Դարերի պատմություն ունեցող հարաբերություններ. Իսրայելի անկախության 69-րդ տարեդարձի կապակցությամբ կազմակերպվեց ընդունելություն

ОБЩЕСТВО 26 Июль, 2017 23:35

Հայաստանում Իսրայելի դեսպան Էլիյահու Յերուշալմին շարունակելու է ջանքեր գործադրել՝ ուղղված հայ-իսրայելական հարաբերությունների ամրապնդմանը: «Արմենպրես»-ի հաղորդմամբ՝ այս մասին նա հայտարարեց Իսրայելի անկախության 69-րդ տարեդարձի կապակցությամբ կազմակերպված ընդունելությանը, որին հրավիրված էին քաղաքական, դիվանագիտական, հասարակական ոլորտի ներկայացուցիչներ՝ մասնավորապես՝ ՀՀ գյուղատնտեսության նախարար Իգնատի Առաքելյանը, Փոխարտգործնախարար Շավարշ Քոչարյանը, Կապի, տրանսպորտի եւ տեղեկատվական տեխնոլոգիաների նախարար Վահան Մարտիրոսյանը, Չեխիայի, Գերմանիայի, Ճապոնիայի դեսպաններ՝ Պյոտր Միկիսկան, Մաթիաս Քիսլերը, Էյջի Տագուչին, Հայաստանում Իսրայելի պատվո հյուպատոս Աշոտ Շահմուրադյանը, Հայաստանում հրեական համայնքի ղեկավար Ռիմա Վարժապետյանը եւ այլք:

«Ինձ համար մեծ պատիվ է ողջունել Ձեզ այստեղ: Տոնում ենք Իսրայելի անկախության 69-ամյակը. այս տարիների ընթացքում վիթխարի նվաճումներ ենք ունեցել երկրի վերակառուցման, ամբողջ աշխարհից եկած հրեաների ներգաղթը կլանելու հարցում, ինչպես նաեւ գիտության, գյուղատնտեսության, բժշկության, բարձր տեխնոլոգիաների ոլորտներում, եւ համոզված ենք, որ մոտ ապագայում Հայաստանը եւ Իսրայելը այս բնագավառներում ծավալուն համագործակցություն կունենան: Խորհրդանշական է նաեւ այն, որ այսօր մենք տոնում ենք երկու երկրների միջեւ դիվանագիտական հարաբերությունների հաստատման 25-ամյակը»,-ընդգծեց նա:

Իսրայելի տարածաշրջանային համագործակցության նախարար Զախի Հանեգբին, ով պաշտոնական այցով հուլիսի 25-ին ժամանել էր Հայաստան, նշեց, որ երկու ժողովուրդների միջեւ բարեկամությունը դարերի պատմություն ունի, եւ որ Իսրայելը բարձր է գնահատում երկրում հայկական համայնքի ներկայությունը:

«Այս այցի շրջանակում նպատակ ունենք խորացնելու հարաբերությունները, որպեսզի մոտակա տասնամյակներում դրանք զարգանան. այդ ուղղությամբ հանդիպումներ եմ ունեցել պաշտոնյաների հետ Հայաստան ժամանելուց ի վեր, ստորագրվել են երեք կարեւոր համաձայնագիր, որոնք նպատակ ունեն խորացնելու հարաբերությունները զբոսաշրջության, տնտեսության, բարձր տեխնոլոգիաների ոլորտում»,-ասաց իսրայելցի նախարարը՝ նաեւ կարեւորելով Հայաստան-Իսրայել ուղիղ չվերթների առկայությունը:

ՀՀ փոխարտգործնախարար Արմեն Պապիկյանն էլ հույս հայտնեց, որ Իսրայելի պատվիրակության այցը Հայաստանը հնարավորություն կտա երկրների միջեւ այսուհետ ավելի ակտիվ հարաբերություններ զարգացնելու :

«Երկու երկրներն էլ ունեն պատմական, մշակութային ընդհանրությունները, ունեցել են դժվարություններ եւ հաղթանակած էջեր եւ դրա հետ մեկտեղ պահպանել են ազգային ինքնությունը եւ ապագայի հանդեպ անկոտրում հավատը: Խորհրդանշական է, որ հայ-իսրայելական դիվանագիտական հարաբերությունների հաստատման 25-ամյակին զուգահեռ այսօր տոնում ենք Իսրայելի անկախության 65-ամյակը»,-ասաց փոխնախարարը՝ հավելելով, որ երկուստեք քննարկումներ են տարվում երկու երկրների միջեւ տարբեր ոլորտներում համագործակցությունը զարգացնելու ուղղությամբ:

Երեկոյի շրջանակում ելույթ ունեցավ «Հայաստանի փոքրիկ երգիչներ» երգչախումբը: