Աերոգրիլ կամ՝ ունիվերսալ «կոնվեկցիոն վառարան». «Փաստ»

«Փաստ» օրաթերթը գրում է

Ներկայում կարելի է գտնել խոհանոցային բազմաթիվ սարքավորումներ և տեխնիկա, որոնք մեծապես նպաստում են սննդի պատրաստման գործընթացին: Այդ սարքերից մեկը կոնվեկցիոն վառարանը կամ, այլ կերպ ասած, աերոգրիլն է: Այդ սարքը ստեղծվել է 1980-ականների կեսերին Միացյալ Նահանգներում: Ամերիկացիները փողոցում և այլ վայրերում պիկնիկների՝ խնջույքների բուռն սիրահարների առաջին շարքերում են: Աերոգրիլը ստեղծվել է այն բանի համար, որ մարդիկ տարվա ցանկացած ժամանակ կարողանան գրիլ օգտագործել ինչպես խոհանոցում, այնպես էլ խոհանոցից դուրս: Տեխնոլոգիայի կատարելագործման հետ մեկտեղ, այս տեխնիկան նույնպես բարելավվել է: Այժմ աերոգրիլը ունիվերսալ խոհանոցային այնպիսի մի սարք է, որը կարող է ինչ-որ բան տաքացնել, թխել, ծխեցնել, չորացնել, հալեցնել և նույնիսկ նախապատրաստել ապակե տարաները պահածոներ պատրաստելու համար: Աերոգրիլի գործողության սկզբունքը բավականին պարզ է:

Սարքի մեջտեղում տեղակայված է ջեռուցող տարրը, որը ջեռուցման գործընթացի հիմքն է: Օդը, որ բոլոր ուղղություններով պտտվում է սարքի մեջ, տաքանում է մինչև որոշակի ջերմաստիճան, իսկ օդափոխիչը օգնում է այն ուղղորդել դեպի պատրաստվող սնունդը, ընդ որում՝ այն ջերմային մշակման է ենթարկվում հավասարաչափ: Այս սարքի առաջին անվանումը եղել է «կոնվեկցիոն վառարան»: 1996 թվականին «Յոթ բլուր» ընկերությունը, որն առաջինն է նման սարք արտադրել Ռուսաստանում, որոշել է դրան տալ նոր անուն՝ «աերոգրիլ»: Չնայած, եթե «aerogrill» բառը արտասանեք անգլերեն, ապա այն բոլորովին այլ իմաստ է ստանում: Ինչպես արդեն նշվեց, մի քանի գործառույթների համար նախատեսված աերոգրիլը ժամանակի ընթացքում դարձել է ունիվերսալ: Այդ գործառույթներն են՝ ցանկացած կերակուր շոգեխաշելու և գոլորշով տապակելու ունակությունը, մսի և ձկան ապխտումը: Սա այդ սարքի ֆունկցիոնալ հնարավորությունների ամբողջ ցանկը չէ:

2000-ականների սկզբից աերոգրիլը սկսել է ավելի ու ավելի հաճախ հայտնվել մարդկանց տներում: Խոհանոցում տնային տնտեսուհիները սկսել են նախապատվությունը տալ հենց դրան՝ իր դրական կարողությունների պատճառով, բայց ամենակարևոր չափանիշը եղել է ունիվերսալությունը: Ինչո՞ւ գնել տարբեր սարքեր, եթե աերոգրիլը ամեն ինչ կատարում է: ԱՄՆ-ի բնակիչները հաճախ են տառապում ճարպակալումից, և աերոգրիլը հնարավորություն է տալիս ուտել առողջ սնունդ: Խոհարարական գործընթացները տեղի են ունենում առանց յուղի մասնակցության, ուստի սնունդը ստացվում է պակաս յուղոտ և վնասակար մարդու օրգանիզմի համար: Ժամանակին որոշ մարդիկ ընդհանրապես տանը չէին պատրաստում և օգտվում էին «արագ սննդից», բայց, ձեռք բերելով աերոգրիլ, ամեն ինչ փոխվում է, դրանով պատրաստելու համար հատուկ խոհարարական հմտություններ պետք չեն՝ միաժամանակ լցվում են բոլոր բաղադրիչները, և վերջում ստացվում է պատրաստի ուտեստը:

Աերոգրիլի թերություններից են մեծ քանակությամբ էլեկտրաէներգիայի օգտագործումը, սննդի ավելի դանդաղ պատրաստումը, քան միկրոալիքային վառարանով, և սարքի՝ արտաքինից տաքացումը, որը վտանգավոր է, եթե տանը փոքրիկներ կան։ Աերոգրիլներ արտադրվում են ԱՄՆ-ում, Գերմանիայում, Չինաստանում, Ճապոնիայում և այլ առաջատար երկրներում: Ներկայում դրանց տեսականու հսկայական քանակության շնորհիվ հեշտ է գնել այն մատչելի գնով և յուրաքանչյուրին հարմար գործառույթներով:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում