Մեծամորցիների հետ կառավարության ներկայացուցչի հանդիպումը կայացել է, խոստացել են գործին ընթացք տալ. «Փաստ»

«Փաստ» օրաթերթը գրում է.

Արդեն մի քանի օր է՝ մեծամորցիներն են ոտքի կանգնել և իրենց քաղաքապետի հրաժարականն են պահանջում: Խնդիրն այն է, որ մարդիկ այլևս չեն կարողանում առանց ջրի, շենքային մարդկային պայմանների ու կեղտի մեջ ապրել: Որոշել էին գնալ ծայրահեղ քայլերի, սակայն, ինչպես ասում են, շաբաթն ուրբաթից շուտ եկավ: Կառավարությունից արձագանքեցին ցուցարարներին և հանդիպման մասին պայմանավորվեցին: Մեծամորցի ցուցարարներն էլ գոհ ու շնորհակալ կառավարության նման արձագանքից, մայիսի 29–ին հանդիպեցին երկրի բարձրագույն իշխանությունների ներկայացուցիչների հետ:

Ակցիայի նախաձեռնող խմբի ներկայացուցիչ Ավետիք Հարությունյանը «Փաստ»–ի հետ զրույցում ավելի վաղ նշել էր, որ չնայած իրենք մինչև հունիսի 29–ը, ժամը 10.00 ժամանակ էին տվել Մեծամորի գործող քաղաքապետին, որպեսզի իրենց պահանջներն իրականացնի, բայց քանի որ կառավարության հետ հանդիպում էր պլանավորված, իրենց հետագա քայլերի մասին հանդիպումից հետո կհրապարակեն: 

Նրանց պահանջն, ի դեպ, ոչ թե գործող քաղաքապետի անձի, այլ քաղաքի կառավարման որակին է վերաբերում, որի արդյունքում Մեծամորում ծակ տանիքների, շենքերի նկուղային տարածքներում կոյուղաջրերի, աղբի ու առնետների պակաս չկա: Մարզամշակութային համալիրն էլ, թեև վերանորոգված է, սակայն մշտապես փակ է, որպեսզի վերանորոգումը չփչանա: Ինչ հնարավոր է եղել վաճառել, վաճառվել է, մնացածն էլ քանդուքարափ վիճակում է:Քաղաքապետ Գրիգորյանը մամուլի ներկայացուցիչներին ասել էր, թե իրենց քաղաքում ամեն ինչ իր տեղում է, իսկ բողոքողն ընդամենը մեկ ընտանիք է: Ըստ քաղաքապետի՝ մնացածը շատ գոհ են, բայց, անկեղծ ասած, դժվար է պատկերացնել, թե ինչպես կարելի է նման կենցաղային պայմաններից գոհ լինել, երբ դրանից բացի քաղաքը բաժանվել է յուրայինների և ոչ յուրայինների:

«Եթե մեկ ընտանիք է բողոքում, ապա ասեմ, որ ես բավականին մեծ ընտանիք ունեմ Մեծամորում, քանի որ այս վիճակից բողոքողները բավականին շատ են: Մարդիկ հեռու էին կանգնում, որ կադրերում չերևային, քանի որ քաղաքապետի կողմնակիցները տեսանկարահանում էին հավաքը, որ հետո բոլորին մեկ առ մեկ համոզեն, որ էլ չմասնակցեն ակցիաներին: Փորձել են նաև իմ և մեր նախաձեռնող խմբի անդամների վրա նույնպես ներազդել: Ինչ վերաբերում է 

քաղաքապետի այն հայտարարությանը, թե պաստառներ բռնողներն այլ քաղաքներից էին եկել, ասեմ, որ նման բան չի եղել: Ակցիայի մասնակիցները բոլորն էլ Մեծամորի բնակիչներ են եղել»,– «Փաստ»–ի հետ զրույցում ասաց Ա. Հարությունյանը:

Նա նաև հավելեց, որ թեև բողոքի ակցիան շանտաժի մթնոլորտում է անցել, սակայն իրենք քաղաքապետի հետ որևէ անձնական խնդիր չունեն: Ընդամենը ցանկանում են իրենց քաղաքը նորմալ ու բնականոն հունով զարգանա, լուծվեն տարիների ընթացքում կուտակված խնդիրները, քաղաքում տիրող բարոյահոգեբանական իրավիճակը կարգավորվի: Ինչ վերաբերում է խնդիրներին, ապա դրանք այնքան շատ են՝ ոռոգման ջրի խնդրից մինչև ասֆալտապատման ու բարեկարգման խնդիրներ: Ու չնայած քաղաքի բյուջեն մոտ 240 մլն դրամ է, դրանից 200 միլիոնը, քաղաքապետի խոսքով, ծախսվում է աշխատավարձ վճարելու վրա, այդ պատճառով էլ չի բավարարում այլ հոգսերը հոգալու համար: Մեծամորցիները, սակայն, չեն հավատում գործող քաղաքապետի խոսքերին, իսկ ավագանին, որտեղ ընդամենը երեք «ընդդիմադիր» կա, չի կարողանում իրեն հուզող բոլոր հարցերի պատասխանները ստանալ, քանի որ Մեծամորում, ինչպես Էջմիածին քաղաքում, միապետական կարգեր են սահմանված, իսկ ով նրանց հետ չէ, ուրեմն պետք է մեկուսացվի սկզբունքն է գործում: 

Ի դեպ, քաղաքապետ Ռ. Գրիգորյանը, ով օրերս հայտարարեց, որ ՀՀԿ–ից դուրս է եկել, իրեն բավականին ինքնավստահ է պահում, քանի որ, ինչպես ժողովուրդն է ասում, իր «տանիքը» Սերժի Վաչոյի մոտ աշխատող եղբայրն է, բայց քանի որ հիմա Վաչոն բռնված է ու կարելի է ասել, որ նա այլևս տանիք չունի, որոշել է ՀՀԿ–ից դուրս գալ, որ իր համար նոր տանիք փնտրի:

«Ընտրությունների ժամանակ ժողովրդին 10 հազար բաժանող գլխավոր անձն էր, հիմա էլ հայտարարում է, որ ՀՀԿ–ին անդամակցել է, որ քաղաքի համար լավ լինի: Քաղաքապետի ընտրություններին ես նույնպես առաջադրվել էի, և այդքան ճնշումներից, կարմիր բերետավորներին քաղաք բերելուց հետո 8 տարի գործող քաղաքապետին ընդամենը 150 ձայնով եմ պարտվել: Մենք չենք նահանջելու, մեր ձայնը տեղ ենք հասցնելու և պահանջում ենք, որ քաղաքում տիրող իրավիճակը շտկվի»,– ասաց նախաձեռնող խմբի անդամ Ա. Հարությունյանը:

Ինչպես և սպասվում էր, հանդիպումը կառավարությունում կայացավ վարչապետի առաջին խորհրդականի մակարդակով, այդպես ներկայացրեց նախաձեռնող խմբի ներկայացուցիչը: Հանդիպումից հետո մասնակիցներից մեկը «Փաստ» օրաթերթին փոխանցեց հետևյալը.

«Մենք քննարկեցինք հիմնախնդիրները, կառավարությունում մեզ խոստացան ամենասեղմ ժամանակահատվածում զբաղվել մեր կողմից բարձրացված հարցերով: Մենք էլ խոստացանք, որ ճանապարհները չենք փակելու, այնքան ժամանակ, մինչև կառավարությունն այդ հարցերով զբաղվի և մեզ իր որոշման մասին ներկայացնի: Այս պահին մենք բավարարված ենք, քանի որ մենք էլ ռադիկալ քայլերի գնալուն կողմնակից չենք: Մենք նույնպես ցանկանում ենք նորմալ պայմաններում ուսումնասիրություն կատարվի և լուծում տրվի մեր կողմից բարձրացված հարցերին»,– ասաց Ա. Հարությունյանը: