Հադրութից փրկված 26 կտավ, խոհանոցային արվեստ ու հյուրասիրություն․ Արցախի օրերը՝ Հայաստանում

КУЛЬТУРА 16 Октябрь, 2024 21:13

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Դիզակ Արտ» մշակութային հասարակական կազմակերպության նախաձեռնությամբ հոկտեմբերի 18-ից 20-ը Երևանում, Մասիս քաղաքում և Կոտայքի մարզի Մեղրաձոր համայնքում տեղի կունենա «Արցախի օրերը» խորագիրը կրող միջոցառումների շարք, որտեղ հանդիսատեսը հնարավորություն կունենա 3 օր հաղորդակից դառնալու արցախյան մշակույթին, խոհանոցային արվեստին ու արհեստներին։

«Դիզակ Արտ» ՄՀԿ համահիմնադիր Երազիկ Հայրիյանը MediaHub-ին պատմեց, որ միջոցառումների շարքը՝ համերաշխության, մերձեցման ու տեղահանված արցախցիներին մեկտեղելու նպատակ ունի։

««Արցախի օրեր» մշակութային միջոցառման մեկնարկը կտրվի Երևանից։ Հոկտեմբերի 18-ին «Կինոյի տանը» տեղի կունենա «Դիզակի գույները» ցուցահանդես և ներկաները կծանոթանան Հադրութից փրկված 26 կտավներին, որոնք շուշեցի նկարիչներ Հովիկ Գասպարյանի, Սամվել Թավադյանի և Գայանե Շուշեցու գործերն են։ Ցավոք, Հադրութում տեղի ունեցած միջազգային սիմպոզիումի հարյուրավոր կտավներից միայն 26-ն է փրկվել, մյուսները մնացել են այնտեղ»,-ասաց Երազիկ Հայրիյանը։

Ցուցահանդեսից հետո հանդիսատեսը կվայելի նաև Արցախի պետական ջազ նվագախմբի կատարումները։

Մեր զրուցակցի խոսքով՝ «Արցախի օրեր» միջոցառման կանգառներն ընտրվել են, հաշվի առնելով նաև այդ վայրերում ապաստանած արցախցիների թիվը։

«Հաջորդ օրվա ծրագիրը կկայանա Մասիս քաղաքի հրապարակում՝ «Դիզակ Արտ» երգի պարի համույթի սաների մասնակցությամբ, կլինի նաև տոնավաճառ-հյուրասիրություն, ժենգյալով հացի վարպետաց դաս։ Փորձը ցույց է տվել, որ այսօրինակ միջոցառումներն ավելի են մերձեցնում արցախցիներին՝ Հայաստանի մեր հայրենակիցների հետ։ Այսպես ավելի հեշտ է ստացվում թե՛ երկխոսությունը և թե՛ ինտեգրումը»,-ընդգծեց Երազիկը։ Նրա հավաստմամբ` Մեղրաձորում նախորդ օրերից կտարբերվի «Արցախի օրեր»-ը։ Այստեղ իրենց կազմակերպությանն է միացել Հայաստանում գործող «Վարք Հայոց» ավանդական երգի պարի համույթը, իսկ երիտասարդների ակտիվ ժամանցի համար «Կժեր» կոչվող տարածքում կկազմակերպվի «Գուպար» ազգային ավանդական խաղերի մրցույթ։

««Գուպար»-ի հիմքը դրվել է Հադրութում։ 2020-ի՝ Հադրութի անկումից հետո այն շարունակել ենք Ասկերանի շրջանի Աստղաշեն և Քյաթուկ գյուղերում։ Ընդհանրապես, բոլոր այն հաջողված ծրագրերը, որոնք հիմնադրել էինք Արցախում, փորձում ենք պահպանել այստեղ։ Չեմ ուզում կենացի պես հնչի խոսքս, բայց պահպանելու եմ այնքան ժամանակ, մինչև հետ կգնանք որ այնտեղ նորից շարունակենք»,-հավելեց «Դիզակ Արտի» համահիմնադիրը։

Ավելացնենք, որ «Արցախի օրեր» միջոցառումների մուտքն ազատ է։

Հունան Թադևոսյան

Առավել մանրամասն` այստեղ.

https://t.me/armenia24live