Փոխադարձ բռունցքներ կլինե՞ն. Վ. Բաղդասարյանը «Ելքի»` մարտահրավերն ընդունելուն «հումորով է վերաբերում», Ա. Զեյնալյանը՝ փակագծերը չի բացում

«Ելք» խմբակցության պատգամավոր Արտակ Զեյնալյանը Tert.am-ի հետ զրույցում չի շտապում պարզաբանել խմբակցության ղեկավար Նիկոլ Փաշինյանի հայտարարության ենթատքեստը, որ եթե Արտաշես Գեղամյանի խուլիգանական պահվածքը մարտահրավեր էր «Ելքին», ապա իրենք ընդունում են այդ մարտահրավերը:  

Հարցին, թե ի՞նչ է ենթադրում դա, արդյոք կլինե՞ն փոխադարձ  բռունցքներ` ուղղված ՀՀԿ-ին,  Զեյնալյանը պատասխանեց. «Կասենք, պահը կգա կասենք, նախապես ոչինչ չենք ուզում բացահայտել»:  

Հարցին, թե ի՞նչ արձագանքի էին սպասում, որը չստացան ՀՀԿ-ի կողմից, Զեյնալյանը նշեց, որ ՀՀԿ-ն պետք է ընդուներ խախտման փաստը և դատապարտեր: Հարցին, թե դա բավարար կլինե՞ր  այն պատգամավորներին սաստելու համար, ովքեր ձեռքի ուժով  են փորձում հարց լուծել,  պատգամավորը պատասխանեց, որ դա ենթադրում է պատասխանատվություն և նաև երաշխիք, որ նման երևույթներ չեն կրկնվելու: «Դա  կանխարգելիչ բնույթ կունենար»,-ասաց նա:   

Իսկ թե ի՞նչ նկատի ունեին, ասելով, թե Հայաստանի կյանքում սա նոր շրջափուլի մեկնարկ է, պատասխանեց. «Մենք կբացահայտենք, եթե պահը գա, անհրաժեշտ դրսևումներ են լինելու, հիմա  բոլորին լայն հնարավորություն ենք տալիս երևակայելու, մտավարժանքներ անելու»:

Հարցին, թե այս ամենը ենթադրո՞ւմ է, որ «դալաններում ծեծի» հարցը օրակարգում է, Արտակ Զեյնալյանը պատասխանեց. «Իրավաչափության և ողջամտության սահմաններում ինչ-որ իրավիճակը թելադրի»:

Վահրամ Բաղդասարյանը Tert.am-ի հետ զրույցում թեմայի առնչությամբ նշեց, թե ինքը նախ ուղղում պետք է կատարի և նշեց, թե նիստին հայտարարությունը, թե ՀՀԿ-ն որևէ հայտարարություն չի տարածել, տեղին չէ: «Երեկ խմբակցության անունից մենք տարածել ենք մեր կարծիքը  նման երևույթների նկատմամբ, բայց քանի որ հայտարարվել է, որ չի եղել,  նորից համաձայնեցրեցի, որ նույնը կրկնեն այսօր և տարածեն»,-ասաց նա:

Վահրամ Բաղդասարյանը շեշտեց, թե իրենք անընդունելի են  համարում նման միջոցներով քաղաքական բանավեճերը հարթելը: «Մենք քաղաքակիրթ քաղաքական մշակույթի կողմնակից ենք, և բացառապես վիրավորանքներ, հայհոյանքներ, քաշքշուկներ ու ծեծկռտուքները քաղաքական մշակույթի մեջ բացառում ենք ու անընդունելի ենք համարում: Իսկ ինչ մնում է իրենց հայատրության հետ կապված, բնականաբր ինձ թվում է ժամանակը ամեն ինչ հարթում է և իրենք դեռ երկար ժամանակ պետք է աշխատեն միասին»,-ասաց նա:

Դիտարկմանը, թե Նիկոլ Փաշինյանը հղում արեց նրա՝ ոչ վաղ անցյալում արված հայտարարությանը, թե զգուշացեք դալաններում ձեզ չծեծեն, արդյոք համակարծիք է, որ այդ հայտարարության տրամաբանական շարունակությունն էր Գեղամյանի հետ տեղի ունեցած դեպքը, Վահրամ Բաղդասարյանը պատասխանեց. «Հումորով եմ վերաբերում»:

Հիշեցնենք, որ երջանկահիշատակ ՀՅԴ-ական Վահան Հովհաննիսյանը ժամանակին ԱԺ-ում դիմելով ՀՀԿ-ական պատգամավորներին ասել էր, որ եթե իրենց թեկնածությունը դնեն ընտրությունների ժամանակ ու նրանց չպատշապանի Հովիկ Աբրահամյանը, նախագահը, դատախազը, ոստիկանությունը՝ չեն հաղթի: «Ձեզ էնքան կծեծեն դալաններում, որ դուք կարտագաղթեք, տղերք»,-ասել էր Հովհաննիսյանը:  

Հետագայում Վահրամ Բաղդասարյանը Վահան Հովհաննիսյանի՝ իր կուսակցությանն ուղղված այդ հայտարարության սլաքներն ուղղեց «Ելքին»՝ ակնարկելով, որ «ձեզ դալաններում կծեծեն»: