Երեկ՝ փետրվարի 4-ին, դերասանուհի Անի Երանյանը նշում էր ծննդյան 25 ամյակը, իսկ այսօր տարիքային առանձնահատկություններով ու ծննդյան ամենաթանկ նվերի մասին դերասանուհին կիսվել է Life.panorama.am-ի հետ:
«Անկեղծորեն պետք է պատմեմ, որ փետրվարի 3-ին՝ երեկոյան անսովոր զգացողություն ունեցա, զգացի, որ ուզում եմ մենակ դուրս գալ ու հրաժեշտ տալ իմ 24 տարեկանին: Դուրս եկա, մեքենայով քաղաքում շրջելով մտածեցի, վերագնահատեցի անցնող տարիս, մի փոքր էլ տխրեցի, քանի որ հասկանում էի, որ հրաժեշտ եմ տալիս 24 տարվաս եւ վերջին ժամերն են, որ 24 տարեկան եմ: Առհասարակ՝ ես շատ զգացմունքային մարդ եմ, անասելի դժվարությամբ եմ բաժանվում այն ամենից, ինչ թանկ է ինձ համար, միաժամանակ, իմ տեսակին հատուկ է նաեւ այն, որ երբ գիտեմ տվյալ բանն այլեւս չեմ ունենալու, սկսում եմ ագահաբար այն վայելել, նույնը եղավ 24-ի հետ,- պատմեց հոբելյարն ու ավելացրեց,- հետո 11:30 եկա տուն, քանի որ գիտեի, որ ընկերներս ու հարազատներս ինձ անակնկալ են մատուցելու եւ իսկապես շատ բարձր տրամադրությամբ նշեցի նոր տարիքս»:
Անակնկալների մասին խոսելիս՝ Անին նկատեց. «Այս տարի ծննդյանս օրը շատ անակնկալներով նշանավորվեց, նախ Մոսկվայից եկել էին հայրս ու եղբայրս, հատուկ ծննդյանս օրը կողքիս լինելու համար կրկին Մոսկվայից եկել էր նաեւ ընկերուհիս, այնպես որ անակնկալների պակաս երեկ չեմ զգացել»:
Առանձնացնելով ամենաթանկ նվերը՝ դերասանուհին հատուկ նշեց. «25 տարեկանս լիարժեք դիմավորեցի, քանի որ կողքիս էին հայրս, մայրս ու եղբայրս: Դա մի ուրիշ զգացողություն էր, հենց դա էլ եղավ 25 տարեկանիս ամենամեծ ու լավագույն նվերը»:
Ծննդյան օրը դերասանուհին նշել է ընկերների ու հարազատների հետ միասին, օրվա խորհրդանիշն էլ՝ տոնական տորթը, հատուկ նշանակություն է ունեցել. «Տոնական տորթս անձամբ էի ընտրել, դրա վրա պատկերված էին անցած 24 տարիներս՝ սկսած մանկությունիցս, ընտանիքիցս, մինչ բոլոր կերտածս դերերը: Իսկապես հետաքրքիր ու իմաստալից էր ստացվել»,- պատմեց նա:
Խոսելով տոնական տորթի մոմերը փչելիս մտապահված երազանքներից՝ Անի Երանյանը նշեց, որ տարվա մեջ ընդամենը երկու անգամ է երազանք պահում. «Ես այդ առումով մի փոքր այլ վերաբերմունք ունեմ: Միշտ ասել եմ, որ երազանքներ չեմ պահում, չեմ սիրում երազել՝ բացառությամբ Ամանորի գիշերը եւ ծննդյանս տորթի մոմերը փչելիս: Այդ օրերին ես մտապահում եմ երազանք ու հավատում եմ դրանց իրականացմանը: Առհասարակ, ըստ իս, եթե մարդ մի բան շատ է ուզում եւ եթե դա բարի ցանկություն է, ապա հաստատ կիրականանա: Ես հավատում եմ հրաշքներին, դրանց հավատում եմ սեփական կյանքիս փորձով»,- հավելեց դերասանուհին:
Իսկ վերջում հարցին, թե վերագնահատելով անցած տարիներն ու արդեն նոր տարիքում ինչի՞ համար է շնորհակալ դերասանուհին եւ ի՞նչն է նրան դեռեւս պակասում, պատասխանեց.
«Ես իմ ամեն օրվա, ամեն վայրկյանի համար շնորհակալ եմ, ծնողներիս եմ շնորհակալ, որ ես կամ, նրանց կողքին ես ինձ լիարժեք եմ զգում, շնորհակալ եմ ընկերներս, նրանք ամենալավն են, շնորհակալ եմ, որ ունեմ լավ աշխատանք ու սիրում եմ կյանքը: Իսկ կորուստները մարդու համար են, իհարկե, իմ տեսակով շատ ծանր եմ տանում կորուստները, բայց համարում եմ նաեւ, որ կորցնելն էլ առավելություն է, ուրեմն դա էլ էր պետք: Այնպես որ, ես ոչնչի համար չեմ զղջում, շնորհակալ եմ այն մարդկանց, ովքեր կողքիս են, նրանց՝ ովքեր եղել են իմ կյանքում, եւ անգամ նրանց՝ ովքեր էլ չեն լինելու ինձ հետ, շնորհակալ եմ նաեւ նրանց, ովքեր դեռ պետք է լինեն իմ կյանքում: Իսկ թե ինչ կցանկանայի ունենալ 25-ում, կնախընտրեմ լռել, քանի որ այն, ինչ շատ եմ ուզում ունենալ, ես երբեք չեմ բարձրաձայնում»:
