Հռոմի պապին կամենում են գահընկեց անել

Past.am    Վատիկանի կղերական համայնքը հրապարակային պատերազմ է սկսել Հռոմի պապի դեմ: Տասնյակ աստվածաբաններ ու հոգևորականներ Հռոմի սրբազան քահանայապետին մեղադրել են հերետիկոսության և ուլտրալիբերալիզմի մեջ՝ քննության առնելով Պապի կողմից հաստատված Amoris Laetitia՝ Սիրո ուրախություն կոչվող կոնդակը (Ընտանիքի առաքելություն կոչվող հատվածը), որ ընդունվել էր դեռ 2014–15թթ. հրավիրված Եպիսկոպոսական սինոդների 13 խմբակների ծավալված լայն քննարկումների արդյունքում:

Ուղիղն ասած՝ դեռ 2016–ի ապրիլին, երբ Վատիկանի առաքելական պալատի Գրադարանի սրահում Սուրբ աթոռի գլխավոր քարտուղար Լորենցո Բալդիսերրին և Վիեննայի արքեպիսկոպոս Քրիստոֆ Շյոնբորնն ի լուր աշխարհի հրապարակեցին Amoris Laetitia–ն, անմիջապես շշուկներ տարածվեցին այն մասին, որ Պապը նոր և ազդեցիկ թշնամիներ է ձեռք բերել Վատիկանի ներսում: Հայտնվեցին նաև մի քանի համարձակներ, որոնք հենց այդ պահին հայտարարեցին, թե ճիզվիտ Պապն իր հարազատ արգենտինական տանգոյից ավելի շատ է գլուխ հանում, քան աստվածաբանությունից և ընդհանրապես՝ քրիստոնյա էլ չէ: Եվ թեպետ սովորական հավատացյալները ողջունեցին այս կոնդակը՝ Ֆրանցիսկոս պապին մի անգամ ևս հեղափոխական Պապ, Սիրո ճանապարհով ընթացող Պապ որակումները տալով, Վատիկանում, փաստորեն, կրքերը չեն հանդարտվում: Եվ այս անգամ արդեն ներվատիկանյան/արտավատիկանյան դավադիրների խմբակը մտադիր է ժամանակից շուտ հանգստի ուղարկել քահանայապետին՝ նրա բարի համբավը մինչև վերջ ոտքի կոխան դարձնելուց հետո:

Իրականում, սակայն, 9 գլուխներից և 261 էջերից բաղկացած Amoris Laetitia–ն ցանկացած բանական քրիստոնյայի համար որևէ սոսկալի դրույթ չի պարունակում: Եվ եթե քննության առնենք դրա՝ Ընտանիքի առաքելություն կոչվող բաժինը, որին էլ առնչվում են հնչող մեղադրանքները, հարկ է նշել, որ Պապը մազ անգամ չի շեղվել այն դոկտրինից, որ կաթոլիկ եկեղեցին է հռչակել ընտանիքի պարագայում՝ միայն Սինոդի հավանությունից հետո առանձին շտկումներ մտցնելով ամուսնալուծված/վերապսակված զույգերի՝ Սրբ. խորհուրդներին մերձենալու կարգում:

Պարզ ասած, անսալով հավատացյալների խնդրանքին, Պապն այս զույգերին հնարավորություն է տվել հաղորդություն ընդունել Եկեղեցում, որ նախկինում անհնար էր անել՝ Աստծո կողմից հաստատված միությունը մարդու ձեռքով քանդելու մեղադրանքով: Ինչո՞ւ. որովհետև Պապը համոզված է, որ ոչ ոք չի կարող իրեն Աստված կարգելով՝ հավերժորեն պատժել մարդկանց և անհրաժեշտ է համարում վիրավոր ընտանիքներին քրիստոնեական եկեղեցում վերաինտեգրվելու հնարավորություն տալ: Ինչ վերաբերում է նույնասեռական ընտանիքներին, Կոնդակում հստակորեն նշվում է, որ կաթոլիկ եկեղեցու ուսմունքի տեսանկյունից՝ այս միությունները չեն կարող ընտանիք համարվել: Միաժամանակ, սակայն, կոչ է արվում չստորացնել/չնվաստացնել այս մարդկանց՝ անհրաժեշտության դեպքում սեր, հոգատարություն և ըմբռնում ցուցաբերելով նաև նրանց նկատմամբ: Ահա այս փաստն է, որ առանձին կղերների համար հերետիկոսության, ոչ թե սիրո և քաջության օրինակ է հանդիսանում: Ավելին, այս մարդիկ մոռանում են, որ եթե փարիսեցիաբար կառչած են դոկտրիններից ու տառերից՝ ստիպված են հավատարիմ մնալ նաև 1870–ին ընդունված մեկ այլ Կոնդակի, որով Հռոմի պապը պաշտոնապես անմեղ է ճանաչվում, իսկ նրա բոլոր տեքստերը ոչ թե մասնավոր կարծիք են, այլ Սրբ Պետրոսի փոխանորդի՝ Երկնքից ստացված հայտնություն: 

Ստացվում է, որ եթե, օրինակ, ամերիկյան Սենտ–Լյուիսի համբավավոր կարդինալ ու Պապի վաղեմի թշնամի, ի հակառակ Պապի՝ մշտապես ճոխ զարդերով ու հանդերձով պճնված Ռայմունդ Բերկը (որի ձեռագիրը միանգամից է երևում Խմբային պատժարան կոչվող ամբիցիոզ մեղադրագրում), ավելի ազնիվ ու համեստ գտնվեր, իր կարդինալական խմբակի և տարատեսակ ուխտերի ասպետների հետ մեկտեղ՝ մնացած բոլոր քույր–եկեղեցիներին էլ կոչ կաներ հրաժարվել կղերական խստաշունչ դոգմաներից և մի քիչ ավելի մարդկային տեսք ունենալ: Ոչ ոք չի պնդում, որ Եկեղեցին, հակառակ Ավետարանի պատգամին, պիտի արդարացնի դիցուք՝ շնությունը: Բայց Եկեղեցին նաև պիտի լայն բանա իր դռները բոլոր այն մարդկանց համար, որոնք կամենում են այդտեղ լինել և որոնք ցանկություն են հայտնում մերձենալ Սրբ Խորհուրդներին: Խոստովանենք՝ այս առումով մեր Եկեղեցին շատ ավելի լիբերալ է, որովհետև և խոստովանությունն է ընդհանրական և Սրբ Խորհուրդներին մերձենալու համարձակությունն ու կամքն է թողնվում հավատացյալի խղճին: Հուսանք նաև, որ Պապը հերթական անգամ քաջություն կդրսևորի՝ ինչպես Մալթայի ուխտի ասպետների դեպքում, և կաթոլիկ եկեղեցին կշարունակի ավելի մարդանալ:

Էջը պատրաստեց Գոհար Սիմոնյանը