Օձունի քսանամյա մութ շղարշների բացմանն ընդառաջ. «Փաստ»

 Վերջին շրջանում քանիցս ականատես ենք լինում որոշ նախկին և ներկա չինովնիկների կողմից պետական միջոցների մսխման և իրենց պաշտոնական դիրքի չարաշահումների դեպքերի հետ: Անհասկանալի օրինաչափությամբ հիմնական շեշտադրումը կատարվում է մայրաքաղաքում և խոշոր համայնքներում կատարված դեպքերին: Թերևս մնացած համայնքներում նմանօրինակ դեպքերի պակաս ևս չունենք: Ահա մի քանի փաստեր և անբարեխղճության դրվագներ ՀՀ ամենամեծ համայնքներից մեկում՝ Օձունում վերջին տասնամյակում կատարված դեպքերից:

 

Օձունում վերջին տասը տարում համայնքապետ է ՀՀԿ–ական Արսեն Տիտանյանը, ով իր նախորդի տասնամյա իշխանությունը տապալեց ժողովրդական համախմբման միջոցով, սակայն ընտրվելու հաջորդ օրն իսկ որդեգրեց նույն գործելաոճը և լծվեց Օձունի լճացման գործընթացին: 

 

Տիտանյանների կլանի գործունեությունների շղթան բավականին լայն է ու բազմավեկտոր: 2011–12 թթ. Ա. Տիտանյանը համայնքի միջոցներով գնել է երկու կոմբայն և T–150 մակնիշի «Կիրովեց» տրակտոր, որոնք, սակայն, համայնքի բյուջե ոչ մի դրամական մուտք չեն ապահովել: Ինչպես վերջին տարիների, այնպես էլ այս տարվա հացահատիկի բերքահավաքը կատարվել է այլ համայնքների և մասնավոր կոմբայններով: Նշենք նաև, որ գնված երկու կոմբայններից մեկն է աշխատող, իսկ մյուսն ընդամենը որպես պահեստամասերի «հավաքածու» է օգտագործելի. սա արվել է հետագայում՝ իր հեռանալուց հետո, «ռասկուլաչիտ» արված կոմբայնը որպես գնված ապրանք ներկաացնելու համար: 

 

Տիտանյանի գործունեությունը բավականին անբռնազբոս է նաև համայնքի բնակչության հանդեպ. համայնքում կատարվող գնումների գործընթացը կատարվում է գաղտնի, կայքում ոչինչ տեղադրված չէ: Հետաքրքրականն այն է, որ գնումների բոլոր մրցույթներում հաղթում են գյուղապետին և նրա ազգականներին պատկանող ՍՊԸ–ները: Հարկ  է նշել, որ մրցույթների մասին նախօրոք հրապարակվում են այնպիսի թերթերում, որոնք բավականին քիչ բաժանորդներ ունեն (դա արվում է գիտակցաբար՝ մյուս ՍՊԸ–ների մասնակցությունը կանխելու համար): 

 

Համայնքին պատկանող մանկապարտեզների գնումների գործընթացը նույնպես քողարկված է մութ շղարշով: «Զարմանալիորեն» մանկապարտեզի ողջ սնունդը գնվում է Տիտանյանի մորը պատկանող խանութ–տնակից, որտեղ չկան սանիտարական նորմալ պայմաններ և ՍԱՏՄ–ի չափորոշիչներին չեն համապատասխանում: Օձունի «բազմազբաղ» գյուղապետն իր գործունեության շրջանակում չի մոռանում նաև իր սեփական ընկերությունների աշխատակիցներին՝ նրանց պարբերաբար տրամադրելով սոցիալական օգնություններ համայնքային բյուջեից, իսկ, օրինակ, համայնքի կոմունալ ծառայության ղեկավարը Տիտանյանի անասնագոմի վարիչն էր (հաճելին՝ համադրված օգտակարի հետ), ով փոխարինվեց միայն հեղափոխությունից հետո՝ ավելորդ քաշքշուկից խուսափելու համար:

 

Տիտանյանն աչքի է ընկնում նաև գյուղում տարածքների ակտիվ վաճառքով՝ հիմնականում իր հարազատ–բարեկամներին, ովքեր շինարարություններ են իրականացնում առանց շինթույլտվության՝ ապօրինի. գրեթե նախապես մրցույթներ չեն հայտարարվում, և հողատարածքները վաճառվում են ինքնարժեքով: 

 

Ընդգծենք, որ համայնքային բյուջեից ամեն տարի գումար է դուրս գրվել հեռավոր արոտավայրեր գնացող ճանապարհը բարեկարգելու նպատակով, սակայն դրանց հետ կապ ունեցող յուրաքանչյուր օձունցի տեղյակ է, որ ոչ մի աշխատանք չի կատարվում, իսկ եթե աշխատանքներ կատարվում էլ են, ապա ծառայում են միայն Տիտանյանի անասունների պահման վայր հանդամասը բարեկարգելու համար: 

 

Նշենք նաև, որ նախընտրական ծրագրերում Տիտանյանը երկու անգամ խոստացել էր լուծել գյուղի հեղեղատարների հարցը, որը մինչ այսօր շարունակում է Օձունի համար մնալ պատուհաս՝ գարնանային անձրևների ժամանակ գյուղում հնարավոր է շրջել միայն ջրանավակներով: 

 

Արսեն Տիտանյանը 2008–2018 թթ. իր ունեցվածքը գրեթե հազարապատկել է՝ հասարակ գյուղացուց դարձել է ֆերմեր–գյուղատնտես և մարզային մինի–օլիգարխ ու իր ունեցվածքով երևի թե կզիջի միայն իր հորեղբայր Սանասար Տիտանյանին, ով նույնպես հարստացել է բավականին կասկածելի և անհասկանալի պայմաններում: 

 

Հ.Գ.– Ըստ օդում կախված լուրերի, «գյուղապետ–ֆերմերն» ինչ–որ ծրագրով, որով նախատեսված է եղել համայնքը համալրել ցեղային անասուններով և զարգացնել տավարաբուծությունը, համալրել է սեփական անասնագոմը, իսկ արդեն հեղափոխությունից հետո շատ կազմակերպված, ավելորդ գլխացավանքից և պատասխանատվությունից խուսափելու համար, սկսել է արագ թափով վաճառել որոշակի քանակի անասուն՝ միսը վաճառելով Երևանում գտնվող իր սեփական խանութում:

 

Մանրամասները՝ «Փաստ» օրաթերթի այսօրվա համարում