Քրիստոսին նկատեք ձեր կյանքի ճանապարհին աշխարհի բոլոր ճանապարհների միջից․ Արամ Ա Վեհափառ

 

Հայրապետական պատգամէն առաջ ողջոյնի խօսք առաւ Հիւսիսային Ամերիկայի Արեւելեան Հայոց Թեմի առաջնորդ Գերաշնորհ Տ. Անուշաւան Արք. Դանիէլեան։ Ան բարի գալուստ մաղթեց Հայրապետին եւ իր որդիական երախտագիտութիւնը յայտնելով՝ այցելութիւնը որակեց իբրեւ պատմական, որովհետեւ Հայրապետին գահակալութեան 30-ամեակի նշման ծիրէն ներս եկեղեցւոյ զաւակները համախմբուած են անոր շուրջ, ըսաւ ան։ Ապա, հրաւիրեց Նորին Սրբութիւնը՝ հայրապետական պատգամը ուղղելու։

Վեհափառ Հայրապետը իր պատգամին նիւթ ընտրած էր Քրիստոսի հետեւելու հրամայականը: Նորին Սրբութիւնը ըսաւ. «Քրիստոս Իր երկրաւոր առաքելութեան կարեւոր մէկ հանգրուանին ըսաւ. «Եթէ մէկը ուզէ ինծի հետեւիլ՝ թող ուրանայ իր անձը, առնէ իր խաչը եւ ետեւէս գայ» (Մտ 8.34)։

Քրիստոս իր առաքելութեան սկիզբը նման պատգամ մը չուղղեց իր աշակերտներուն։ Արդարեւ, Իր ուսուցումներուն, պատգամներուն ու հրաշքներուն ճամբով Քրիստոս պարզած էր Իր առաքելութեան նպատակը։ Աստուածորդին մարդացած էր մեղքի տիղմին մէջ մխրճուած մարդուն փրկութեան համար։ Իր ուսուցումներուն ճամբով Քրիստոս ցոյց տուած էր դէպի փրկութիւն տանող ճամբան։ Ան ըսած էր՝ «Ե՛ս եմ ճամբան, ճշմարտութիւնը եւ կեանքը» (Յհ 14.6)։ Ահա այս բոլորէն ետք, Քրիստոս կոչ կ’ուղղէր իր աշակերտներուն, թէ ով որ Իր ըսածներուն հաւատայ՝ իր անձը թող ուրանայ, խաչը առնէ ու Իր ետեւէն երթայ։ Ահա՛ Քրիստոսի պատգամը ուղղուած աշակերտներուն, նաեւ այսօր՝ եկեղեցւոյ ճամբով՝ բոլոր քրիստոնեաներուն»։

Նորին Սրբութիւնը իր պատգամը շարունակեց՝ պարզելով Քրիստոսի ճշմարիտ հետեւորդ դառնալու միջոցները. «Քրիստոնեայ ըլլալ կը նշանակէ հետեւիլ Քրիստոսի։ Եկէք հարց տանք, թէ ի՞նչ կը նշանակէ հետեւիլ Քրիստոսի.

ա) Կը նշանակէ Քրիստոսը նկատել մեր կեանքի ճամբան՝ աշխարհի բոլոր ճամբաներուն մէջէն։

բ) Կը նշանակէ Քրիստոսը դաւանիլ որպէս միակ ճշմարտութիւնը մեր կեանքին՝ մեզ շրջապատող բազմազան ու բազմաթիւ ճշմարտութիւններուն մէջէն։

գ) Կը նշանակէ Քրիստոսը ապրիլ իբրեւ մեր կեանքին առանցքն ու նպատակը։

«Սակայն երբեք չմոռնանք, որ Քրիստոսի հետեւելու պայմանը խաչը առնել է. այլ խօսքով՝ խաչի ճամբով քալել է։ Խաչը նշան է սիրոյ, զոհողութեան ու ինքնընծայումի։ Դիւրին չէ քրիստոնեայ ըլլալ, դիւրին չէ մանաւանդ Քրիստոսի հետեւիլ։ Ա՛յս գիտակցութեամբ ու յանձնառութեամբ պէտք է ապրինք մեր կեանքը»։

Ապա, իր պատգամը անգլերէն լեզուով ամփոփելով՝ Վեհափառ Հայրապետը ըսաւ.

«“If anyone believes me, he must deny himself and take up his cross and follow me.” This is what Jesus Christ said at a critical point of His earthly ministry. Through teachings, parables, and miracles, Jesus Christ exposed to his followers who he was and the purpose of his ministry. And then He said Whoever believes in me should follow me. What does it mean to follow Jesus Christ?

a) To consider Christ as the way of our life.

b) To follow Christ as the truth of our life.

c) To live Christ as the center of our life.

We should know, as Jesus Christ reminded us, that following Jesus Christ is not easy; it is the way of the cross, it is a cross-centered life. The cross is the symbol of love, sacrifice, suffering, and commitment. This is the way of victory. Christ achieved resurrection through cross», եզրափակեց իր պագամը Նորին Սրբութիւնը։

Սուրբ Պատարագի աւարտին, Վեհափառ Հայրապետը «Պահպանիչ» աղօթքով օրհնեց ներկաները եւ ապա միասնաբար երգեցին «Կիլիկիա» օրհներգը»։