Նույնականացման քարտերով քվեարկելու նախագծում նոր փոփոխություններ են կատարվել

Նույնականացման քարտերով քվեարկելու մասին օրենսդրական նախաձեռնության հեղինակները օրենքի նախագծում  քվեարկության գործընթացը վերահսկող նոր մեխանիզմ են սահմանել: ՀՀ Ընտրական օրենսգրքում փոփոխություններ և լրացումներ կատարելու մասին և «Նույնականացման քարտերի մասին ՀՀ օրենքում փոփոխություններ և լրացումներ կատարելու մասին օրենսդրական նախաձեռնության երկրորդ ընթերցմամբ քննարկմանը հիմնական զեկուցող, ՀՀ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը հայտնեց, որ առաջինից երկրորդ ընթերցմամբ ռեժիմի ընթացքում առաջարկներ են ներկայացրել ՀՀԿ, ԲՀԿ, ՀՅԴ և ՀԱԿ խմբակցությունները: «Առաջարկները եղել են բազմաթիվ, քննարկումները շարունակվել են ու եղել են տևական: Մեր գործընկերները ներկայացրել են իրենց առաջարկները, որոնք տեղ են գտել նախագծի ամփոփաթերթում: Առաջարկների իմաստը կայանում է հետևյալում, որ պետք է ընտրացուցակներում նշումների սյունյակում նշվի, թե որ քաղաքացիներն են ընտրական գործընթացին մասնակցել նույնականացման քարտերով, այնուհետև դա հաշվառվի և արձանագրության մեջ նշվի, թե քանի հոգի են նույնականացման քարտով մասնակցել տվյալ տեղամասում»,-  ընդգծեց Սահակյանը՝ հավելելով, որ այդ առաջարկն ընդունվել է հեղինակների կողմից:

Հովհաննես Սահակյանը նշեց, որ օրենսդրական փաթեթում կատարված փոփոխությունը հնարավորություն կտա հանրաքվեի ամփոփումից հետո հստակ թիվ ունենալ, թե քանի քաղաքացի է քվեարկել նույնականացման քարտերով: «Այն շահագրգիռ քաղաքական ուժերին, որոնք հետևողական են, հնարավորություն կտա իրենց վստահված անձանց, հանձնաժողովների նախագահների միջոցով անուն առ անուն ճշտել` նույն անուն ազգանունով ուրիշ անձ այլ ցուցակում եղե՞լ է, թե ոչ»,- ընդգծեց Սահակյանը:

ՀԱԿ խմբակցության ղեկավար Լևոն Զուրաբյանի առաջարկը, որը վերաբերել է մատերը թանաքոտելուն նախաձեռնության հեղինակների կողմից չի ընդունվել: «Մենք ամփոփաթերթում ամբողջությամբ ընդրգկել ենք պարոն Զուրաբյանի առաջարկությունը, որպեսզի տեսանելի և հասկանալի լինի, թե դա իրենից ինչ հսկայական գործընթաց է ներկայացնում՝ սկսած դրա կարգավորման կարգերից, որը պետք է ընդունի Կենտրոնական ընտրական հանձնաժողովը, վերջացրած գնումների գործընթացից: Հիմնական խնդիրը, որ մենք տեսնում ենք այստեղ, ժամանակի հարցն է: Իմ անձնական տեսակետն էլ նշեմ, որ այդ տարբերակը ավելի հետադիմական երկրներին է հատուկ: Եվրոպական որևէ առաջադեմ երկիր այդ տարբերակից չի օգտվում: Աֆղանստանում և նմանատիպ երկրներում է կիրառվում այդ մեթոդը, որտեղ 70 տոկոս անգրագիտություն է, որ մարդիկ, չկարողանալով անուն ազգանուն կարդալ, այս տարբերակն են ընդունել»,- ընդգծեց Սահակյանը:

Այնուհետև հիմնական զեկուցող Հովհաննես Սահակյանը, անդրադառնալով Լևոն Զուրաբյանի այն դիտարկմանը, թե նույնականացման քարտերով քվեարկելու օրենքը հերթական հնարավորությունն է ընտրական կեղծիքների գնալու համար, նկատեց, որ Հայաստանում ընտրություններն արդեն կազմակերպվում են բավականին գրագետ «Ես առիթ ունեցել եմ նշելու, որ մեր երկրում ընտրական ցուցակները, որոնք հիմնական ընտրակեղծիքների առիթը կարող են հանդիսանալ, 2005թ. ի վեր ձևավորվում և կազմվում են պետական մարմնի կողմից, որը պատասխանատու է այդ ցուցակների անճշտությունների համար, որի համար կա կոնկրետ պատասխանատվություն: Առիթ եմ ունեցել նշել նաև, որ այն վայրագ գործելակերպը, որը մենք ժառանգել ենք ոչ լավ օրից, փորձել ենք հասցնել այն մակարդակին, որ միջազգային դիտորդները արձանագրել են, որ ընտրական գործընթացներում առաջընթաց կա, որ այն խախտումները, որոնք եղել են, էական ազդեցություն չեն ունեցել ընտրությունների արդյունքների վրա»,- «Արմենպրես»-ի հաղորդմամբ՝ նշեց Սահակյանը:

Դեկտեմբերի 6-ին Հայաստանում կանցկացվի Սահմանադրական փոփոխությունների հանրաքվեն: Օրենսդիրները ցանկանում են ընտրության հնարավորություն տալ նաև նույնականացման քարտ ունեցող ՀՀ քաղաքացիներին: