«Ֆուտբոլն առաջին հերթին դաստիարակություն է». «Բանանցը» ևս չորս տարով պայմանագիր կնքեց գլխավոր մարզչի հետ

Past.am

Այսօր «Բանանց» ֆուտբոլային ակումբի մարզահամալիրում ակումբի տնօրեն Հրաչ Աղաբեկյանը և թիմի գլխավոր մարզիչ Իլշատ Ֆայզուլինը նոր պայմանագիր ստորագրեցին: Նախ, նշենք, որ արարողությունը, որին ներկա էր ակումբի  սեփականատեր ՋևանՉելոյանցը, աչքի ընկավ իր ընդգծված կազմակերպվածությամբ: Երևի թե հայաստանյան ֆուտբոլի համար սա եզակի դեպք է, երբ պայմանագիրը կնքվում է հրապարակայնորեն, ոչ թե ԶԼՄ-երը դրա մասին տեղեկանում են պաշտոնական հաղորդագրության միջոցով: Հիմա՝ ամեն ինչ հերթականությամբ:

 «Բանանց» ՖԱ-ն երկարաձգեց պայմանագիրը գլխավոր մարզչի հետ

Հրաչ Աղաբեկյանը և Իլշատ Ֆայզուլինը ստորագրեցին պայմանագիր, որի համաձայն Ֆայզուլինը կշարունակի մարզել «Բանանցը» ևս 4 տարի:

«Որոշել եմ չորս տարով երկարաձգել պայմանագիրը գլխավոր մարզչի հետ: Կարծում եմ, որ սա ամենաերկարատև պայմանագրերից մեկն է հայկական ֆուտբոլում: Երբ պայմանագիր ես կնքում նշանակալի մարդկանց հետ, պետք է դա միշտ բաց անել, ոչինչ չթաքցնել: Կարող ենք հրապարակել պայմանագրի բոլոր կետերը, բացի աշխատավարձի չափից:  Ուզում ենք, որ սա ավանդույթ դառնա Հայաստանում: Հենց այդ պատճառով այսօր կազմակերպել ենք պայմանագրի հրապարակային երկարաձգում», -նախքան պայմանագրի ստորագրումն ասաց ակումբի սեփականատեր Ջևան Չելոյանցը:

Պայմանագրի ստորագրումից հետո ակումբի գլխավոր տնօրենը մարզչին փոխանցեց նրա անունով մարզաշապիկը:

Չելոյանցը մանրամասնեց՝ ինչո՞ւ է պայմանագիրը երկարաձգվել

«Ինձ դուր է գալիս, թե ինչպես է նա աշխատում: Ցավոք, ֆուտբոլում կան շատ մարդիկ, որոնք գալիս են գումար աշխատելու: Դրանում որևէ վատ բան չկա, բայց երբեմն այն մարդկանց մեջ, որոնք գալիս են գումար աշխատելու, համատեղվում է և այլ հատկանիշ. մարդիկ ցանկանում են  զարգանալ ակումբի հետ, իրենց ունեցածը փոխանցել ակումբին և ձեռք բերել փորձ: Սա հոգեբանական գործոնն է, ինչը մեծ նշանակություն ունի: Բացի դա, Ֆայզուլինը լավ մասնագետ է, և եթե անգամ մենք չգրավենք որևէ տեղ և մեդալներ, դա չի ազդի մեր որոշման վրա: Եթե մարդը նորմալ աշխատում է, նվիրված է իր գործին, նա պետք է շարունակի աշխատել», - ասում է Չելոյանցը:

Ի՞նչն է խանգարում ակումբին պայքարել չեմպիոնության համար

«Մանրամասների մեջ չեմ մտնի, թե ինչն է խանգարում կամ չի խանգարում ակումբին չեմպիոն դառնալ, քանի որ դա ինձ ուղղված հարց չէ: Դա գլխավոր մարզչի և տնօրենի գործն է: Իմ պարտականությունն է ակումբում ստեղծել մթնոլորտ և միջավայր, որ չեմպիոնությունը հնարավոր դառնա: Սա սպորտ է, երբեմն, ցավոք, ոչ միայն սպորտ: Կարծում եմ, սակայն, եթե գնում ենք դեպի մեր նպատակը, անպայման կհասնենք դրան: Այո, ուզում ենք չեմպիոն դառնալ, բայց նախքան դա պետք է նորմալ ակումբ ստեղծենք: Սա առաջին խնդիրն է: Չեմ ցանկանում որևէ մեկին նեղացնել, բայց առայժմ Հայաստանում չկա ոչ մի նորմալ ակումբ: Ահա և ամբողջը», - նշում է ակումբի սեփականատերը:

Նոր մրցաշրջանում՝ արդեն «Ուրարտու»

Չելոյանցն ասում է, որ ակումբի վերանվանման հարցում որևէ բան ինքը չի որոշել: Որոշումը կայացրել են երկրպագուները: Կայքում իրականացրել են քվեարկություն, և երկրպագուների մեծամասնությունը քվեարկել է  «Ուրարտու» անվան օգտին: Սա նրանց ցանկությունն է, այնպես որ, նոր մրցաշրջանում արդեն «Բանանցը» հանդես կգա նոր անունով:

Որ այսօր ավելի լավը լինեն, քան երեկ էին

«Ուզում եմ շնորհակալություն հայտնել «Բանանց» ակումբին վստահության համար, որը ոչ մեկ տարվա պատմություն ունի: Աշխատանքն այնպես պետք է կազմակերպենք, որ, ի դեմս արդեն «Ուրարտուի», ունենանք մարտունակ ակումբ, որը պատրաստ կլինի հասնել իր առջև դրված նպատակներին: Պետք է տեխնիկապես թարմացնել և բարելավել ակումբը և դրա ենթակառուցվածքները: Այս ամենը պետք է արվի աստիճանաբար: Ամեն խաղացող, որը կգա մեր ակումբ, ինչպես և ներկայիս ֆուտբոլիստները, պետք է հասկանան, որ այս ակումբում պետք է հասնեն մեծ նպատակների: Առաջինը և ամենակարևորը պետք է լինի մարտունակ թիմ ունենալը: Ուզում եմ, որ յուրաքանչյուր խաղացող, որը դուրս է գալիս խաղադաշտ, և՛ մարզումների ժամանակ, և՛ պաշտոնական խաղերին, հստակ աշխատանք ցույց տա և ներդնի իր առավելագույն հնարավորությունները», - ասում է Ֆայզուլինը:

Նա նշում է, որ նախքան «Բանանցի» մարզիչ դառնալը երկու տարի աշխատել է ակադեմիայում: «Այդ ընթացքում շատ երիտասարդ մասնագետներ միացան «Բանանց» ակումբին: Հիմա ֆուտբոլի ֆեդերացիան ևս քայլեր է ձեռնարկում, որ Հայաստանում երիտասարդ, կրթված մասնագետներ աշխատեն: Այս աշխատանքի շնորհիվ հնարավորություն ունեցա աշխատել առաջին թիմի հետ: Եղել եմ ֆուտբոլիստ, այնուհետև՝ մարզիչ, իսկ հիմա ակումբն ինձ հնարավորություն տվեց շարունակել կիրառել իմ գիտելիքները, ինչն անում եմ վերջին ութ ամսվա ընթացքում: Իմ նպատակն է միավորել ակումբի բոլոր խաղացողներին և անել ամեն ինչ, որ նրանք այսօր ավելի լավը լինեն, քան երեկ էին: Սա ապագայի լավագույն հիմքն է: Այսպիսով՝ ակումբն էլ արդյունքներ և հաղթանակներ կգրանցի:

Հայկական ակումբներից որևէ մեկը եվրոպական արենայում լուրջ հաջողություն չի գրանցել

«Ռուսական ասացվածք կա՝ «Надо шагать так, чтобы не порвать штаны»: Չի կարելի առանց ակումբ կառուցելու ինչ-որ տեղ թռչել: Ամեն տեղ կարևոր է հիմքը: Մեր հիմքը մեր երեխաներն  են, և մեր նպատակն այն է, որ առաջին թիմը խաղա այնպես, ինչպես խաղում է ակադեմիան: Մասնագետներն ինձ կհասկանան: Խոսքը ոչ թե խաղի որակի, այլ տակտիկայի և ստրատեգիայի մասին է: Սա երկարատև նախագիծ է: Կարծում եմ, որ կնքված պայմանագրի ժամկետներում առավելագույն հաջողություններ կգրանցենք ոչ միայն Հայաստանում», - եվրոպական մրցաշարերում հաջողություններ գրանցելու մասին հարցին այսպես է արձագանքում Չելոյանցը:

Անդրադարձ «Բանանց»- «Լոռի» խաղին. հնարավո՞ր է «Բանանցը» նորից բոյկոտի խաղը

«Ասել եմ և նորից կկրկնեմ՝ եթե մրցավարը լինի նույնը, մենք չենք խաղա: Կողմնակալ մարդիկ ֆուտբոլում չպետք է աշխատեն: Դա վերաբերում է ոչ միայն այդ մրցավարին, բայց առաջին հերթին հենց նրան: Բացի դա, ես չեմ արգելել թիմին խաղալ: Խորհրդակցել եմ նրանց հետ և հարցրել՝ որպես մարդ ձեզ համար ի՞նչն է կարևոր՝ ցուցաբերել համառություն և տղամարդ մնա՞լ, թե՞ կանոնների համաձայն գործել և խաղալ: Ասացին՝ ո՛չ, մնալ տղամարդ: Մենք էլ մնացինք»,- ասում է ակումբի սեփականատերը:

«Ֆուտբոլն առաջին հերթին դաստիարակություն է: Մենք հենց դա էլ անում ենք: Ինքներս մեզ ենք դաստիարակում և գալիք սերնդին: Մարդիկ պետք է հասկանան, որ կյանքում կան սկզբունքներ և դրանց պետք է հետևել: Վերջ», - եզրափակում է «Բանանց» ֆուտբոլային ակումբի սեփականատեր Ջևան Չելոյանցը:

Լուսինե Առաքելյան