Ռուս զինվորները սիրում են ոչ միայն հայ խոհարարների պատրաստած կերակուրը, այլև հայկական միրգ–բանջարեղենն ու մուրաբաները. «Փաստ»

«Փաստ» օրաթերթը գրում է.

Խոհարարների միջազգային օրվա կապակցությամբ ռուսական 102–րդ ռազմաբազայի ողջ զինանձնակազմի սննդամթերքի ապահովմամբ զբաղվող «Պոտենցիալ» ՍՊԸ–ի Հայաստանյան մասնաճյուղը կազմակերպել էր միջոցառում, որի նպատակը հայ– ռուսական համագործակցության հաջողված գործընկերային փորձը հանրությանը ներկայացնելն էր: Ցուցահանդեսի ընթացքում հայ խոհարարները ներկայացրեցին իրենց պատրաստած ռուսական ճաշատեսակները: Կազմակերպվեց ճաշատեսակների ցուցահանդես, որի ժամանակ ցուցադրվեցին հայ խոհարարների կողմից պատրաստված սլավոնական խոհանոցի բազմաթիվ ճաշատեսակներ ու կարկանդակներ: 

Ընկերության տնօրեն Վահե Աբելյանը «Փաստ» օրաթերթի լրագրողի հետ զրույցում նշեց, որ կազմակերպությունը Հայաստանում սպասարկում է 7 ճաշարանի, որից մեկը՝ Երևանում: Ընկերությունը նման պարտավորություն է ստանձնել 2017թ. սեպտեմբերից, որն ամենայն հավանականությամբ դեռ երկար կշարունակվի: Աշխատակիցները մոտ 200–ն են, 90 %–ը Հայաստանի բնակիչներ են, զբաղվում են ռազմաբազայի զինվորների համար սնունդ ապահովելով: Ի դեպ, ձեռք բերվող սննդամթերքը՝ բանջարեղենից մինչև մսամթերք, տեղական արտադրության է: 

«Սննդամթերքն ընդունվում է ստանդարտներին համապատասխան: Ռուսական զորամասերում զինծառայողների սննդակարգում ներառված է մոտ 30 տեսակի մթերք, որից ամենահիմնականը միսը, ձուկը, ձավարեղենն ու բանջարեղենն է: Դրանից բացի զինվորներին տրվում է կաթ, ձու, հյութեր և այլն: Խոհարարները պրոֆեսիոնալներ են, նրանք նույնպես Հայաստանի բնակիչներ են, ովքեր ուժ ու եռանդ չեն խնայում զինվորների համար բարձրորակ սնունդ պատրաստելու համար»,– ասաց Վ. Աբելյանը:

Նա հավելեց նաև, որ ընկերությունն աշխատում է Հայաստանում գործող օրենսդրության համաձայն: Ուստի բոլոր աշխատակիցներն ընտրվում են՝ հիմք ընդունելով տեղական օրենքներն ու մասնագիտական կրթական որակներն ու չափանիշները:

«Խոհարարների օրվա առիթով ես բոլորին մաղթում եմ առողջություն և մասնագիտական նորանոր նվաճումներ, որպեսզի նրանք օր օրի կարողանան էլ ավելի բարելավել իրենց մասնագիտական հմտություններն ու որակները, որպեսզի կարողանանք է՛լ ավելի բարձր պահել բոլոր զինվորականների տրամադրությունը»,– ասաց Վ. Աբելանը:

Նշենք նաև, որ ռազմաբազայի խոհարարների ամեն օրը սկսվում է խորհրդակցությամբ, որի ժամանակ հստակեցվում ու հաշվարկվում են օրվա սննդակարգն ու անհրաժեշտ կալորիաները: Սննդակարգի փոփոխությունների դեպքում մի մթերքը փոխարինվում է մեկ այլ մթերքով, որպեսզի զինվորը ստանա այն պահանջվող սննդատեսակները, որոնք անհրաժեշտ են ծառայություն անցնող զինվորների առողջության ապահովման համար:

Տեխնոլոգ Արթուր Ավագյանցը «Փաստի» հետ զրույցում նշեց, որ յուրաքանչյուր ճաշատեսակի պատրաստման համար նշանակվում են պատասխանատու խոհարարներ: Նրանք նախապես կատարում են ճաշացանկում ներառված ճաշատեսակների անհրաժեշտ մթերքների հաշվարկում և ապա սկսում են այն պատրաստել:

«Զինվորներին տրամադրվող սնունդն ամենևին չի տարբերվում տանը պատրաստած սննդատեսակներից: Խոհարարները շատ բարեխիղճ են, բարձր պատասխանատվությամբ են վերաբերվում իրենց գործին, քանի որ բոլորն էլ բանակում ծառայող զավակներ, թոռներ կամ հարազատներ ունեցել են կամ ունեն և գիտեն, թե որքան կարևոր է զինվորի համար որակյալ ու համեղ ճաշատեսակներ պատրաստելը: Խոհանոցը հիմնականում սլավոնական է, զինվորներին ավելի շատ այդպիսի սնունդ է դուր գալիս: Ամսվա ընթացքում երկու անգամ կարող ենք այլ խոհանոցների ճաշատեսակներ նույնպես պատրաստել, բայց ամենակարևորն այն է, որ զինվորներին տրվող չափաբաժիններն այնքան ճշգրիտ են հաշվարկվում, որ զինվորների կողմից երբեք դժգոհություններ չեն լինում»,– ասաց Ա. Ավագյանցը: 

Ռազմաբազայի ղեկավարները մեզ հետ զրույցում նույնպես նշեցին, որ ծառայության ընթացքում երբեք չեն դժգոհել խոհանոցի աշխատանքից, քանի որ ուշացումներ կամ բացթողումներ չեն լինում: 

«Արդեն երկու տարի է՝ Ռուսաստանից Հայաստան եմ եկել ծառայության: Պետք է նշեմ, որ հայկական մթերքից պատրաստված սնունդը բավականին համեղ է: Այստեղ մեզ կերակրում են այնպես, ինչպես տանը: Ես ամեն օր օգտվում եմ հայ խոհարարների պատրաստած ճաշատեսակներից, որոնք շատ նման են տանը մայրիկի կամ տատիկի պատրաստածին: Հայ խոհարարները մեզ վերաբերվում են իրենց որդիների նման, այնքան սրտանց են պատրաստում ռուս զինվորականների համար: Նույնիսկ հատուկ ուշադրության են արժանացնում զինվորների տարեդարձին և այդ օրը հատուկ նրանց համար առանձին սեղան են պատրաստում, նրանց համար թխում են թխվածքեղեն, կարկանդակներ: Տեղական արտադրության մուրաբաները նույնպես շատ համեղ են: Ինձ հատկապես բալի, ծիրանի մուրաբան է դուր գալիս, որը զինվորներին տրվում է լրացուցիչ»,– ասաց մեր զրուցակիցը:

Ռուսական կողմը նույնպես իր գոհունակությունը հայտնեց «Պոտենցիալ» ՍՊԸ–ի Հայաստանյան մասնաճյուղի ղեկավարությունից, ողջ անձնակազմից բարձրորակ ու բարձրակարգ մատակարարում կազմակերպելու, սպասարկում իրականացնելու, ինչպես նաև իրենց հանդեպ հոգատար վերաբերմունք ցուցաբերելու համար: Ներկայացվածը հայ–ռուսական համատեղ համագործակցության ընդամենը մեկ դրվագ էր, ինչը կարող է լավ օրինակ ծառայել այլ ոլորտներում նույնպես գործարար համագործակցության զարգացման համար: