Մի կողմից տեսնում ենք իշխանության ներկայացուցիչների անպատժելիություն, մյուս կողմից` անպաշտպան ժողովուրդ. Իշխանյան

Կրակոցներ՝ Երևանում, «ռազբորկայի» մասնակիցների թիվն անցնում է 20-ից. կրակել են «Կալաշնիկովից», «Մակարովից». կա վիրավոր

Ավան վարչական շրջանի ղեկավարը ահազանգել է իրավապահներին. տղամարդու են կյանքից զրկել

 Ավազակային հարձակում՝ Երևանում. «Hyundai Sonata»-ից հափշտակել են 36 կգ ոսկյա զարդեր, մոտ 293 մլն ռուբլի և 6 մլն դոլար

Սպանություն և ինքնասպանություն՝ Դիլիջանում

Սրանք նախորդ օրվա քրեական քրոնիկոնից առանձնացված մի քանի վերնագրերն են, ընդ որում` բոլորի վերաբերյալ նախաձեռնվել է քրեական վարույթ, ինչը առերևույթ արձանագրում է, որ նման դեպքեր իրականում եղել են։ Իհարկե, այստեղ կարևոր է նաև անմեղության կանխավարկածը, որը պարզապես չենք դիտարկում։ Երբ քաղաքացին ինքն իր մեթոդներով է խնդիրները հարթում, դա արդեն իսկ խոսում է իրավապահներին չվստահելու մասին։

ՆԳՆ ոստիկանության օպերատիվ-ծառայողական գործունեության 2023 թ. արդյունքների ամփոփմամբ՝ հաշվետու ժամանակահատվածում, հանրապետությունում գրանցված հանցագործությունների ընդհանուր թվաքանակն աճել է 8,1 %-ով կամ 3054 դեպքով: Գրանցված` 40666 հանցագործությունների գերակշիռ մասը` 80,8 %-ը, կազմում են ոչ մեծ և միջին ծանրության հանցագործությունները:

Աճել են սպանության փորձի, մարդկանց թրաֆիքինգի, սեռական անձեռնմխելիության դեմ ուղղված հանցագործությունների, զենք-զինամթերքի ապօրինի շրջանառության, ավազակության, խարդախության, համակարգչային տեխնիկայի միջոցով կատարված հափշտակությունների և կաշառակերության դեպքերը: Միևնույն ժամանակ, նվազել են սպանության, դիտավորությամբ առողջությանը ծանր վնաս պատճառելու, համակարգչային համակարգի անվտանգության դեմ ուղղված, գողության, այդ թվում՝ բնակարանային գողությունների դեպքերը։

Աճել է հրազենի գործադրմամբ կատարված հանցագործությունների թիվը, միևնույն ժամանակ` 292-ով աճել է զենքի և ռազմամթերքի ապօրինի շրջանառության դեպքերի հայտնաբերման թիվը։ Ոստիկանության տարբեր ստորաբաժանումների կողմից ձեռնարկված միջոցառումների արդյունքում` հաշվետու ժամանակահատվածում առգրավվել, հայտնաբերվել և բացատրական աշխատանքների շնորհիվ կամավոր հանձնվել է ընդհանուր 1159 միավոր հրազեն: Բացահայտման տոկոսում հաշվվող` 40598 հանցագործության դեպքերից 26469-ով կամ 65,2 %-ով հայտնի է հանցանք կատարած անձը:

Իրավապաշտպան Ավետիք Իշխանյանը 1or.am-ին ասաց, որ հանցագործությունների աճի հիմնական գործոնը իրավապահ համակարգի ոչ կոմպետենտ աշխատանքն է:

«Հավանաբար, հանցագործություններն այնքան են շատացել, որ դրանք անհնար է թաքցնել։ Հանցագործությունների աճը, իմ համոզմամբ, պայմանավորված է այն հանգամանքով, որ Հայաստանի իրավապահ մարմինները ոչ թե զբաղված են իրենց անմիջական պարտավորություններով, այն է՝ կանխարգելել և բացահայտել հանցագործությունները, այլ կատարում են վարչապետ կոչեցյալի քմահաճույքները։ Նկատի ունեմ, շինծու քրեական գործերի հարուցումն ու մեղադրանքների առաջադրումն ընդդիմադիր գործիչների նկատմամբ, նրանց դաժանորեն, ցուցադրական ձերբակալումները։ Հայաստանի ողջ իրավապահ համակարգը՝ ՆԳՆ, քննչական մարմիններ, դատախազություն, դատարաններ, վերածվել են իշխանությանը սպասարկող կառույցների։ Հավանաբար, քրեական աշխարհը զգում է, որ իրավապահ մարմինները զբաղված են ոչ իրենց անմիջական գործառույթներով և ակտիվացել են։ Չեմ բացառում նաև, որ չբացահայտված հանցագործությունների դեպքում` գործում է վենդետան։

Ցանկացած երկրում, տվյալ երկրի քաղաքական վիճակից ուղղակիորեն կախված է հանցագործությունների քանակն ու աճի միտումը։ Հայաստանը վերածվել է մի գավառական բռնապետական երկրի, որտեղ մի կողմից տեսնում ենք իշխանության ներկայացուցիչների անպատժելիություն, մյուս կողմից` անպաշտպան ժողովուրդ։ Դրա վառ ապացույցներից է 2022 թվականին Ապարանում երեք երիտասարդների սպանությունը, որը կոծկվեց նույն իրավապահ համակարգի կողմից»,- եզրափակեց Ավետիք Իշխանյանը։