Ինչ համեմունքներով, սոուսով ու սկուտեղով մատուցել «խնձոր» հիշեցնող կազմվածքը․ «չի կարելիներ», խորհուրդներ ու խորամանկություններ

Blognews.am-ը գրում է .

 

Լայն ուսեր, փարթամ կուրծք, ընդգծված որովայն, իրանի բացակայություն, բարակ թևեր, սլացիկ ոտքեր, — այսպիսին է “խնձորանման” կազմվածքի հիմնական նկարագիրը։ Եթե կարդում եք այս հոդվածը, ապա ամենայն հավանականությամբ խնձորանման կառուցվածք ունեք, կարծում եք, որ սա խնդրահարույց ու անհույս թեմա է, այսպիսի կազմվածքով կատարյալ տեսք ունենալը ֆանտաստիկայի ժանրից է։ Չարաչար սխալվում եք․․․․

 

Եվ այսպես, խնձորանման կառուցվածք ունենալու դեպքում ինչպե՞ս և ինչո՞վ է պետք  քողարկել  մարմնի անցանկալի հատվածները։ Գործնական խորհուրդների անցնելուց առաջ առաջարկում եմ նախ համոզվել, որ դուք իսկապես խնձորանման կազմվածք ունեք։ Այս հարցում կողմնորոշվելն իսկապես բարդ է, մանավանդ, որ խնձորանման ու դեղձանման կազմվածքները բավական նման են։ Ներկայացնում եմ հիմնական տարբերանշանները․

• Խնձորանման կազմվածքի պարագայում կոնքերը կրծքի հատվածից ավելի նեղ են լինում։
• Նույնիսկ ավելորդ քաշի բացակայության դեպքում մարմնի վերին հատվածը կլոր կամ օվալ է հիշեցնում։
• Քաշ հավաքելիս ավելորդ կիլոգրամները կուտակվում են կոնքերից վերև՝ որովայնի, ստամոքսի ու իրանի հատվածում։ Մինչդեռ դեղձանման կազմվածքի պարագայում ծանրանում է որովայնը, հետույքն ու կոնքերը։
• Խնձորանման կազմվածք ունեցողները մարմնի վերևի հատվածի հետ համեմատ ավելի բարակ ոտքեր են ունենում։

Ահա, եթե դուք դեռ մեզ հետ եք, անցնենք առաջ։ Մարմնին սլացիկ տեսք հաղորդելու համար երկու նպատակ ենք դնում, նախ՝ ընդգծել ոտքերն ու դեկոլտեն, երկրորդը՝ քողարկել որովայնն ու իրանի բացակայությունը։

• Որովայնի ու իրանի հատվածից ուշադրությունը շեղելու նպատակով խուսափեք կոնքից ներքև սկսվող տաբատներից ու կիսատաբատներից։ Դրանք միայն ընգծում են այն, ինչ ցանկանում եք քողարկել։
• Ասում ենք “ոչ” որովայնի հատվածում տեղեկայված խոշոր պրինտերին, նկարներին ու հնարավոր այլ նախշերին։ Դրանք խոշորացույցի գործառույթ են իրականացնում։
• Շրջանցեք հաստ գոտիները, դրանք շեշտադրում են իրանի բացակայությունը։ Ցանկալի է մախապատվությունը տալ միագույն կտորներին։
• Խուսափեք ինչպես մարմինը կիպ գրկող, այնպես էլ մարմնին ավելորդ ծավալ հաղորդող կտորներից, օրինակ՝ բուկլե, տրիկոտաժ, վիլվետ և այլն։ Հրաժարվեք փայլ ունեցող կտորներից, դրանք միշտ մարմնին ծավալ են հաղորդում։

Ինչպես արդեն ասացինք, խուսափեք կոնքից ներքև գտնվող տաբատներից։ Նախապատվությունը տվեք տաբատների նեղ կամ ներքևում լայնացող մոդելներին։ Շրջանցեք կարճացված տաբատները, դրանք կընդգծեն  մարմնի ծավալուն վերին ու նեղ ստորին հատվածների անհամապատասխանելիությունը։ 

Ցանկալի է , որպեսզի տաբատի շղթան լինի ոչ թե առաջամասում, այլ կողքի հատվածում։ Առաջամասի շղթան որավայնին հավելյալ ծավալ է հաղորդում։ Ընտրեք հետևի հատվածում գրպաններ ունեցող տաբատներ, դրանք կընդգծեն հետույքը, մի փոքր ծավալ կհաղորդեն, հետևապես կհավասարեցնեն  իրանի գիծը։

Շրջազգեստ ու կիսաշրջազգեստ ընտրելիս նախապատվությունը տվեք բարձրիրան ու լայնացող մոդելներին։ Դրանք կազմվածքին ավելի ներդաշնակ տեսք կհաղորդեն ու կքողարկեն իրանի բացակայությունը։ Դրանք կարող են լինել ասիմետրիկ, ունենալ թեք բացվածք կամ կլոր ուրվագիծ։ Կարևորն այն է, որ մարմինը կիպ չգրկեն։ Ինչպիսին պետք է լինի երկարությունը։ Չենք մոռանում խնձոր կառուցվածք ունեցողների գլխավոր հարստության մասին՝ երկար սլացիկ ոտքերի, ուստի և ընդգծում ենք դրանք։

Կիսաշրջազգեստի ու շրջազգեստի երկարությունը կարող է հասնել մինչև ծնկները։ Ուշադրություն դարձրեք նաև կոշիկների ճիշտ ընտրությանը։ Ցանկալի է ընտրել առանց կապիչների կոշիկներ, դրանք ոտքերն ավելի կարճ են ցույց տալիս։

Այս պարագայում նախապատվությունը ևս պետք է տալ բարձրիրան մոդելներին։ Ցանալի է ընտրել v-աձև կամ օվալ բացվածք ունեցող բլուզներ ու տոպեր։ Դրանք կընդգծեն ձեր գեղեցիկ կուրծքն ու ուշադրությունը կշեղեն որովայնի հատվածից։

Բլուզների երկարությունը պետք է հասնի մինչև կոնքերը, նույնիսկ մի փոքր ներքև, ծածկեն հետույքը։ Իրանի հատվածում վերջացող բլուզներն ընդգծում են իրանի բացակայությունը։  

Բլուզներն ու տոպերը թևերի հատվածում կարող են ունենալ նախշեր, կապիչներ և այլն։ Այս հավելյալ տարրերը մարմնի ուրվագիծը  տեսողականորեն ավելի կերկարացնեն։ Այս ամենին կարող եք գումարել բազմաշերտ վզնոց կամ կրծքազարդ, որը կրկին կընդգծի  ձեր կրծքի հատվածը։

Ժակետներն ու վերարկուները խնձորանման կազմվածք ունեցողների համար իսկական շտապ օգնություն են։ Կարծես կախարդական փայտիկի օգնությամբ դրանք մեկ վայրկյանում կարող են քողարկել ձեր մանր ու մեծ գաղտնիքները։ Նախապատվությունը տվեք վերարկուների ու ժակետների միափեղկ, առանց գրպանների ու հավելյալ տարրերի մոդելներին։ Դրանք ևս շատ կարճ չպետք է լինեն, կատարյալ երկարությունը կոնքերը ծածկողն է։

Չմոռանանք կախարդական հնարքի մասին՝ ժակետներն ու վերարկուներն արձակված կրելիս երկու հորիզոնական գծեր են առաջանում, որոնք ի զորու են քողարկել ամեն ինչ։ Ի դեպ, վերարկուի աստառի գույնը պետք է համապատասխանի վերարկուի գույնին։ Գունային կոնտրաստը մատնում է ավելորդ կիլոգրամները։

Ինչպես տեսնում ենք, հրաշագործ նորաձևությունն ունի բոլոր հարցերի պատասխանները,  բոլոր փակ դռների բանալիները նրա մոտ են։

Տաթև Ախայան