«Իբր ներդրումներ ու բարեփոխումներ են անում, բայց սպառողը փոփոխություն չի զգում». «Փաստ»

«Փաստ» օրաթերթը գրում է.

Ծառայություններ մատուցող ընկերությունների աշխատանքից վերջին շրջանում հասարակական դժգոհությունները չեն դադարում: Անկախ բողոքներից` սպառողը զգալի փոփոխություններ չի արձանագրում: «Սպառողների խորհրդատվության կենտրոն» հ/կ նախագահ Կարեն Չիլինգարյանի հետ խոսել ենք ստեղծված իրավիճակի պատճառների և հնարավոր լուծումների մասին: 

«Ջրամատակարարում, գազամատակարարում, էլեկտրաէներգիա, հեռահաղորդակցություն, աղբահանություն: Նշված ծառայությունների դեպքում մինչ այս էլ են բողոքներ ու խնդիրներ եղել: Նախկինում մարդիկ բարձրաձայնում էին, բայց ոչ մի արդյունքի չէին հասնում: Բացի այդ` նախկինում սպառողն այդքան էլ հետևողական չէր: Իշխանափոխությունից հետո բոլորի մոտ հույսեր են առաջացել նաև վերոնշյալ ծառայությունների առումով: Պետք է ինչ–որ բաներ փոխվեն դեպի դրականը, բայց միանգամից ակնկալելն անհնար է: Պետք է սպասենք, տեսնենք` ինչ է լինում: Դրական տեղաշարժ պետք է լինի, որովհետև նույն ջրանջատումները, հոսանքազրկումները շարունակվում են: Նույն վիճակը շարունակվում է, ոչ մի փոփոխություն չի եղել, մինչդեռ` մեծ ներդրումներ են ներկայացնում ՀԾԿՀ: Ներդրումներ են անում, իբր բարեփոխումներ են անում, բայց սպառողը փոփոխություն չի նկատում»,–ասաց Կ. Չիլինգարյանը: Իսկ թե ի՞նչ քայլեր պետք է ձեռնարկի նոր իշխանությունն այդ խնդիրները բացառելու համար, հ/կ նախագահը նշեց. «Պետք է ստուգումներ և աուդիտ անցկացվի` պարզելու, թե ինչպես են օգտագործվում այն գումարները, որոնք հատկացվում են ներդրումների ձևով: Մենք գիտենք, որ տարիներ շարունակ ներդրումներ են եղել, մեծ գումարներ են հատկացվում, բայց ինչ–որ ձևով պետք է վերահսկվի: Պետք է պարզեն` այդ գումարները իրենց նպատակին են ծառայո՞ւմ, թե՞ ուղղակի ձևական բնույթ են կրում: Միայն այդ դեպքում կարելի է դրական փոփոխության սպասել: Եթե ընկերությունների` ծառայություն մատուցելու ներկայիս մոտեցումը չփոխվի, իրավիճակը, երևի, կհանգեցնի որոշ բացահայտումների»:

Կարեն Չիլինգարյանը խոսեց հատկապես ջրամատակարարման և աղբահանության մասին:

«Նախ` մինչև օրս չգիտենք, թե նախկին կառավարությունը «Վեոլիա ջրի» հետ ինչ պայմաններով և ինչպես պայմանագիր կնքեց: Ընկերությանը չեմ կարող մեղադրել` բիզնես շահեր է հետապնդում, բայց կառավարությունը պետք է այնպիսի պայմանագիր կնքեր, որ սպառողի համար ամեն ինչ ավելի մատչելի և դյուրին լիներ: Բայց սպառողը միայն պայմանագիրը կնքելուց հետո իմացավ, որ 2017թ. հունվարի 1–ից սակագինը բարձրանալու է: Մեծ հաշվով` կասկածելի ձևով պայմանագիր են կնքել: Ինչ վերաբերում է կոնկրետ խնդրին. հիմա ամառվա սեզոն է, ջրի սպառումը շատացել է: Ի դեպ` խնդիրներ կան նաև սպառողների առումով: Շրջանցելով ջրաչափերը` շատերն անխնա օգտագործում են ջուրը: Դեպքեր են եղել, որ ջրաչափերը հանել են սեփականատիրոջ վերահսկողության գոտուց, որ կարողանան հսկել նրան: Մեծ ընտանիք է, բայց ցուցմունքում սպառած ջուրը 1–2 խորանարդ մետր է: Դա նաև այն դեպքում, երբ այգի են ջրում և այլ աշխատանքներ անում: Բացի այդ, պետք է հաշվի առնել, որ պոմպակայանների ջրագծերի վթարներ եղան: Այնուամենայնիվ, մինչև անխնա ջրօգտագործումը չվերացվի, 

խնդիրը չի լուծվի: Ջրաչափը շրջանցելով` այգիներում գիշեր–ցերեկ ջուրը բաց են թողնում: Այդքանից հետո ջուրն ինչպե՞ս բավականացնի: Հետո ջրագծերը մաշված են ու հին: Աշխատանքներ կատարվում են, բայց բոլոր ջրագծերը փոխելն անհնար է: Դրանք հիմնականում 50–70 տարվա ջրագծեր են, մեծ մասը նաև վնասված է: Ամբողջ ջրագծերը փոխելու համար մեծ ներդրումներ են պետք»,–նկատեց մեր զրուցակիցը` հավելելով, որ իր հաշվարկներով մոտ 1 միլիարդ դոլարի ներդրում է պետք: 

«Իսկ աղբահանությունը բարձիթողի վիճակում է, թեև տարիներ շարունակ բարձրաձայնել ենք այդ մասին: Սպառողը պարտավոր է վճարել, ուշացումների դեպքում էլ` տույժ–տուգանքների կենթարկվի, բայց ծառայություն մատուցող կազմակերպությունը ոչ մի պարտավորություն չունի սպառողի հանդեպ: Դա է պատճառը, որ նման վիճակ է ստեղծվել հատկապես մայրաքաղաքում: Եթե նշված խնդիրները վերահսկվեն, շատ հարցեր լուծում կստանան»:

Հ/կ նախագահի դիտարկմամբ` միանգամից ասել, որ Հանրային ծառայությունները կարգավորող հանձնաժողովի ղեկավարությանը ևս պետք է փոխել, անլուրջ կլինի. «Դա այն կառույցն է, որը պետք է կարգավորում իրականացնի: Պետք է կարգավորի սպառողի և մատակարարի միջև առկա հարաբերությունները: Երևի այդ կառույցում էլ աուդիտ և ստուգումներ պետք է իրականացվեն»: