ՀՀ ոստիկանության և ԻԻՀ անվտանգության ու ոստիկանության պատվիրակության ներկայացուցիչները քննարկել են համագործակցության հարցերը (տեսանյութ)

Փետրվարի 25-ին ՀՀ ոստիկանության շտաբի պետ Արմեն Ղուկասյանն ընդունել է Իրանի Իսլամական Հանրապետության անվտանգության և ոստիկանության պատվիրակությանը՝ ԻԻՀ ներքին գործերի նախարարության անվտանգության հարցերի գլխավոր վարչության պետ Հոսեյն Քալանթարիի գլխավորությամբ: Այս մասին հայտնում են ՀՀ ոստիկանությունից:

Արմեն Ղուկասյանը ողջունելով հյուրերին կարևորել է երկու երկրների բարեկամական կապը, ինչի շնորհիվ տարբեր ոլորտներում, այդ թվում նաև իրավապահ կառույցների միջև առկա է սերտ համագործակցություն, որն ուղղված է Հայաստանի և Իրանի պետական անվտանգությանն ու քաղաքացիների ապահովությանը: 
ԻԻՀ ներքին գործերի նախարարության անվտանգության հարցերի գլխավոր վարչության պետ Հոսեյն Քալանթարին, շնորհակալություն հայտնելով ջերմ ընդունելության համար, նշել է, որ իրանցիների համար զբոսաշրջության ամենասիրելի երկրներից մեկը Հայաստանն է և դրանով է պայմանավորված նրանց մեծ հոսքը Հայաստան:

Իրանական կողմը գոհունակություն է հայտնել իրենց երկրի քաղաքացիների անվտանգության ապահովման գործում ՀՀ ոստիկանության ցուցաբերած ծառայության համար: 
Քննարկվել են մի շարք հանցատեսակների դեմ պայքարի ուղղությամբ համագործակցության ընդլայնման հնարավորությունները, երկու երկրների ճանապարհային ոստիկանությունների, սահմանամերձ հատվածներում ոստիկանության ստորաբաժանումների, Ինտերպոլի ազգային կենտրոնական բյուրոների ծառայությանը վերաբերող հարցեր:

Նույն օրը Իրանի Իսլամական Հանրապետության անվտանգության և ոստիկանության պատվիրակությանն ընդունել է ոստիկանության կազմակերպված հանցավորության դեմ պայքարի գլխավոր վարչության պետ Արսեն Այվազյանը:

Ողջունելով հյուրերին՝ Արսեն Այվազյանը ներկայացրել է երկու երկրների միջև համագործակցության դրական արդյունքերն ու դրանց հետ կապված որոշ խնդիրներ:

Հայաստանի Հանրապետության և Իրանի Իսլամական Հանրապետության իրավապահները ակտիվ համագործակցում են թմրամիջոցների անօրինական շրջանառության, թրաֆիքինգի, փողերի լվացման և այլ հանցատեսակների դեմ պայքարում:

 

Քննարկվել են իրավապահ երկու կառույցների միջև տեղեկատվության արագ տրամադրման և փորձի փոխանակման վերաբերյալ հարցեր:
Հոսեյն Քալանթարին շնորհակալություն հայտնելով ընդունելության և կարևոր խնդիրներ բարձրաձայնելու համար, պատրաստակամություն է հայտնել քննարկել դրանք և համապատասխան լուծումներ գտնել:
Կողմերը միակարծիք էին, որ թեև երկու երկրների իրավապահ կառույցների միջև առկա սերտ համագործակցությանը, ժամանակի պահանջներին զուգահեռ անհրաժեշտ է առավել ամրապնդել այն ու ներառել նոր ուղղություններ, քանի որ հանցատեսակները նույնպես զարգանում են՝ ներթափանցելով տարբեր ոլորտներ:

Հանդիպմանը քննարկվել են նաև երկու երկրների իրավապահ կառույցների միջև համագործակցությանը վերաբերող այլ հարցեր ևս:
Նույն օրը Իրանի Իսլամական Հանրապետության անվտանգության և ոստիկանության պատվիրակությունը եղել է ՀՀ ոստիկանության կրթահամալիրում:

Կրթահամալիրի պետ, ոստիկանության գեներալ-մայոր Մուշեղ Բաբայանի ուղեկցությամբ պատվիրակության անդամները շրջել են տարածքում, եղել կրթահամալիրի ստորաբաժանումներում, մասնագիտացված լսարաններում, մարզասրահներում և այլն:
ՀՀ ոստիկանության կրթահամալիրի պետ Մուշեղ Բաբայանը ողջունել է հյուրերին և ներկայացրել կրթահամալիրի կառուցվածն ու գործունեության մանրամասներ:

ԻԻՀ ներքին գործերի նախարարության անվտանգության հարցերի գլխավոր վարչության պետ Հոսեյն Քալանթարին շնորհակալություն է հայտնել հետաքրքիր էքսկուրսի համար և հույս հայտնել, որ համագործակցություն կձևավորվի նաև երկու բարեկամ երկրների իրավապահ կառույցների ուսումնական հաստատությունների միջև:

Կողմերը կարևորել են ստեղծվելիք փոխգործակցության անհրաժեշտությունը, որը կնպաստի հանցավորության դեմ առավել արդյունավետ պայքարին: Հանդիպմանը քննարկվել են իրավապահների կրթությանը վերաբերող այլ հարցեր ևս: