Ուղևորափոխադրումներ կատարող ընկերությունների լիցենզավորումը կկանխի՞ ավտովթարները

Կանոնավոր ու ոչ կանոնավոր ուղևորափոխադրումներ իրականացնող կազմակերպություննները ենթակա կլինեն լիցենզավորման: Այս մասին օրենսդրական փաթեթ է հրապարակվել Իրավական ակտերի նախագծերի հրապարակման միասնական կայքում:

Փոփոխություններ ու լրացումներ կկատարվեն «Ավտոմոբիլային տրանսպորտի մասին», «Վարչական իրավախախտումների վերաբերյալ», «Պետական տուրքի մասին» ու «Լիցենզավորման մասին» օրենքներում, ինչը պայմանավորված է միջպետական ոչ կանոնավոր ավտոբուսային ուղևորափոխադրումները կանոնակարգելու անհրաժեշտությամբ:

Ինչպես հայտնի է, ներկայում միջպետական ոչ կանոնավոր ավտոբուսային ուղևորափոխադրումների ոլորտում առկա են բազմաթիվ կազմակերպություններ, որոնք ոչ կանոնավոր ուղևորափոխադրումների անվան տակ իրականացնում են կանոնավոր ուղևորափոխադրումներ: Վերհսկողություն իրականացնող մարմինը` Տրանսպորտային տեսչությունը, սահմանային անցակետերում չունենալով վերահսկողություն իրականացնելու իրավասություն, հնարավորություն չունի դաշտը լիարժեք վերահսկելու: Արդյունքում փոխադրողների կողմից չի ապահովվում ուղևորափոխադրումների սպասարկման որակն ու անվտանգությունը:

Ոլորտի անվտանգությունն ու սպասարկման որակը բարձրացնելու նպատակով նախատեսվում է լիցենզավորել ավտոմոբիլային տրանսպորտով միջպետական և ՀՀ տարածքում կանոնավոր ու ոչ կանոնավոր ուղևորափոխադրումներ իրականացնող կազմակերպություններին, իսկ սահմանային անցակետերում միջպետական ուղևորափոխադրումների վերահսկողությունը վերապահել մաքսային ծառայության պետական լիազոր մարմնին:

Լիցենզավորումը կիրականացվի էլեկտրոնային եղանակով, լիցենզիայի պետական տուրքի չափը տարեկան կկազմի 100 հազար դրամը, իսկ յուրաքանչյուր տրանսպորտային միջոցի համար կվճարվի ևս 10 հազար դրամ:

Բացի այդ այս օրենսդրական փոփոխություններով առաջարկվում է ներդնել պարտադիր ապահովագրության համակարգ: Այն է՝ սահմանել լիցենզավորված կազմակերպությունների և անհատ ձեռնարկատերերի կողմից ուղևորների կյանքին, առողջությանը կամ գույքին պատճառված վնասի հատուցման իրենց քաղաքացիական պատասխանատվության ռիսկի ապահովագրման պահանջ` օրենսդրությանը համապատասխան:

Ըստ նախագծի՝ օրենսդրական փաթեթով կանոնավոր և ոչ կանոնավոր ուղևորափոխադրումներ իրականացնող կազմակերպությունների լիցենզավորման արդյունքում դրանք կունենան հավաքակայան, կիրականացվի նախաուղերթային բուժ և տեխզննություն, տրանսպորտային միջոցները կլինեն անվտանգ, անձնակազմի որակավորում կիրականացվի՝ բարձրացնելով փոխադրման անվտանգությունը: Լիցենզավորման դեպքում հնարավոր կլինի վերահսկելի դարձնել ամբողջ հանրապետթության շահագործվող տրանսպորտը: Լիցենզավորված կազմակերպությունների վերաբերյալ տեղեկատվությունը էլեկտրոնային եղանակով կփոխանցվի ՊԵԿ–ին` վերահսկողություն իրականացնելու նպատակով:

Միջպետական ոչ կանոնավոր փոխադրումներ իրականացնելու համար կտրվեն թույլտվություններ, որոնց վերաբերյալ տեղեկատվությունը նույնպես կփոխանցվի ՊԵԿ–ին: Թույլտվությունների բացակայության դեպքում կարգելվի ՀՀ պետական սահմանի հատումը տրանսպորտային միջոցների կողմից:
Երևի շատերը կհիշեն, թե որքան շատ են Հայաստանից ուղևորափոխադրումներ իրականացնող ընկերությունններին պատկանող ավտոբուսների մասնակցությամբ ավտովթարները: Հենց միայն այս տարվա հունիսին Վրաստանի Մառնեուլի–Թբիլիսի ավտոճանապարհին վթարվել էր ուղևորափոխադրում իրականացնող հայկական ավտոբուս, որի «արդյունքում» մի շարք ուղևորներ տարբեր մարմնական վնասվածքներով տեղափոխվել էին հիվանդանոցներ: Ի դեպ, պարզվել էր, որ այդ ավտոբուսն անօրինական ուղևորափոխադրում էր իրականացրել և մինչ այդ տուգանվել էր Տրանսպորտի, կապի և տեղեկատվական տեխնոլոգիաների նախարարության կողմից:
Նախարարության կողմից տուգանված մեկ այլ ավտոբուս էլ ընդամենը մեկ ամիս առաջ դարձավ մի քանի քաղաքացու մահվան պատճառ: Սեպտեմբերի 7–ին Վրաստանի Մցխեթայի մունիցիպալիտետում տեղի էր ունեցել ավտովթար: Հայկական պետհամարանիշով ավտոբուսը բախվել էր «Մերսեդես» մակնիշի ավտոմեքենային, որի ուղևորները տեղնուտեղը մահացել էին, իսկ ավտոբուսի 11 ուղևոր տեղափոխվել հիվանդանոց: