Հայաստանը զբոսաշրջիկների համար ամենաապահով վայրերից է. Կորեայում Հայաստանի դեսպանը հարցազրույց է տվել կորեական պարբերականին

Կորեայի Հանրապետությունում Հայաստանի դեսպան  Հրանտ Պողոսյանը կորեական պարբերականին տված հարցազրույցում հույս է հայտնել, որ կորեացի զբոսաշրջիկները կբացահայտեն Հայաստանը որպես զբոսաշրջության կարեւոր ուղղություն: Նա, մասնավորապես, ներկայացրել է այն գեղատեսիլ վայրերը եւ Հայաստանին բնորոշ առանձնահատկությունները, որոնք կարող են գրավել զբոսաշրջիկներին:

«Հայաստանը հաճախ  են անվանում «թանգարան բաց երկնքի տակ»: Այն  այցելուներին ներկայացնում է ժամանակակից հասարակության եւ հարյուրամյա ավանդույթների միասնություն,  մշակույթ.  մի վայր է, որտեղ արեւմտյան ապրելակերպը հիմնված է արեւելյան ավանդույթների վրա: Հայաստանը առաջին քրիստոնյա երկիրն է, ընդունել է քրիստոնեությունը որպես պետական կրոն   301 թվականին՝ Հռոմից դեռեւս 79 տարի առաջ:  Գառնիի հեթանոսական տաճարից բացի  Հայաստանում կան բազմաթիվ վանքեր, եկեղեցիներ, խաչքարեր, անթիվ պատմական գտածոներ, որոնք հասանելի են այցելուներին: Վանքերից եւ ամրոցներից շատերը գրանցված  են ՅՈՒՆԵՍԿՕ-ի մարդկության ոչ նյութական մշակութային ժառանգության ցանկում»,-«Արմենպրես»-ի հաղորդմամբ՝ The Korea post-ի հետ զրույցում ասել է  դեսպանը:

Աստղադիտությամբ հետաքրքրված զբոսաշրջիկների համար նա առանձնացրել է Քարահունջը, անդրադարձել է նաեւ մայրաքաղաք Երեւանին:

«Երեւանը՝ մեր վարդագույն քաղաքը, աշխարհի ամենահին քաղաքներից է: Այն սկզբնավորվել է  դեռևս Ք.ա. 8 դարից, երբ 782 թվականին Արգիշտի 1-ի օրոք հիմնադրվեց  Էրեբունի ամրոցը: 2018 թվականի աշնանը Երեւանը կտոնի հիմնադրման 2800-ամյակը. այն ճանաչվել է  ամենահին մշտական բնակեցված մայրաքաղաքը: Մեր տոնակատարություններին մեծ թվով զբոսաշրջիկների ենք սպասում»,-ներկայացրել  է նա:

Հրանտ Պողոսյանի խոսքով՝ Հայաստանը նաեւ նպատակահարմար ուղղություն է գինու սիրահարների համար, գինու գիտակների համար այն դառնում է առաջատար նպատակակետ:

«Արենիում կազմակերպում ենք  ամենամյա գինու փառատոնը, ինչպես նաեւ մայիսի սկզբին Երեւանում  կանցկացնենք եւս մի փառատոն: 2012 թվականին «Զորահ» հայկական գինին հայտնվեց  Բլումբերգի՝ աշխարհի առաջատար գինիների տասնյակում»,-նշել  է դեսպանը:   

Հրանտ Պողոսյանի ներկայացմամբ՝ Հայաստանը նաև առաջարկում է զբոսաշրջիկներին բացահայտել հայկական դասական եւ ժամանակակից երաժշտությունը.

«Հայաստանը  ջազի սիրահարների համար լավագույն կենտրոններից է, որը համալրվում է նոր անուններով՝ Տիգրան Համասյան, Միքայել Ոսկանյան»: 

Դեսպանը հայկական խոհանոցի, մշակույթի, գինու ավանդույթների մասին խոսելուց զատ ընդգծել է այն , որ Հայաստանը զբոսաշրջիկների համար ամենաապահով վայրերից է: