«Սիներջիի» կալանավորված աշխատակիցների փաստաբանները վերաքննիչ բողոք կներկայացնեն դատարան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Առերեւույթ կոռուպցիոն չարաշահումների գործով կալանավորված «Սիներջի» ընկերության աշխատակիցների փաստաբանները եկող շաբաթ վերաքննիչ բողոք կներկայացնեն դատարան։ «Հրապարակ»-ի հետ զրույցում այս մասին ասաց «Սիներջի» ընկերության կալանավորված աշխատակիցներից Լիլի Մկրյանի պաշտպան Էրիկ Ալեքսանյանը։

Այս գործով օրեր առաջ Հակակոռուպցիոն դատարանը կալանավորեց նաեւ ընկերության տնօրեն Աշոտ Հովհաննիսյանին եւ ծրագրերի ղեկավար Անի Գեւորգյանին, որը ԱԺ նախագահ Ալեն Սիմոնյանի եղբոր կինն է։ Որքան էլ տարօրինակ է՝ վարույթն իրականացնող մարմինը գործով անցնող բարձրաստիճան պաշտոնյաների՝ Էկոնոմիկայի նախկին փոխնախարար Անի Իսպիրյանի  եւ վարչության պետ Լիլյա Սիրականյանի նկատմամբ շատ ավելի մեղմ վարվեց։ Իսպիրյանին տվեցին տնային կալանք, իսկ Սիրականյանին, ըստ լրատվամիջոցների, երկրից չբացակայելու արգելք։

Էրիկ Ալեքսանյանի խոսքով՝ «Սիներջի» ընկերության աշխատակիցների նկատմամբ՝ վարույթն իրականացնող մարմինը ընտրել է ամենախիստ խափանման միջոց կալանքը՝ իբրեւ անձանց պատշաճ վարքագիծը ապահովելու համար, այն հիմնավորմամբ, որ գործին խոչընդոտելու հիմքը մեծ մակարդակում է գտնվում, մինչդեռ դրա հիմքերը չկան։

Ըստ վարույթն իրականացնող մարմնի՝ խոչընդոտելու հիմքն այնքան բարձր մակարդակի վրա է, որի զսպումը կարող է լինել միայն կալանքով։ Խոչընդոտելու հիմք է համարվում՝ նոր հանցանք կատարելը, փախուստի դիմելը եւ քննությանը խոչընդոտելը։ Փաստաբանի խոսքով՝ վարույթն իրականացնող մարմնի պնդումները հիմնավոր չեն, որովհետեւ գործի մեջ կան գաղտնալսումներ։

«Այդ գաղտնալսումների մեջ երեւում է՝ ով ինչ է արել, երեւում է նաեւ ժամանակահատվածը, հաջորդականությունը, գործողությունների բնույթը, բազմաթիվ մարդկանց միջեւ առկա խոսակցությունների բովանդակությունը։ Եթե կա այս ամենը, խոչընդոտելու հիմքը ո՞րն է։ Ըստ վարույթն իրականացնող մարմնի՝ կալանավորված անձինք կարող էին գործին խոչընդոտել՝ ցանկալի ցուցմունքներ ստանալու համար։ Եթե առկա են գաղտնալսումներ, որտեղ ամեն ինչ երեւում է, ապա ինչպես կարող են ստանալ ցանկալի ցուցմունքներ»,-հիմնավորեց փաստաբանը։

Քրեական դատավարության օրենսգրքով՝ խափանման միջոցի հարցի քննարկման ժամանակ քննիչն ի թիվս այլ հանգամանքների պետք է հաշվի առնի նաեւ մեղադրյալի սեռը եւ ընտանեկան դրությունը։ Այս նուրբ հանգամանքը հաշվի չի առնվել, կալանավորված երկու կանայք ունեն մանկահասակ երեխաներ։
«Այս դեպքում գործ ունենք տիկնանց հետ, ովքեր ունեն անչափահաս երեխաներ։ Ընտանեկան դրությունը եւս պետք է հաշվի առնել, իսկ այս պարագայում հաշվի չի առնվել։ ՀՀ նոր օրենքով ընդլայնված խափանման միջոցների ցանկ է նախատեսված, այդ թվում՝ տնային կալանքը, որը նախատեսված է այն բանի համար, որ հասարակությունը չընկալի կալանքը որպես պատժիչ միջոց։ Մենք տեսնում ենք, որ համատարած կալանքներ են կիրառվում՝ հաշվի չառնելով անձի սեռը, ընտանեկան դրությունը»,-ասաց Ալեքսանյանը։

Անդրադառնալով փոխախարարի նկատմամբ կրառված մեղմ խափանման միջոցին՝ Ալեքսանյանը նկատեց․ «Անի Իսպիրյանը մեղադրվում է լիազորությունները անցնելու մեջ, «Սիներջիի» աշխատակիցները՝ օժանդակելու։ Եթե իրավական առումով նայենք՝ իմ պաշտպանյալն ավելի մեղմ կարգավիճակում է գտնվում։ Բայց թե ինչու Անի Իսպիրյանի նկատմամբ տնային կալանք կիրառվեց, իսկ «Սիներջիի» աշխատակիցների դեպքում՝ կալանք, թո՛ղ դատական համակարգը տա այդ հարցի պատասխանը»։

Ալեքսանյանը նշեց, որ Հակակոռուպցիոն դատարանի որոշումը երկուշաբթի կբողոքարկենք Վերաքննիչ դատարան։

Հիշեցնենք, ՀՀ քննչական կոմիտեն հայտնել էր, որ էկոնոմիկայի նախարարության մի քանի պաշտոնյաներ, նախնական համաձայնությամբ, մի խումբ անձանց դրդմամբ և օժանդակությամբ, չարաշահել են ծառայողական լիազորությունները և «Հանրային ներդրումային ծրագրերի բանկի ստեղծման» մրցույթի ընթացքում ընկերություններից մեկի հաղթանակն ապահովելու համար մյուսին համարել են պայմաններին չհամապատասխանող ու հեռացրել:
 
Ըստ քննչական կոմիտեի՝ հաղթող է ճանաչվել մրցակցից շուրջ երեք անգամ ավելի՝ 392 մլն դրամ գնային առաջարկ ներկայացրած ընկերությունը: Սակայն մրցույթը չեղարկվել է և ոչ մի դրամ բյուջեից չի վճարվել ոչ մեկին: Այսինքն, պետությանը վնաս չի հասցվել, բայց 3 անձ կալանավորված է:

Մյուս քրեական վարույթով պարզվել է, որ Էկոնոմիկայի նախարարության պաշտոնատար անձը, ինտենսիվ այգիների հիմնման պետական աջակցության ծրագրի շահառուի հետ մտերիմ հարաբերություններ ունենալով և իմանալով նրա ծանոթներին, 2022-23 թվականներին ծրագրի պահանջներին չհամապատասխանող փաստաթղթեր ներկայացրած շահառուների ֆինանսական փոխհատուցումը չի մերժել, զեկուցագրեր է ներկայացրել, որ նրանց կատարած աշխատանքը համապատասխանում է չափորորշիչներին։ Ըստ գործի նյութերի՝ այդ քաղաքացիներին անհիմն փոխհատուցվել է մոտ 238,5 մլն դրամ: Սակայն թե ինչ խափանման միջոց է կիրառվել մյուս դրվագով խարդախության մեջ մեղադրվող Վ. Դ-ին պատմությունը լռում է: