Ռուբեն Վարդանյանի խոսքը գործին հավասար է և ամեն անգամ ապացուցել է այդ ճշմարտությունը

Արցախի նախկին պետնախարար Ռուբեն Վարդանյանը ուշագրավ և չափազանց կարևոր մի գրառում է կատարել իր ֆեյսբուքում, նշել, թե Արցախում գտնվելու ընթացքում բազմաթիվ ոգեշնչող պատմություններ է լսել մեր ժողովրդի պայքարի մասին։ Այդ պատմություններից մեկը Կամո Սաֆարյանի մասին է, մարդ, որը կանգնած է եղել արցախյան շարժման ակունքներում։

«Այդ պատմությունն ինձ խորապես հուզել է և ես այն պատմեցի տեսակամուրջի ժամանակ, ուզում եմ այս հարթակում ևս պատմել, քանի որ կարծում եմ շատ կարևոր է, որ բոլորս այդ մասին իմանանք։ 35 տարի առաջ երիտասարդ Կամոյին հաջողվում է մեծ գումարի դիմաց ձեռք բերել Վահան Թոթովենցի «Զորավար Անդրանիկ և նրա պատերազմները» գրքի բացառիկ և խիստ արժեքավոր հրատարակությունը։ Կամոն և նրա ընկերները գիրքը տանում են Ամարաս և այդ սուրբ վայրում գրքի վրա երդվում են՝ երբեք չնահանջել Արցախն ազատագրված տեսնելու երազանքից,- գրում է Արցախի նախկին պետնախարարը։

Ռուբեն Վարդանյանի խոսքով՝ «համաշխարհային ճգնաժամի և աշխարհակարգի փոփոխության ժամանակ ավելի կարևոր է դառնում սեփական արմատների, ավանդույթների նկատմամբ հարգանքի վերածնունդը, հատկապես երդման պարտավորության գիտակցված պատասխանատվության հանդեպ, իսկ ամենակարևորը սեփական խոսքի նկատմամբ հարգանքին վերադառնալն է, չէ՞ որ ինչպես գրված է Աստվածաշնչում՝ «Խոսքը, հենց Աստվածն է» և մեր ամենախիստ դատավորը հենց մենք ենք, քանի որ չենք կարող խաբել ինքներս մեզ»,- նշում է Ռուբեն Վարդանյանը։

Նա նշել է, թե՝ «Ամարասում երդում տված տղաներից ոմանք զոհվել են, ոմանք չեն կարողացել խոստումը պահել, ոմանք առ այսօր շարունակում են իրենց պայքարը, սակայն կարևորն այն է, որ նրանց գործը շարունակվում է նաև այսօր, ես համոզված են,որ այսօրվա երիտասարդներին փոխանցելով այն արժեքները, որոնք ժառանգել ենք մեր նախնիներից, այն հավատը, որ նվիրական է մեզ համար, մենք կարող ենք ցանկացած դժվարություն հաղթահարել և այսօրվա երիտասարդ սերունդն արժանի կերպով կշարունակի այն գործը, որ սկսել են իրենց հայրերը»,- փաստում է Արցախի նախկին պետնախարարը։

Նա բազմիցս նշել է, որ իր համար իր խոսքը գործին հավասար է և ամեն անգամ ապացուցել է այդ ճշմարտությունը։

Նորայր Կարապետյան