Սև թեյի հետևանքները ատամների առողջության վրա

Մենք գիտենք, որ...

Հաճախակի թունդ սև թեյ օգտագործելուց ատամները փչանում են:

Իրականում այնքան էլ այդպես չէ:

Հաճախակի թեյ օգտագործելը իրոք որոշ չափով ազդեցություն է ունենում ատամների վրա: Դրանում կարելի է համոզվել, օրինակ, օրական մի քանի անգամ թունդ թեյ օգտագործելով և ատամները չմաքրելով. այդ պարագայում հեշտությամբ կարելի է նկատել, որ ատամների վրա առաջանում են սև բծեր, իսկ ատամները դեղնում են (կարծիք կա, որ որոշ թեյ արտադրողներ թեյին սև գունանյութեր են խառնում, որն էլ հենց փոխում է ատամների գույնը): Բայց դա ատամները փչանալու նշան չէ: Ասենք, որ սպիտակ ատամները ոչ միշտ են առողջ ատամների վկայություն: Թեյը ոչ միայն ատամները չի փչացնում, այլ անգամ բարենպաստ ազդեցություն է ունենում նրանց վրա՝ պաշտպանելով կարիեսից: Գիտնականների կողմից ապացուցված է, որ սև թեյի մեջ պարունակվող ակտիվ նյութերը և ֆտորիդները բավականին օգտակար են լնդերի և ատամների համար: Իհարկե, թեյի սիրահարները չեն կարող պարծենալ իրենց ատամների սպիտակությամբ, բայց իրականում նրանց ատամների վիճակը ավելի լավն է լինում, քան թեյ չխմողներինը: Տարիների դիտարկումների արդյունքում պարզվել է, որ բերանի խոռոչի բակտերիաների կոնցենտրացիան զգալի անկում է ապրում մեկ բաժակ սև թեյ խմելուց հետո: Ասենք, որ բերանի խոռոչի միկրոֆլորան պարունակում է ինչպես անվտանգ, այնպես էլ ատամների կարիես և լորձաթաղանթի բորբոքում առաջացնող մանրէներ, որոնցից են Streptococcus mutans-ը և Lactobacillus-ը: Ընդ որում, հաշվարկվել է, որ պարբերաբար՝ օրական 3-4 գավաթ սև թեյ օգտագործելը այնքան է իջեցնում այդ բակտերիաների կոնցենտրացիան, որ նրանք ունակ չեն լինում ատամներին և լնդերին վնաս տալ: Այդ ամենը կատարվում է շնորհիվ թեյի մեջ պարունակող ֆլավոնոիդների, որոնք արգելակում են բակտերիաների աճը: Մեկ լիտր սև թեյը պարունակում է մոտավորապես մեկ միլիգրամ ֆտոր, ինչպես նաև տանին նյութ, որը պաշտպանում է ատամի էմալը սննդի մեջ պարունակվող թթուներից: Ֆտորը միկրոէլեմենտ է, որը օգնում է պաշտպանել ատամի էմալը, որն էլ հենց իջեցնում է կարիեսի առաջացման հավանականությունը: Պետք է նշել, որ թեյի՝ ատամները պաշտպանող այս հատկությունը զրոյանում է, եթե թեյը համատեղվում է շաքարի հետ: Բանն այն է, որ ցանկացած քաղցր նյութ քայքայում է ատամի էմալը, որն էլ պատճառ է դառնում ատամի տարբեր հիվանդությունների առաջացման: Նշենք, որ հատկապես վտանգավոր է, այսպես ասած, «կծովի թեյ խմելը» (շաքարի օգտագործումը թեյի հետ առանց լուծելու), քանի որ շաքար (կոնֆետ) ծամելը կամ կծելը կարող է ճեղքեր և քերծվածքներ առաջացնել էմալի վրա: 

Մոլորությունը, որ թունդ թեյը փչացնում է ատամները, գալիս է բանտային կյանքից: Բանն այն է, որ ազատազրկման վայրերում հաճախ օգտագործվող խմիչքը՝ չիֆիրը, առաջին հերթին բերում է կալանավորների ատամների սևանալուն, որն էլ փչացած ատամների տպավորություն է թողնում: Իրականում իրոք կալանավորների ատամները տարիների ընթացքում փչանում են, բայց թեյը դրանում մեղավոր չէ. անգամ եթե կալանավորը չիֆիր չխմի, միևնույն է, նրա ատամները կփչանան ծխելու, վիտամինների պակասի, բերանի հիգիենայի պահպանման դժվարությունների և վատ բժշկական սպասարկման կամ դրա բացակայության պատճառով: 

Այս ամենին հավելենք, որ խոսքը մաքուր, իսկական սև թեյի մասին է:

Նյութը հրապարակման պատրաստեց Past.am-ը