Հնդկական հրաշքը Հայաստանում. «Փաստ»

ОБЩЕСТВО 22 Июнь, 2018 9:50

«Փաստ» օրաթերթը գրում է.

Մի քանի բառով դժվար է ներկայացնել այն, ինչին ականատես եղանք օրերս Հայ–հնդկական բժշկական կենտրոնի բացման ժամանակ: Պարզվում է՝ այնտեղ, որտեղ ձեռքերը վեր է բարձրացնում ալոպաթիկ կամ, ինչպես ընդունված է ասել, ավանդական բժշկությունը, օգնության է հասնում հոմեոպաթիկ բժշկությունը:

Սա, թերևս, կարելի է նոր ուղղություն համարել Հայաստանում, որի հիմնադիրն աշխարհահռչակ հնդիկ բժիշկ, բժշկական գիտությունների դոկտոր, պրոֆեսոր Մ. Սենանն է, ով նաև հոմեոպաթիայի մի քանի կենտրոններ է հիմնել Հնդկաստանում, ինչպես նաև հանդիսանում է Մեծ Բրիտանիայի Հանեմանի անվան հոմեոպաթիկ քոլեջի պրոֆեսոր: Իսկ այս կենտրոնը, որն ի դեպ միակն է ողջ տարածաշրջանում, օրերս իր դռները բացեց հայ և օտարազգի այցելուների համար, նրա նվերն է հայ ազգին:

Հայ–հնդկական այս համագործակցությունը սկսվել է 1995 թվականին: Իսկ անցած 15 երկար ու ձիգ տարիների համատեղ արդյունավետ համագործակցության արդյունքում է ծնվել Հայաստանում նման կենտրոն բացելու գաղափարը: Սեփական միջոցներով կենտրոն հիմնադրելու գաղափարը հասունացել է նաև երեք հայազգի բժշկուհիներ Շուշան Շահբազյանի, Վարդուհի Խաչատրյանի և Հասմիկ Ալեքսանյանի երկարուձիգ տարիների աշխատանքի շնորհիվ, ովքեր իրենց տարիների ջանքն ու ավանդը ներդրել են հոմեոպաթիկ բժշկագիտության գաղտնիքներն ուսումնասիրելու հարցում: Նրանք այս ընթացքում մեծ նվիրումով ուսանել ու աշխատել են թե՛ Հայաստանում և թե՛ Հնդկաստանում՝ դրանով իսկ հույս արթնացնելով աշխարհահռչակ բժշկի մոտ, որ հասունացել է ժամանակը, որ Հայաստանում ևս կարելի է այս ուղղությունն է՛լ ավելի զարգացնել:

Կենտրոնի բացման արարողությանը ներկա էր նաև ՀՀ ԳԱԱ, միջազգային 6 այլ ակադեմիաների անդամ, ակադեմիկոս, ՀՀ ԳԱԱ նախագահության անդամ, ՀՀ ԳԱԱ բնական գիտությունների բաժանմունքի ակադեմիկոս–քարտուղար, ՀՀ ԳԱԱ նախագահության խորհրդական, բժշկական գիտությունների դոկտոր, պրոֆեսոր, բժշկական ծառայության գնդապետ, «Մխիթար Հերացի» մեդալակիր, երկար տարիներ Մ. Հերացու անվան բժշկական համալսարանի ռեկտորի պաշտոնը զբաղեցրած Վիլեն Հակոբյանը, ում նաև կարելի է Հայաստանում հոմեոպաթիկ բժշկության ներդրման և զարգացման կնքահայրը համարել:

Ի դեպ, «Փաստ» օրաթերթի հետ զրույցում Վ.Հակոբյանը նշեց, որ երբ իր օգնությամբ և օժանդակությամբ Հայաստանում ներդրվեց բժշկագիտության այս ուղղությունը, ինքը չէր պատկերացնում անգամ, որ տարիներ անց այն կարող է Հայաստանում նման վերելք ապրել:

«Ես, լինելով դեղաբան, գիտեի բժշկագիտության այս ուղղության մասին և ծանոթանալով պրոֆեսորի հետ, հասկացա հոմեոպաթիկ բժշկության կարևորությունն ու նշանակությունը մեր երկրի համար: Ի սկզբանե հիմնադրվելով 200 տարի առաջ Գերմանիայում՝ տաղանդավոր բժիշկ Սամուել Հանեմանի կողմից, իր աշակերտների միջոցով այն տարածվել է սկզբում Ամերիկայում, իսկ այնտեղից էլ Հնդկաստանում: Այսօր համարվում է, որ հոմեոպաթիան ամենազարգացածն է Հնդկաստանում, որտեղ կան ինքնուրույն գործող պետական հոմեոպաթիայի համալսարաններ, բակալավրի, մագիստրոսի կոչումներով:

Պետք է իմ շնորհակալությունը հայտնեմ դոկտոր Մ. Սենանին, ով անմնացորդ ծառայում է բժշկությանը: Դուք այստեղ տեսաք մարդկանց,

ովքեր ալոպաթիկ բժշկության օգնությամբ չեն կարողացել բուժվել, բայց հոմեոպաթիկ բժշկության մեթոդներով ոչ միայն բուժվել են, այլև այսօր մոռացել են իրենց տանջող հիվանդությունների մասին: Ուստի, իմ կարծիքով, այս կենտրոնի բացումը մի նոր հարթակ է բժշկագիտության հրաշքը հայ ժողովրդին ցույց տալու և մարդկանց բուժելու համար: Եվ հույս ունեմ, որ այն մարդիկ, ովքեր երկար տարիներ տառապում են տարբեր քրոնիկ հիվանդություններով, կգան այստեղ, կապաքինվեն և հնարավորություն կունենան իրենց կյանքի որակը բարելավել և դառնալ լիարժեք առողջ մարդիկ»,– ասաց Վիլեն Հակոբյանը:

Ի դեպ, կենտրոնի բացման արարողությանը մասնակցում էին նաև հայտնի բժիշկներ, ովքեր նույնպես հավաստիացնում էին, որ լինելով ալոպաթիկ բժիշկներ, չեն կարողացել բուժվել, այսպես ասած, ավանդական բժշկության օգնությամբ և, դիմելով հոմեոպաթիկ բժշկությանը, անձամբ են ականատես եղել այս ուղղության կողմից մատուցվող մեծ հրաշքին:

Կենտրոնի բացման առիթով պրոֆեսոր Սենանին իր շնորհակալական ուղերձն էր հղել նաև ՀՀ նախկին վարչապետ, ԵԱՏՄ հանձնաժողովի կոլեգիայի նախագահ Տիգրան Սարգսյանը:

Կարծում եմ՝ մենք դեռ շատ առիթներ կունենանք ավելի մանրամասն ներկայացնել, թե ինչ հիվանդություններով և ինչպես կարող են մարդիկ դիմել Հայ–հնդկական բժշկական կենտրոն և ստանալ հոմեոպաթ–բժիշկների օգնությունը, իսկ այն, ինչ ներկայացրեցինք, ընդամենը կարճ ակնարկ էր հրաշագործություններ խոստացող կենտրոնի մասին, որն արդեն իր դռներն է բացել մեր երկրում՝ ք. Երևան, Այգեձոր 58/1 հասցեում:

Շարունակությունը՝ «Փաստ» օրաթերթի այսօրվա համարում