«Սննդի հար­ցում մեզ սահ­մա­նա­փա­կե­լու ժա­մա­նա­կը չէ, օր­գա­նիզ­մը պետք է ապա­հո­վենք հա­մա­պա­տաս­խան վի­տա­մին­նե­րով»

Տանն աշխատելու, սովորելու կամ էլ ուղղակի որոշակի ժամանակ մեկուսացած լինելու պայմաններում ակնհայտ է, որ փոփոխություններ կլինեն նաև մեր քաշի հետ կապված: Շատերն իրենց քաշի ավելացումը կարողանում էին կարգավորել մարզասրահներ և լողավազաններ այցելելով, ոմանք էլ օրվա ընթացքում տարբեր ժամերի երկար քայլելով, մյուսներն էլ խիստ դիետաների ու սննդակարգի հետևելով: Այսօր արդեն մենք ունենք այլ իրավիճակ: Որքան էլ մտածենք մեր քաշի պահպանման մասին, առաջին տեղում պետք է լինի նաև օգտակար, վիտամիններով հարուստ ուտելիքներով սնվելը, քանի որ կարևոր ևս մեկ խնդիր պետք է լուծենք՝ այն է, որ մեր օրգանիզմի դիմադրողականությունը բարձր լինի, ինչի օգնությամբ նվազագույնի կհասցնենք տարատեսակ վիրուսներով վարակվելու հավանականությունը: 

Էկոկենտրոնի սննդի ռիսկերի կենտրոնի ղեկավար, սննդագիտության դոկտոր (Իտալիա) Դավիթ Պիպոյանը «Փաստի» հետ զրույցում պարզաբանում է, թե այս օրերին սննդի հարցում հատկապես ինչին է պետք մեծ ուշադրություն դարձնել: Նա կարծիք է հայտնում, որ հարցի էսթետիկ կողմը պետք է գոնե հիմա կորցնի իր կարևորությունը:

«Այսօր մենք ունենք շատ ավելի կարևոր խնդիր՝ օրգանիզմի դիմադրողականությունը: Հիմա դիետաներ պահելու և սննդի հարցում մեզ սահմանափակելու ժամանակը չէ, որովհետև ապացուցողական սննդագիտությունը հստակ նշում է՝ մասնավորապես աղիների միկրոբիոտան ունի կարևոր դեր և նշանակություն օրգանիզմի դիմադրողականության և, բնականաբար, վիրուսային հիվանդությունների դեմ պայքարի գործընթացում: Այդ առումով շատ կարևոր է օրգանիզմն ապահովել համապատասխան, մասնավորապես՝ A, C, E, D վիտամիններով: 

Այստեղ հիմնական գործիքակազմը, որը պետք է պահպանել, պտուղ-բանջարեղենի կիրառությունն է, այսինքն՝ օգտագործել վիտամիններով հարուստ մրգեր, պտուղ-բանջարեղեն, նաև հատիկեղեն և ընդեղեն»,-ասում է Պիպոյանը:

Գաղտնիք չէ, որ երբ ստիպված ես լինում տանը շատ ժամանակ անցկացնել, տան մեջ գնում-գալիս ես և ինչ-որ բան ուտում՝ շատ դեպքերում անգամ բոլորովին էլ քաղցած չլինելով: Պիպոյանը ևս անդրադառնում է այս խնդրին: «Բոլոր հետազոտությունները ցույց են տալիս, որ երբ մարդը շատ ժամանակ է անցկացնում տանը կամ էլ սթրեսային օրերին, ժողովրդական լեզվով ասած, «անընդհատ բերանն ուտելիք է գցում», իսկ այդ ուտելիքը մեծամասամբ չի նպաստում օրգանիզմի դիմադրողականության բարձրացմանը, որովհետև, որպես կանոն, դրանք շոկոլադե սալիկներ են, չիպսեր և այլն, ամեն դեպքում, ուտելիքներ, որոնք չեն համարվում էներգիայի առողջ աղբյուր:

 Այս առումով հարկավոր է շեշտել՝ սեղանը պետք է մաքրել նմանատիպ ուտելիքներից և փոխարինել դրանք չրերով, մրգերով, ընկուզեղենով և այն սնունդով, որը դրական ազդեցություն է թողնում մեր օրգանիզմի վրա: Շատ կարևոր է պրոբիոտիկների դերը, հետևաբար կարևոր է կաթնաթթվային մթերքների՝ մածունի, կեֆիրի, յոգուրտների օգտագործումը»,-նշում է մեր զրուցակիցը:

Պիպոյանն այս կոնտեքստում անդրադառնում է ևս մեկ խնդրի, այն է՝ երկարատև սթրեսին: «Շատերիս համար այս վիճակն անսովոր է: Ինքս վերջին 11 տարվա ընթացքում երբեք այսքան երկար ժամանակով տանը չէի մնացել: Բնականաբար, երբ փոխվում է մարդու կենսակերպը, փոխվում է մարդու առօրյան, մասնավորապես, եթե խոսքը 1-2 օրվա մասին չէ, երկարատև սթրեսը բերում է դիմադրողականության անկման: 

Դրա համար շատ կարևոր է, որ բարձր պահենք մեր տրամադրությունը, որովհետև կա երկու կարևոր գործոն. դա մեր տրամադրությունն է, որպեսզի սթրեսային գործոնը հաղթահարենք, և երկրորդը՝ մեր աղիների առողջ կենսագործունեությունն է և առողջ միկրոբիոտան: Այդ առումով նորից շեշտեմ, որ կարելի է օգտագործել տաք շոկոլադ կամ էլ բնական շոկոլադ, շոկոլադե սալիկներ: 

Ապացուցված է, որ դրանք ևս բարձր տրամադրության ապահովման համար շատ լավ միջոցներ են: Չենք մոռանում նաև տաք հեղուկների մասին, որոնք կարելի է համադրել օրգանիզմի դիմադրողականությունը բարձրացնող կիտրոնով, կոճապղպեղով, դարչինով և այլ համեմունքներով: Պետք է օրվա ընթացքում անպայման օգտագործել առնվազն մեկ լիտր այս հեղուկներից: 

Հարկավոր է հաշվի առնել մի կարևոր հանգամանք ևս, որ մինչև ապրիլի 16-ը արտակարգ դրություն է լինելու, հետևաբար՝ մարդը պետք է սովորի այս նոր ռեժիմին: 

Բնական է, որ աշխատանքի ժամին դու անընդհատ ընդմիջում անելու հնարավորություն չունես, օրինակ՝ ընդմիջում սովորաբար անում ենք ժամը 1-2ն ընկած ժամանակահատվածում, և փաստացի ստացվում է, որ մեր սննդակարգը շատ ավելի կանոնակարգված է լինում, քան տանից աշխատելու պարագայում: 

Բայց այս դեպքում կարևոր է գիտակցել, որ մենք պետք է ունենանք սնման կանոնավոր ռիթմ՝ նախաճաշ, ճաշ և ընթրիք: Իհարկե, կարելի է միջուտեստներ անել, բայց նորից պետք է շեշտեմ, որ ցանկալի է դրանք հարուստ լինեն վիտամիններով, մասնավորապես՝ մրգերով, չրերով և օրգանիզմի դիմադրողականության վրա դրական ազդեցություն ունեցող մթերքներով»,-եզրափակում է Դավիթ Պիպոյանը:

ԼՈՒՍԻՆԵ ԱՌԱՔԵԼՅԱՆ