100 տարին լրացած բոլոր թոշակառուները կստանան 1 մլն դրամ՝ անկախ բնակության վայրից

ОБЩЕСТВО 5 Февраль, 2026 23:24

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կառավարությունը այսօր կայացած նիստում, չզեկուցվող հարցերի փաթեթում ընդունեց համապատասխան որոշումը, որի համաձայն՝ 100 տարին լրացած բոլոր թոշակառուները կստանան 1 մլն դրամ՝ անկախ նրանց բնակության վայրից։

Գործող իրավակարգավումների շրջանակներում 100 տարեկանը լրանալու կապակցությամբ գնահատանքի որևէ վերաբերմունք կենսաթոշակառուին կամ նպաստառուին չի ցուցաբերվում։ Այս առումով հարկ է նկատի ունենալ, որ Երևանի ավագանու որոշմամբ մայրաքաղաքում հաշվառված և 100 տարին լրացած բոլոր տարեցներին տրամադրվել է 1,000,000 դրամ աջակցություն՝ որպես շնորհակալություն նրանց ողջ կյանքի ընթացքում ընտանիքին, հայրենիքին, աշխատանքին, հանրությանը նվիրվածության և հանրության մեջ թողած արժեքավոր ներդրման համար։

Այս տեսակետից, մայրաքաղաքում չհաշվառված, սակայն 100 տարին լրացած կենսաթոշակառուները և նպաստառուները դուրս են մնացել նախաձեռնությունից՝ ստեղծելով անհավասարություն և անարդարության զգացողություն։

Հաշվի առնելով այս անձանց ունեցած վաստակը՝ պետությունը պարտավոր է ցուցաբերել համահավասար վերաբերմունք՝ անկախ բնակության վայրից։ Սա նաև սոցիալական արդարության և արժանապատվության սկզբունքների իրագործում է։ Ըստ այդմ, այդ նպատակով 100 տարին լրացած անձանց ավագ սերնդի հարգարժան քաղաքացիներին հավասար մոտեցում ցուցաբերելու նպատակով մշակվել է ներկայացված նախագիծը։

Առկա խնդրի առաջարկվող լուծումը

Նախագծով առաջարկվում է սահմանել, որ՝

կենսաթոշակ կամ նպաստ ստանալու իրավունք ունեցող անձի 100 տարին լրանալու օրվան հաջորդող ամսվա կենսաթոշակի (նպաստի) հետ միաժամանակ նշանակվում է 1000000 դրամ միանվագ գումար,
միանվագ գումարը վճարվելու է այն ստանալու իրավունք ձեռք բերելու ամսվա կենսաթոշակի հետ՝ այդ ամսվա կենսաթոշակի վճարման համար սահմանված կարգով և եղանակով,
նշանակված միանվագ գումար ստանալու իրավունքը անձը կորցնելու է (միանվագ գումարը չի վճարվելու) կենսաթոշակ ստանալու իրավունքը կորցնելու դեպքում, իսկ մահվան պատճառով չվճարված միանվագ գումարը վճարման ենթակա չէ,
որոշումն ուժի մեջ մտնելու օրվա դրությամբ արդեն 100 տարին լրացած, կենսաթոշակ կամ նպաստ ստանալու իրավունք ունեցող անձին 1,000,000 դրամի չափով միանվագ գումարը վճարվելու է որոշումն ուժի մեջ մտնելուց հետո կենսաթոշակի և նպաստի՝ առաջիկա ամսվա վճարման ցուցակներով,
միանվագ գումար չի տրվելու այն անձանց, ովքեր Երևանի ավագանու որոշմամբ արդեն իսկ ստացել են (կամ հետագայում ստանալու են) 1,000,000 դրամ աջակցություն (այդ անձանց տվյալները տրամադրվելու են Երևանի քաղաքապետարանի կողմից)։

Իրավական ակտի կիրառման դեպքում ակնկալվող արդյունքը

Որոշման ընդունման արդյունքում՝

ավագ սերնդի հարգարժան 71 քաղաքացի միայն 2026 թվականին պետական մակարդակով կստանա հարգանքի և աջակցության նյութական արտահայտություն,
կձևավորվի համահավասար սոցիալական մոտեցում,
հանրային գիտակցության մեջ կխորանա բարձր տարիք ունեցող քաղաքացիների նկատմամբ հարգանքի մշակույթը։

Բացի դրանից, ներկայացվող նախաձեռնությունն ուղղված է սոցիալական ներառվածության բարձրացմանը, արժանապատիվ ծերության ապահովմանը և հասարակական համախմբվածության ամրապնդմանը։ Նախաձեռնությունը նաև խորհրդանշական ուղերձ է երիտասարդ սերունդներին, որ պետությունը բարձր է գնահատում իր ավագ սերնդին՝ պետությանը, ընտանիքին, հանրությանը, աշխատանքին նվիրումով երկար ապրած կյանքը պատշաճ արժևորվում է։

Հետևեք մեզ՝ այստեղ