակերպվել է Գրականության և արվեստի թանգարանի ու ԱՄՆ-ի «Վիլյամ Սարոյան» հիմնադրամի հետ համագործակցությամբ: Ցուցադրվել են Սարոյանի  ավելի քան 100 նկարչական աշխատանքները, որոնք բերվել են ԱՄՆ-ից: Ցուցադրվել է նաև գրողի հեծանիվը, որը նա հայրենիքի ճանապարհներն անցնելուց հետո նվիրել է Գրականության և արվեստի թանգարանին։

Ամփոփիչ միջոցառումը մեկնարկել է Առնո Բաբաջանյանի հեղինակած «Իմ սիրտը լեռներում է» երաժշտական ստեղծագործության հնչյունների ներքո: Ներկա են եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը, նախարարի տեղակալ Ալֆրեդ Քոչարյանը, Եղիշե Չարենցի անվան գրականության և արվեստի թանգարանի տնօրեն Սյուզաննա Խոջամիրյանը, ԱՄՆ-ի «Վիլյամ Սարոյան» հիմնադրամի տնօրեն Սքոթ Սեդրակյանը, սարոյանական արվեստի երկրպագուներ:

Նախարար Ժաննա Անդրեասյանը շնորհակալություն է հայտնել կազմակերպիչներին՝ նշելով, որ ցուցադրությունը Վիլյամ Սարոյանին նորովի բացահայտելու հնարավորություն է, ինչպես նաև «Վիլյամ Սարոյան» հիմնադրամի հետ կարևոր համագործակցության նոր փուլ. «Մենք կշարունակենք հիմնադրամի հետ համատեղ աշխատանքը՝ Սարոյանին ներկայացնելու, բացահայտելու, ճանաչելու, իրազեկելու, տեսանելի դարձնելու ուղղությամբ: Կարծում եմ՝ նրա բոլոր գործերը, ինչպես նաև Սարոյանն ինքը որպես մարդ՝ իր արժեքներով և վարքագծով ավելի քան արդիական են մեր օրերում: Սարոյանը սովորեցնում է մարդ լինելու ամենակարևոր դասերը, և այս առումով նաև առանցքային է՝  առավել խորությամբ և տարբեր կողմերից ճանաչել Սարոյանին: Նկարների միջոցով նրան բացահայտելն էլ նոր փորձառություն է, որը անպայման պետք է շարունակություն ունենա: Առանձնահատուկ շնորհակալ եմ «Վիլյամ Սարոյան» հիմնադրամին պատրաստակամության և համագործակցության համար»:

Ժաննա Անդրեասյանի տեղեկացմամբ՝ Սարոյանի նկարչական աշխատանքները կվերադարձվեն ԱՄՆ, բայց ցուցադրված որոշ գործեր կմնան Գրականության և արվեստի թանգարանում: Նախորդ տարի «Վիլյամ Սարոյան» հիմնադրամի կողմից Սարոյանի գործերից նվիրաբերվել է ՀՀ ԿԳՄՍ նախարարությանը, որը ևս կփոխանցվի ԳԱԹ-ին: «Սրանով Սարոյանը մի նոր թելով կկապվի Հայաստանի Հանրապետությանը՝ մեզ ավելի ամուր կապելով իր արվեստի հետ»,- նշել է Ժաննա Անդրեասյանը: Նա շնորհակալություն է հայտնել հիմնադրամին և նվիրատվությունը փոխանցել Գրականության և արվեստի թանգարանին։

Եղիշե Չարենցի անվան գրականության և արվեստի թանգարանի տնօրեն Սյուզաննա Խոջամիրյանը նշել է, որ վեց ամիս է՝ Գրականության և արվեստի թանգարանը գունավորվել է սարոյանական գույներով. «Վեց ամիս է, որ ժամանակավորապես հարստացել ենք 100-ից ավելի ինքնատիպ ստեղծագործական աշխատանքներով, որոնց միջոցով հնարավոր եղավ բացահայտել Սարոյանին որպես նկարչի։ Ահա  այստեղ է, որ արվեստը գալիս է օգնության ավելի խորը հասկանալու գրականությունը, և գրականությունը գալիս է օգնության՝ հասկանալու արվեստը։ Վիլյամ Սարոյանն իր նկարչական աշխատանքների զգալի մասը ստեղծել է հենց գրական ստեղծագործություններին զուգընթաց, և դրանցում արտահայտված են Սարոյան գրողի և Սարոյան նկարչի ամենաանկեղծ ու խորը ապրումները: Այսօր այս աշխատանքները կրկին վերադառնալու են Միացյալ Նահանգներ՝ Սարոյանի Ամերիկա: Այս փաստը մեզ, իհարկե, մի փոքր տխրեցնում է, բայց  գիտակցում ենք, որ աշխատանքները պետք է վերադառնան Սարոյանի ծննդավայր: Ուզում եմ ուրախությամբ հայտարարել, որ «Վիլյամ Սարոյան» հիմնադրամը և Գրականության և արվեստի թանգարանը կնքում են համագործակցության հուշագիր, որի շրջանակում այս նախաձեռնությունը կդառնա ամենամյա»:

ԱՄՆ-ի «Վիլյամ Սարոյան» հիմնադրամի տնօրեն Սքոթ Սեդրակյանը նույնպես շնորհակալություն է հայտնել բոլոր գործընկերներին ցուցադրության կայացման համար: Նա  նշել է՝  սարոյանական ցուցադրության նկարներն իր հետ տանում է ԱՄՆ, սակայն դրանցից երկուսը կշարունակեն մնալ Հայաստանում. «Ապրիլի 24-ին արված այս  նկարը թերևս իմ ամենասիրելի գործն է, որը նվիրաբերում եմ ԳԱԹ-ին։ Իսկ մյուս նկարը, որը արված է Ֆրեզնոյում, կուզեի նվիրատվություն անել Հայաստանի ազգային պատկերասրահին: Մեկ անգամ ևս շնորհակալություն եմ հայտնում և լիահույս եմ, որ մենք շուտով նորից կհանդիպենք»:

«Սարոյանական գույներ․ բառերից անդին» ժամանակավոր ցուցադրության բացման շրջանակում հայտարարվել էր նաև նկարչական մրցույթ աշակերտների շրջանում: Դպրոցականները, ոգեշնչված Սարոյանի գրական ստեղծագործություններից, ներկայացրել են իրենց նկարչական աշխատանքները: Ամփոփիչ միջոցառմանը հայտարարվել են նաև նկարչական մրցույթի արդյունքները: Նախարարը, մյուս ներկաների հետ, դիտել է դպրոցականների նկարչական աշխատանքները, զրուցել նրանց հետ:

Հետևեք մեզ՝ այստեղ