Վիգեն Քոչարյանը պատգամավորների քննարկմանը ներկայացրեց ընտանիքում բռնության կանխարգելման մասին փոփոխված օրինագիծը

 Հայաստանի Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովը սկսել է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագծի քննարկումը: Հիմնական զեկուցող, ՀՀ արդարադատության նախարարի տեղակալ Վիգեն Քոչարյանն ընդգծեց, որ օրենսդրական նախաձեռնությունը որոշակի նախապատմություն ունի:

«Հայտնի է, որ դեռևս 2014 թ. ընդունված մարդու իրավունքների պաշտպանության ոլորտում գործողությունների ազգային ծրագրով նախատեսված էր նման իրավական կարգավորումների մշակումը: Համաձայն այդ ծրագրի` սույն օրենքի նախագիծը մշակվել էր միջգերատեսչական աշխատանքային խմբի կողմից, իսկ աշխատանքներն ավարտվել էին նախորդ տարվա վերջին: Սակայն, պայմանավորված խորհրդարանական ընտրություններով, այն հանրության դատին է ներկայացվել միայն այս տարվա սեպտեմբեր-հոկտեմբեր ամիսներին: Ձեզ հայտնի է, որ նախագծի վերաբերյալ տեղի ունեցան լայնածավալ հանրային քննարկումներ: Չնայած այն հանգամանքին, որ քննարկումների ընթացքում եղան նաև ոչ ճիշտ տեղեկություններ տարածելու դեպքեր, օրենքի նախագծի էությունը սխալ ընկալելու դեպքեր` մենք դրական ենք գնահատում հանրային քննարկումները, քանի որ դրանք մեծ հաշվով ծառայեցին հիմնական նպատակին. մենք կարողացանք հասկանալ այս նախաձեռնության հետ կապված գոյություն ունեցող մտավախությունները, ստացանք բազմաթիվ առաջարկներ նախագծի բարելավման վերաբերյալ: Հաշվի առնելով այդ ամենը` նախագծում կատարվեցին որոշակի փոփոխություններ և շտկումներ, որոնք վերաբերում են և՛ նախագծի անվանմանը, և՛ տարբեր դրույթների, և՛ տարբեր ինստիտուտների վերաբերյալ ձևակերպումների հստակեցմանը: Մենք գտնում ենք, որ դրական փոփոխությունների ենթարկված և արդյունավետ լուծումներ առաջարկող օրենսդրական նախաձեռնություն ենք ներկայացրել ձեր քննարկմանը»,- «Արմենպրես»-ի փոխանցմամբ` ընդգծեց Քոչարյանը:

Փոխնախարարը շեշտեց, որ օրենքը հետապնդում է երեք հիմնական նպատակ, որոնք հստակ սահմանված են վերնագրում: «Այդ նպատակներն են ընտանիքում բռնության կանխարգելումը, այդ բռնության պատճառով տուժած անձանց իրավունքների պաշտպանությունը, ընտանիքում համերաշխության վերականգնումը: Պետք է նշել, որ նախագծի նախնական տարբերակում համերաշխության վերականգման նպատակն ամրագրված չէր, սակայն նույնիսկ նախնական տարբերակում հստակ էին լուծումները, որոնք բերելու էին այս նպատակի իրականացմանը: Ուղղակի փոփոխություն ենք կատարել, որպեսզի վերնագիրն առավել հստակ արտացոլի առաջարկվող օրենսդրական կարգավորումների էությունը և  համապատասխան շեշտադրումները»,- մանրամասնեց Վիգեն Քոչարյանը:

Նա հավելեց, որ օրենքը նախատեսում է ընտանիքում բռնությունների կանխարգելում և այդ նպատակին հասնելու համար առաջարկում կոնկրետ մեխանիզմներ: «Օրենքը հստակեցնում է ընտանեկան բռնություն հասկացությունը: Մենք արդեն իսկ մեր օրենսդրության մեջ ունեինք ընտանեկան բռնություն հասկացությունը, սակայն այնտեղ շատ կարճ ձևակերպում էր տրված, ուստի անհրաժեշտություն կար հստակեցնել այս հասկացության առանձին տարրերը: Բացի այդ օրենքով նախատեսվում են տարբեր պետական մարմինների կողմից ձեռնարկվող գործողությունները` կապված ընտանիքում բռնությունների կանխարգելման հետ: Խոսքը պաշտպանական կամ կանխարգելիչ միջոցների մասին է, որոնք երեքն են` նախազգուշացում, անհետաձգելի միջամտություն,  պաշտպանական որոշում: «Նախազգուշացման պարագայում կանխարգելիչ նշանակությունն առավել ցայտուն է երևում, քանի որ այստեղ գործը սահմանափակվում է միայն նրանով, որ ոստիկանության ներկայացուցիչը զգուշացնում է համապատասխան սուբյեկտին իր վարքագծի ոչ ճիշտ լինելու և դա շարունակելու պարագայում հնարավոր հետևանքների վերաբերյալ: Այն դեպքերում, երբ առկա է ընտանիքում բռնության դրսևորում և առկա է դրա շարունակման հնարավորություն, որը կարող է սպառնալ բռնության զոհերի կյանքին կամ առողջությանը, ոստիկանության ներկայացուցիչը կարող է որոշում կայացնել անհետաձգելի միջամտության վերաբերյալ: Այս միջոցը կարելի է կիրառել միայն ծայրահեղ դեպքերում, երբ անհրաժեշտ է առանց հետաձգման համապատասխան որոշում կայացնել մարդկանց կյանքը և առողջությունը պահպանելու համար: Օրենքը նաև նախատեսում է, որ նման որոշում կայացնում է ոչ թե ոստիկանության ցանկացած ներկայացուցիչ, այլ ոստիկանության մասնագիտացված հատուկ ծառայության աշխատակիցը, ով պետք է օժտված լինի համապատասխան գիտելիքներով, հմտություններով և փորձառությամբ: Երրորդ միջոցը, որ կարող է կիրառվել, պաշտպանական որոշումն է: Այս որոշումն ընդունում է միայն դատարանը` բացառապես տուժողի դիմումի հիման վրա»,- հստակեցրեց Վիգեն Քոչարյանը:

Վիգեն Քոչարյանը նաև ներկայացրեց, որ օրենքով նախատեսված է ապաստարանների ձևավորում, որն ընդամենը վայր է, որտեղ կարող են ժամանակավորապես տեղավորվել ընտանիքում բռնությունից տուժածները` մինչև ընտանիքի համար բարդ իրավիճակը կարգավորվելը: «Տեղի ունեցած հանրային քննարկման արդյունքում իրականացված փոփոխություններն ավելի են հստակեցրել նախատեսված կարգավորումները, որպեսզի տարատեսակ մեկնաբանությունների տեղ չլինի: Մենք կարծում ենք, որ բոլոր խնդիրները, որ կային նախնական տարբերակում, հաջողությամբ լուծված են»,- եզրափակեց փոխնախարարը: