Կաննի կինոշուկայում Ելենա Արշակյանը ներկայացրել է իր նոր ֆիլմը, որի պրեմիերան կլինի աշնանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մայիսի 13-ին Ֆրանսիայում մեկնարկել է հեղինակավոր «Կաննի» 78-րդ կինոփառատոնը՝ համախմբելով համաշխարհային կինոյի աստղերին:

Շուտով ռեժիսոր Ելենա Արշակյանը կսկսի ՀՀ-ում Նիդերլանդների դեսպանության հետ համատեղ արտադրության իր նոր ֆիլմը, որն օրերս ներկայացրել է Կաննում:

Tert.am Life-ի հետ զրույցում ռեժիսորը պատմեց, որ ֆիլմի նկարահանումները լինելու են ամռան ամիսներին, պրեմիերան նախատեսվում է աշնանը:

Ֆիլմը ներկայացնում է սեռով պայմանավորված հղիության արհեստական ընդհատումների խնդիրը:  Ֆիլմի անվանումն Աստծո տասը պատվիրաններից մեկի անունով է՝ «Մի սպանիր»:

Նիդերլանդների դեսպանության հետ համատեղ աշխատանք է՝ կարճամետրաժ խաղարկային ֆիլմ: Սցենարի հեղինակը Անահիտ Մխիթարյանն է:

«Այս օրերին Կաննի կինոշուկայում գտնվելն ինձ հնարավորություն տվեց  համաշխարհային կինոաշխարհի կենտրոնում ներկայացնել իմ առաջիկա ֆիլմը, որը արդեն աշնանը պատրաստ կլինի: Այստեղ հանդիպումներ ունեցա տարբեր կինոգործիչների հետ և ծանոթացա այն բոլոր փառատոններին, որոնց շրջանակում կներկայացվի «Մի սպանիր»-ը:

Այս ֆիլմն ինձ համար առանձնահատուկ է, որովհետև չափազանց ուժեղ ասելիք ունի, որը կարծում եմ կհասնի յուրաքանչյուրի սրտին և մտածելու տեղիք կտա: Ֆիլմը ներկայացնելու է հայկական իրականությունը, որտեղ երբեմն դեռ չծնված կյանքերին զրկում են ապրելու իրավունքից: Սեռը դառավճիռ չէ և մեծ օրհնություն է ընտանիքում ունենալ դուստր. հենց այս գիտակցությունն է, որ ցանկանում ենք արթնացնել յուրաքանչյուրի մոտ:

Հասարակությունը և հատկապես կանայք, բավականաչափ տեղեկացված չեն արհեստական ընդհատումների հետևանքների մասին, թե՛ կնոջ առողջության, թե սոցիալ-հոգեբանական տեսանկյունից: Հաճախ կանայք այդ որոշումն ինքնուրույն չեն կայացնում: Նրանք այդ քայլին են դիմում ընտանիքի անդամների ճնշումների ներքո: Ֆիլմը անդրադառնում է այս երևույթի բոլոր կողմերին և խորքային ներկայացնում բացասական հետևանքները»,-մեզ հետ զրույցում ասաց Ելենա Արշակյանը:

ՀՀ-ում Նիդերլանդների դեսպանության քաղաքական և տնտեսական հարցերով պատասխանատու Լարիսա Հարությունյանի խոսքով՝ Նիդերլանդների կառավարության առաջնահերթություններից է կանանց իրավունքները,  սոցիալ-տնտեսական ինտեգրումը և հավասար իրավունքների հիմնահարցերը: 

«ՀՀ-ում Նիդերլանդների դեսպանությունը տարբեր ծրագրեր է իրականացնում ուղղված այս հիմնախնդիրների լուծմանը՝ կանանց քաղաքական ու տնտեսական հզորացմանը, բռնության դեմ պայքարին և վերարտադրողական առողջության իրավունքների պաշտպանությանը: Տարբեր շահառուների հետ խոսելով և ունենալով խորքային քննարկումներ, ցավով արձանագրել ենք, որ Հայաստանուն շատ են սեռով պայմանավորված հղիության ընդհատումները: Խնդիրը ակնհայտ է հատկապես մարզային բնակավայրերում: Անձամբ մտահոգված լինելով այս խնդրով, սկսեցի տարբերակներ մշակել, թե ինչ միջոցառումներով է հնարավոր պայքարել այս արատավոր երևույթի դեմ: Ո՛չ սեմինարները, ո՛չ էլ իրազեկման արշավները չէին ունենա այն ազդեցությունը, որքան հուզիչ ֆիլմը, որի հերոսներից յուրաքանչյուրի կերպարը վերցված է իրականությունից»,- նշել է Լարիսա Հարությունյանը:

Նրա կարծիքով՝ այս ֆիլմի հերոսներից յուրաքանչյուրի դերում կարող է հայտվել մեզանից յուրաքանչյուրը, պարզապես միշտ կարելի է կատարել ճիշտ ընտրություն՝ ամեն ինչից վեր դասելով մարդկային կյանքը:

«Մի սպանիր» ֆիլմը կանխարգելիչ ազդակ է, երիտասարդները, ավագ սերունդը կարող են հենց իրենց տեսնել այս ֆիլմում և փորձեն ավելի ճիշտ որոշումներ կայացնել հետագա կյանքի համար»,- եզրափակել է նա:

Հետևեք մեզ՝ այստեղ