Ուսանողների քանակի կրճատումն ինչ խնդիրներ կարող է առաջացնել բուհերի համար

Միասնական քննությունների արդյունքներն արդեն իսկ պարզ են՝ 2017 թվականին բուհ է ընդունվել 8266 դիմորդ, և 11,375 տեղ թափուր է մնացել: Բուհերում թափուր տեղերի քանակը կրճատելու համար որոշում է կայացվել հուլիսի 15-ից 20-ը կազմակերպել նոր դիմում-հայտերի ընդունման գործընթաց, որին կարող են մասնակցել հիմնական մրցութային փուլին մասնակցած և բուհ չընդունված այն դիմորդները, որոնք ունեն համապատասխան առարկաներից դրական միավորներ:  

Tert.am-ի փորձեց պարզել, թե ուսանողների քանակի կրճատումն ի՞նչ խնդիրներ կարող է առաջացնել բուհերի համար: Tert.am-ի հետ զրույցում Երևանի պետական համալսարանի ռեկտոր Արամ Սիմոնյան ասաց, թե ԵՊՀ-ում ուսանողների քանակը կրճատվել է 400-ից 500-ի սահմաններում: Միևնույն ժամանակ նա չբացառեց, որ բուհ ընդունվողների քանակը կարող է ավելի կրճատվել, քանի որ դեռևս պարզ չէ, թե քանի հոգի ուսման վճարի կկարողանա վճարել:

«Ֆինանսական դժվարություններ կլինեն, որոնք պետք է հաղթահարենք, իսկ ուսանողների պակասը պայմանավորված է հանրակրթական հաստատությունների շրջանավարտների թվի կրճատմամբ: Ֆակուլտետների մեծ մասում կան թափուր տեղեր»,- ասաց նա:

Հայաստանի պետական տնտեսագիտական համալսարանի ռեկտոր Կորյուն Աթոյանը ընդունելության արդյունքներից դժգոհ չէ: Նա Tert.am-ի հետ զրույցում տեղեկացրեց, որ իրենց մոտ ընդունվողների քանակը, նախորդ տարվա համեմատ, պակաս է մոտ 100-ով: Նրա գնահատմամբ՝ այս տարի բուհը խնդիրների առջև չի կանգնի, սակայն նման դրական կանխատեսում մյուս տարվա համար չունի:

«Մյուս տարի կկանգնենք խնդիրների առջև, քանի որ դիմորդների թիվը կլինի կիսով չափ, որովհետև շրջանավարտների թիվը պակասելու է: Մեզ մոտ ընդունելության շեմը չի նվազել ու գրեթե նախորդ տարվա շեմն է՝պետպատվերը 55.25-ից 56-ի միջակայքում է, իսկ ոչ պետպատվերը անցյալ տարվա մակարդակն է»,- ասաց նա:

Աթոյանի խոսքով՝ իրենց բուհում ընդունելության քննությունների 2-րդ փուլ չի անցկացվի: Ի տարբերություն ՀՊՏՀ-ի, ԵՊՀ-ում 2-րդ փուլ կլինի: Սակայն ԵՊՀ ռեկտոր Արամ Սիմոնյանը վստահեցրեց՝ բացառվում է, որ առանց քննություն հանձնելու կամ անբավարար ստացած անձինք ուսանող դառնան:

Հարցին՝ բուհերում ուսանողների քանակի կրճատումը, շեմի իջեցումը չի՞ ազդի կրթության որակի վրա, Սիմոնյանը պատասխանեց. «Մի որոշ մասն՝ այո, բայց խնդիրն այն, որ մեր ուսանողների մի որոշ մասը միշտ էլ թույլ առաջադիմություն է ցուցաբերել ու ցուցաբերում է, բայց մյուս մասն էլ բավականին լավ որակ ունի. սա միշտ եղել է: Այլ բան է, որ հիմա բևեռացում կա, այսինքն՝ ոսկյա միջինը, որը միշտ ավելի շատ է եղել, ավելի նվազել է: Կան շատ լավերը և շատ վատերը, այս փուլում պետք է հաղթահարվի, և սա ոչ միայն բուհի խնդիրն է, այլև՝ դպրոցի»:

ՀՊՏՀ-ի ռեկտորն էլ նույն կարծիքն է: Թեև նա պնդեց, որ բուհ ընդունվելու պահանջները չեն փոխվելու, միևնույն է՝ գտնում է, որ ուսանողների կրթական որակն ընդհանուր առմամբ ավելի ցածր է լինելու. «Շեմը հնարավոր է իջնի, այսինքն նրանք, ովքեր մյուս տարի դրական գնահատական ստանան, կարող են ուսանող դառնալ»։

ԵՊՀ ռեկտորը նաև չբացառեց, որ համալսարանում կարող են կրճատումներ լինել: Սակայն շեշտեց, թե ամեն ինչ կանեն, որ կրճատումները ցավագին չլինեն:

«Ամեն ինչ անելու ենք, որ սոցիալական դժվարություն չառաջացնի: Աշխատավարձի ֆոնդին ձեռք տալու ցանկություն չունենք և չենք անի: Կփորձենք կարգավորել այլ ծախսեր կրճատելու հաշվին, եթե դասախոսական կազմ կրճատվի, ապա ի հաշիվ առաջատար տարիքի հասած դասախոսների»,- եզրափակեց Արամ Սիմոնյանը: