Բնապահպանական կազմակերպությունները մի շարք առաջարկներ են արել նախարարին

ОБЩЕСТВО 18 Июнь, 2015 17:16

Տեղի է ունեցել ՀՀ բնապահպանության նախարարին կից հասարակական խորհրդի 2015 թվականի հերթական նիստը: Հասարակական խորհրդի անդամների բարձրացրած հարցերի հիման վրա ձեւավորված նիստի օրակարգում ընդգրկված էին բնության հատուկ պահպանվող տարածքների /ԲՀՊՏ/ պահպանության վիճակին, էկոտուրիզմին եւ ոլորտում ներդրումային ծրագրերին վերաբերող հարցեր:

Հասարակական խորհրդի նախագահ, ՀՀ բնապահպանության նախարար Արամայիս Գրիգորյանը բացելով նիստը` խորհրդի հաստատմանն է ներկայացրել օրակարգը, ինչից հետո խոսքը փոխանցել է առաջին հարցը զեկուցողին:

ՀՀ բնապահպանության նախարարին կից հասարակական խորհրդի անդամ, «Հայկական էկոտուրիստական ասոցիացիա» հասարակական կազմակերպության նախագահ Ժաննա Գալյանը ներկայացրել է բնության հատուկ պահպանվող տարածքներում էկոտուրիզմի զարգացման անհրաժեշտությունը, հեռանկարները եւ դրան խթանող միջոցառումները: Բանախոսն առաջարկել է մշակել էկոտուրիզմի զարգացման ռազմավարություն, ինչպես նաեւ համակարգել ԲՀՊՏ-ներում տարբեր ներդրումային ծրագրերով իրականացվող էկոտուրիզմի խթանման բաղադրիչները:

Բնության հատուկ պահպանվող տարածքների ընդհանուր վիճակի վերաբերյալ դիտարկումներ է ներկայացրել խորհրդի նիստին որպես փորձագետ հրավիրված «Թռչունների պահպանության միություն» ՀԿ նախագահ Մամիկոն Ղասաբյանը:

Շահագրգիռ քննարկման ժամանակ խորհրդի անդամները կարեւորել են էկոտուրիզմի ճիշտ կազմակերպման, էկոտուրիստական գործունեության հավատարմագրման, ԲՀՊՏ-ներում այդ նպատակով պահպանման գոտիների ձեւավորման եւ այլ հարցերը: Ամփոփելով առաջին հարցի քննարկումը` նախարար Արամայիս Գրիգորյանը հայտնել է, որ ՀՀ բնապահպանության նախարարության կողմից գործնական քայլեր են արվում ազգային պարկերում էկոտուրիզմի զարգացման ուղղությամբ, ինչն էականորեն կնպաստի ԲՀՊՏ-ների պահպանման համար անհրաժեշտ միջոցների ներգրավմանը:

«Քայլ» հասարակական կազմակերպության նախագահ Գալուստ Նանյանը ներկայացրել է ԲՀՊՏ-ներում կատարվող ներդրումների խնդիրը, որի համատեքստում խորհրդի քննարկմանն է ներկայացրել «Հանքավանի» ջրաբանական եւ «Որդան կարմիր» պետական արգելավայրերի վիճակը: Ըստ բանախոսի դիտարկումների` արգելավայրերը պատշաճ կարգով սահմանազատված չեն հարակից համայնքային տարածքներից, ինչի արդյունքում արգելավայրի ռեժիմի խախտումներ են արձանագրվում: Գ. Նանյանն առաջարկել է մասնավորապես «Որդան կարմիր» պետական արգելավայրի տարածքները ցանկապատելու համար միջոցներ ներգրավել: Զեկուցողը բարձրացրել է նաեւ արգելավայրի հարակից տարածքների համայնքների բնակիչների շրջանում իրազեկման աշխատանքներ ծավալելու հարցը:

Հասարակական խորհրդի նախագահ Արամայիս Գրիգորյանը ներկաներին տեղեկացրել է, որ «Որդան կարմիր» պետական արգելավայր կատարած իր այցի ժամանակ հանձնարարել է միջոցներ ձեռնարկել արգելավայրի սահմանազատման ուղղությամբ: «Վայրի բնության եւ մշակութային արժեքների պահպանության հիմնադրամի» նախագահ Ռուբեն Խաչատրյանն, անդրադառնալով հասարակության իրազեկման խնդիրներին, հասարակական խորհրդի անդամներին տեղեկացրել է, որ Երեւանի կենդանաբանական այգում նախատեսվում է ստեղծել ԲՀՊՏ-ներին վերաբերող տեղեկատվական կենտրոն, ինչը թույլ կտա այգու բազմահազար այցելուներին տեղեկատվություն տրամադրել բնության հատուկ պահպանվող տարածքների եւ էկոտուրիստական ծառայությունների մասին:

Ամփոփելով նիստը` Խորհրդի նախագահ Արամայիս Գրիգորյանը հայտնել է, որ ՀՀ բնապահպանության նախարարությունը պատրաստ է օպերատիվ կերպով կազմակերպել քննարկումներ եւ արձագանքել հասարակական կազմակերպությունների կողմից բարձրացված հրատապ հարցերին: