ԱԻՆ տեխնիկական հագեցվածության խնդիրը ներկայացվել է ՀՀ նախագահին ու վարչապետին. Դավիթ Տոնոյան
ОБЩЕСТВОՎերջին շրջանում ՀՀ տարածքում խոշոր անտառային հրդեհներից հետո ԱԻՆ տեխնիկական հագեցվածության վերաբերյալ արվել են համապատասխան եզրակացություններ, որոնք ներկայացվել են նախագահին և վարչապետին: Այդ մասին կառավարության նիստից հետո լրագրողների հետ ճեպազրույցում ասաց ՀՀ ԱԻ նախարար Դավիթ Տոնոյանը:
«Պետք է հաշվի առնել, որ, ռազմական լեզվով ասած, մենք գործում էինք երկու «թատերաբեմում»: Երկու օր զուգահեռ աշխատանքներ էին տարվում և՛ Խոսրովի արգելոցում, և՛ Արտավանի անտառներում: Իհարկե, տեխնիկական միջոցները` ամենագնաց մեքենաները և ԶՈւ տրամադրած ուղղաթիռները, թույլ չէին տալիս արձագանքել պատշաճ ձևով: Նաև ռելիեֆի կտրտվածությունն էր խանգարում: Որոշ եզրակացություններ արվել են, որոնք ներկայացվել են հանրապետության նախագահին և վարչապետին` մեր հագեցվածությունը բարձրացնելու առումով»,- «Արմենպրես»-ի փոխանցմամբ, ասաց Դավիթ Տոնոյանը:
Անդրադառնալով հարցին, թե ինչո՞ւ ՌԴ ԱԻՆ համապատասխան ինքնաթիռը ներգրավելու խնդրանքը չեղավ ավելի վաղ, նախարարը պատասխանեց. «Չենք դիմել ավելի վաղ, քանի որ իրավիճակի գնահատականը թույլ չէր տալիս այդպիսի ինքնաթիռ խնդրելու, երբ սկսեցին այրվել անտառները, ոչ թե խոտածածկը, միանգամից դիմեցինք», - ասաց Դավիթ Տոնոյանը՝ ավելացնելով, որ ԱԻՆ հագեցվածության բարձրացման համար կառավարության կողմից պարբերաբար հատկացվում են միջոցներ, աջակցում են նաև միջազգային գրանտային ծրագրերը: «Այս սուղ միջոցների պայմաններում նաև տարբեր միջազգային համագործակցության շրջանակներում ենք ձեռք բերում տեխնիկա, օրինակ,Երևանում կիրառվում են հրշեջ մեքենաներ, որոնք տրամադրվել են Ճապոնիայի կողմից գրանտային ծրագրերով: Այսպիսին է իրավիճակն այսօր,սակայն մենք անում ենք ամեն ինչ, որպեսզի կարողանանք այն բարելավել», - ասաց ԱԻ նախարարը՝ հավելելով, որ անտառների և քաղաքային պայմաններում հրդեհաշիջման աշխատանքները տարբեր տեխնիկական միջոցներ են պահանջում:



