Կալիֆոռնիայում առնվազն 14 մարդ է զոհվել հրաձգության հետեւանքով

МЕЖДУНАРОДНОЕ 3 Декабрь, 2015 13:10

Անհայտ անձինք դեկտեմբերի 2-ին հրաձգություն են իրականացրել Կալիֆոռնիայի Սան Բեռնարդինո քաղաքում, ինչի հետեւանքով, ըստ նախնական տվյալների, զոհվել է 14 մարդ, եւս 17-ը վերքեր են ստացել, նրանց բոլորին տեղափոխել են հիվանդանոցներ, տեղեկացնում է «Արմենպրես»-ը՝ հղում անելով BBC-ին:

Սկզբում հարձակվողներին հաջողվել է թաքնվել, սակայն ոստիկանությունը հետապնդել է նրանց, ինչի արդյունքում հարձակման մեջ կասկածվողներից երկուսը գնդակահարվել են: Խոսքը վերաբերում է մի տղամարդու եւ մի կնոջ: Վիրավորվել է մեկ ոստիկան:

Առայժմ չի հաջողվել պարզել հարձակվողների ինքնությունը: Հնարավոր է, որ նրանցից մեկն ազատության մեջ է մնում:

Հրաձգությունը տեղի է ունեցել այն շենքում, որտեղ գտնվում է Inland Regional Centerոչ կառավարական կազմակերպությունը, որն օգնում է զարգացման շեղումներ ունեցող մարդկանց:

Ականատեսների ասելով՝ անհայտ անձինք՝ զինվորական համազգեստը հիշեցնող հագուստով, զրահաբաճկոններով եւ ինքնաձիգ զենքով, կրակ են բացել շենքում գտնվող մարդկանց վրա:

Ինչպես հայտարարել է ոչ կառավարական կազմակերպության նախագահ Մեյբեթ Ֆիլդը, հարձակումը տեղի է ունեցել սրահում, որտեղ տոնական միջոցառում էր անցկացվում, որը կազմակերպել էր Սան Բեռնարդինոյի հանրային առողջապահության դեպարտամենտը:

Հրաձգությունից հետո հարձակվողները կարողացել են դուրս գալ շենքից եւ հեռանալ սեւ արտաճանապարհայինով:

Ոստիկանությունն սկսել է հետապնդել նրանց եւ ավելի ուշ հայտնել է, որ կասկածյալներից մեկը գնդակահարվել է այն բանից հետո, երբ փորձել է դիմադրություն ցույց տալ: Մոտավորապես մեկ ժամ հետո տեղական ոստիկանության պետ Ջերոդա Բուրգուանը հայտարարել է, որ գնդակահարված են հարձակվողներից երկուսը: Նշվել է, որ խոսքը վերաբերում է մի տղամարդու եւ մի կնոջ: Ընդսմին պարզ չէ՝ եղել է արդյոք երրորդ հարձակվողը:

Ոստիկանապետը նաեւ ասել է, որ, իր տվյալներով, զոհվածների մեջ երեխաներ չկան եւ, որ «հանցագործները մանրակրկիտ պլանավորել էին հարձակումը»:

Պատահածի հետաքննությանը ներգրավվել է Հետաքննությունների դաշնային բյուրոն: Բյուրոյի մասնագետները չեն բացառում, որ պատահածն ահաբեկչական գործողություն է:

ԱՄՆ-ի նախագահ Բարաք Օբաման, որը վաղուց է հանդես գալիս երկրում զենքի վաճառքի սահմանափակման օգտին, արագորեն արձագանքել է Սան Բեռնարդինոյում տեղի ունեցածին:

«Հասկանալի է, որ այս երկրում տեղի են ունենում հրազենի կիրառմամբ այնպիսի զանգվածային սպանություններ, որպիսիք աշխարհում չկա ոչ մի տեղ,- հայտարարել է նա:- Եվ կան քայլեր, որոնք մենք կարող ենք ձեռնարկել, որպեսզի, եթե ամբողջովին չխուսափենք էլ նման միջադեպերից, ապա գոնե այնպես անենք, որ դրանք այդքան հաճախակի չլինեն»: