Հղի կնոջ մահ՝ բժշկի անփութության հետևանքով. Կառավարությունը ՄԻԵԴ-ի վճռով 12 հազար եվրո կվճարի

ОБЩЕСТВО 4 Апрель, 2018 20:06

Հայաստանի կառավարությունը «Մովսեսյանն ընդդեմ Հայաստանի» գործով Մարդու իրավունքների եվրոպական դատարանի վճռի համաձայն դիմումատուին 12000 եվրոյին համարժեք ՀՀ դրամ կվճարի: Հարցը ներառված է ՀՀ կառավարության նիստի առաջիկա օրակարգում:

Մասնավորապես՝ դիմումատուի դուստրը, ով 2007 թ. սեպտեմբերի 7-ին գտնվել է հղիության վաղ փուլում, կորցրել է գիտակցությունը և սկսել է ցնցվել։ Շտապօգնությունը ժամանել է կանչից 40-45 րոպե անց։ Ըստ դիմումատուի՝ այդ պահին բժշկին ասվել է, որ իր դուստրը հղի է: Բժիշկը ախտորոշել է ցնցումային համախտանիշ, երկու ներարկում է արվել, և նրան տեղափոխել են հիվանդանոց: 2007 թ. սեպտեմբերի 14-ին, այդպես էլ գիտակցության չգալով, դուստրը հիվանդանոցում մահացել է:

Փաստական այլ հանգամանքների հետ մեկտեղ՝ հիմնավորման մեջ նշվել է, որ հետաքննության ընթացքում քննիչը ցուցմունք է վերցրել բժշկական օգնություն ցուցաբերած բուժանձնակազմից:

Քննիչը նշանակել է փորձագետների հանձնաժողովի կողմից կատարվող դատաբժշկական փորձաքննություն: Եզրակացության մեջ նշվել է, որ դիմումատուի դստերը ցուցաբերած բժշկական օգնությունը եղել է ճիշտ և համապատասխանել է ախտորոշմանը: Քննիչը որոշել է մերժել քրեական վարույթի հարուցումը՝ հանցակազմի բացակայության պատճառով: Դիմումատուն դիմում է ներկայացրել Երևանի Ավան և Նոր Նորք վարչական շրջանների դատախազություն՝ պնդելով, որ իր դուստրը մահացել է բժշկի անփութության պատճառով:

Փորձագետների հանձնաժողովը, սակայն, եզրահանգել է, որ շտապօգնության բրիգադի կողմից և հիվանդանոցում ցուցաբերված բժշկական օգնությունը եղել է պատշաճ և բավարար, առանց բացթողումների: Քննիչը որոշել է մերժել քրեական վարույթի հարուցումը: Նույն օրը քննիչը դիմել է «Շտապբուժօգնություն» ՓԲԸ տնօրենին՝ շտապօգնության բրիգադի նկատմամբ պատասխանատվության համապատասխան միջոց կիրառելու պահանջով: Քննիչը հանգել է այն եզրակացության, որ շտապօգնության մեքենան ժամանել է զգալի ուշացմամբ, և պատշաճ բժշկական օգնություն չի ցուցաբերվել:

Դիմումատուն քննիչի որոշման առնչությամբ բողոք է ներկայացրել Երևանի Ավան և Նոր Նորք վարչական շրջանների դատարան՝ պահանջելով բժշկի և բուժքրոջ դեմ քրեական վարույթ հարուցել։ Արդյունքում, աշխատանքային կանոնակարգերը և բժշկական էթիկան լրջորեն խախտելու համար բժիշկը ստացել է նկատողություն: Երևանի Ավան և Նոր Նորք վարչական շրջանների դատարանը մերժել է դիմումատուի բողոքը՝ գտնելով, որ նրա դստեր մահվան առնչությամբ իրականացված քննությունը եղել է պատշաճ և բավարար: Դիմումատուն սույն որոշման դեմ բողոք է ներկայացրել Վերաքննիչ դատարան:

Վերաքննիչ դատարանը մերժել է բողոքը, իսկ Վճռաբեկ դատարանը որոշել է վճռաբեկ բողոքը թողնել առանց քննության, քանի որ այն չի ներկայացվել Վճռաբեկ դատարանում հավատարմագրված փաստաբանի կողմից:

ՄԻԵԴ-ը նշել է, որ քննիչը որևէ լուրջ քայլ չի ձեռնարկել բուժքրոջ և բժշկի սկզբնական ցուցմունքների միջև անհամապատասխանությունները պարզաբանելու համար, քննություն իրականացնող մարմինը հետաքննության ժամանակ չի ապահովել դիմումատուի անմիջական մասնակցությունը։

Ըստ ՄԻԵԴ-ի՝ ո՛չ դիահերձմամբ և ո՛չ էլ լրացուցիչ դատաբժշկական փորձաքննությամբ վերջնականապես չի պարզվել դիմումատուի դստեր մահվան պատճառը: Դատարանը գտել է, որ իշխանությունները չեն գործել բավարար ջանասիրությամբ և խնամքով, որպեսզի պարզեն դիմումատուի դստեր մահվան պատճառը: Ի վերջո, ՄԻԵԴ-ը նշել է, որ հետաքննությամբ պարզվել է, որ շտապօգնության բրիգադը դիմումատուի դստերը պատշաճ բժշկական օգնություն չի ցուցաբերել և համարել, որ քրեական իրավունքում առկա իրավական պաշտպանության միջոցով հնարավոր չէր լինի պարզել դիմումատուի դստեր մահվան պատճառը և պատասխանատվության ենթարկել պատասխանատու անձանց:

Աննա Բադալյան